ટેક્સ પ્લાનિંગઃ કરવેરાને લગતા દર્શકોના સવાલ

ના રોજ પ્રકાશિત Sat, 02, 2016 પર 12:40  |  સ્ત્રોત : Moneycontrol.com

આજે આપણે કરવેરાને લગતાં દર્શકોના સવાલોના જવાબ આપીશું. અને એના જવાબ આપવા માટે આપણી સાથે જોડાયા છે વરિષ્ઠ ટેક્સ વિશેષજ્ઞ મુકેશ પટેલ.


સવાલઃ સોલી ભામગરા - મારો પુત્ર એનઆરઆઈ છે અને ભારતમાં તેનું પીપીએફ અને સેવિંગ એકાઉન્ટ અને રોકાણ છે તો આવા કિસ્સામાં આવકવેરા રિટર્ન અને આનઆરઓ એકાઉન્ટ અંગેનું શું આયોજન કરવું જોઇએ?  

જવાબઃ રિઝર્વ બેન્ક ઓફ ઇન્ડિયાની ગાઇડલાઇન અનુસાર કોઇપણ ભારતીય બિનરહીશ થાય છે ત્યારે એમના ભારતના બેન્ક એકાઉન્ટને એનઆરઓ એકાઉન્ટ કરવું જરૂરી છે. તેનું ભારતમાં જો રિટર્ન ભરાતું હોય તો તેમાં પણ આપને બિનરહીશ હોવાનો ઉલ્લેખ કરવો ફરજિયાત છે. આવકવેરા બિનરહીશ હોવાનો ઉલ્લેખ કરવાનો મુખ્ય ઉદ્દેશ્ય એ છે કે વિદેશમાં થયેલી આપની આવક ઉપર આપને ટેક્સ ભરવો ન પડે. આ કાર્યવાહી કરવામાં જો ચૂક થઇ હોય તો આપને કોઇ દંડ બનતો નથી. એનઆરઓ એકાઉન્ટ જે વ્યાજ મળે છે તેના ઉપર ટી઼ીએસ કપાત થાય છે અને આ ટીડીએસ જો અન્ય કોઇ ટેક્સ ભરવાનો થતો હોય તો તેની સામે સેટ ઓફ કરી શકો છો. એનઆરઓ એકાઉન્ટને એનઆરઈ એકાઉન્ટમાં કન્વર્ટ કરી શકો તો તેના ઉપર ડિપોઝીટ કે વ્યાજ ઉપર કોઇ કરપાત્રતા બનતી નથી. પીપીએફના કિસ્સામાં બિનરહીશ થયા પહેલાંનું ખાતું હોય તો તેને પીપીએફ પરિપક્વ થાય ત્યારે તેના નાણાંનો ઉપાડ કરી લેવો પડે છે. અર્થાત એનઆરઆઈના કેસમાં પીપીએફ મેચ્યોરિટી બાદ ચાલુ રાખી શકાતું નથી

સવાલઃ ક્રિષ્ના સોલંકી - મેં વર્ષ 2008માં અમદાવાદમાં એક ફ્લેટ રૂપિયા 8 લાખમાં ખરીદ્યો હવે આ ફ્લેટ હું રૂપિયા 27 લાખમાં વેચાણ કરૂ તો તેના પર મારે કેટલો ટેક્સ ભરવાનો થાય? આ ટેક્સ ભરવામાંથી બચવા માટે શું કરવું જોઇએ અને ટેક્સ બચાવવા માટે બીજી પ્રોપર્ટી કેટલી કિંમતની ખરીદવી પડે?  કેપિટલ ગેઇનની સામે પ્રોપર્ટીમાં રોકાણ માટેની કોઇ મર્યાદા ખરી? જો હું મકાનની ખરીદી કરૂ છું તો તેના ઉપર લોન લેવાની છૂટ ખરી? આ ટ્રાન્ઝેક્શન હું ઇન્કમટેક્સ રિટર્નમાં કેવી રીતે દર્શાવી શકું?

જવાબઃ 2008-09માં ખરીદેલા મકાનને 2015-16માં વેચો છો તો તેના ઉપર લાંબા ગાળાનો મૂડી નફો લાગે. ઇન્ડેક્સેશનના આધારે આપના મકાનની કિંમત રૂપિયા 15 લાખ ગણવામાં આવશે. આપની વેચાણ કિંમત અને ઇન્ડેકસેશનની તફાવતની રકમ પર 20.6 ટકા ટેક્સ ભરવાનો થાય. જો આપ ટેક્સ ભરવા ન માંગતા હોવ તો કેપિટલ ગેઇનના બોન્ડમાં રોકી શકો છો. કેપિટલ ગેઇનના આ બોન્ડ કલમ 54ઈસી હેઠળ કરમુક્ત રહે છે. જો બોન્ડમાં રોકાણ કરવા ઇચ્છતાં ન હોય અને મિલકત ખરીદવા માંગો તો રહેઠાંણ માટેની મિલકત ખરીદો તો કેપિટલ ગેઇન ટેક્સ છૂટનો લાભ મેળવી શકો. ધ્યાન રાખજો કે રહેઠાંણની મિલકત આપને રિટર્ન ભરતાં પહેલાંના સમયમાં ખરીદવી પડશે. જો આપ આટલા સમયમાં મકાન ખરીદી ન કરી શકો તો મકાનના બુકિંગ અને બાંધકામના સમયની ગણતરી કરીને 3 વર્ષ સુધીનો સમય આપવામાં આવે છે. આ સમયમાં આપના નાણાંને કેપિટલ ગેઇન એકાઉન્ટ સ્કીમમાં ખાતુ ખોલાવીને પાર્ક કરી શકો છો.

સવાલઃ કેતન મેસ્વાણીયા - મારી જૂની મિલકત વેચીને બે વર્ષના સમયગાળામાં બીજી મિલકત ખરીદી છે આગામી કેટલાં વર્ષ કેપિટલ ગેઇન ટેક્સ અવોઇડ કરવા બીજી પ્રોપર્ટી ખરીદી ન શકે સાથે જ મિલકત વેચાણના કેપિટલ ગેઇન ટેક્સ માટે 3 વર્ષની ગણતરી કેવી રીતે થાય છે?

જવાબઃ આવકવેરાના કાયદાની કલમ 54 અને 54એફ બેમાંથી જે કલમ તમે લાભ લીધો હોય તે આધારે આપને ગણતરી કરવી જોઇએ. તમે જ્યારથી મકાનમાં રોકાણ અને પઝેશન મેળવ્યું હોય ત્યારથી માંડીને 3 વર્ષ માટે એ મકાન તમારે ધારણ કરવું જોઇએ. 3 વર્ષ પહેલાં જો આપ મકાનનું વેચાણ કરો તો તેના ઉપર આપને શોર્ટ ટર્મ કેપિટલ ગેઇન ટેક્સ ભરવાનો રહે.

સવાલઃ નવી પ્રોપર્ટી ખરીદી કરીને તેને ભાડે આપી શકાય કે નહીં?

જવાબઃ રહેઠાણનું મકાન ખરીદ્યા બાદ આવકવેરાના કાયદાની કલમ 54 અને 54એફ અંતર્ગત કરકપાતનો લાભ મેળવો છો તે મુજબ મકાન રહેઠાણનું જ હોવું જરૂરી છે. પરંતુ 3 વર્ષ દરમિયાન આપ જો તેને ભાડે આપો છો તો તેના ઉપર ભાડાની આવકનો કર ચૂકવવો પડી શકે છે પરંતુ લોંગ ટર્મ કેપિટલ ગેઇન ટેક્સ છૂટનો લાભ યથાવત રહે છે. ખાસ ધ્યાન રાખજો કે ઉપરોક્ત લાભ માટે મિલકત રહેઠાણની હોવી જરૂરી છે વ્યવસાયિક મિલકત ઉપર કર કપાતનો લાભ મળી શકશે નહીં.

સવાલઃ ફિરોઝ એન્જીનિયર - મારી પુત્રી 18 વર્ષ પૂર્ણ કરી રહી છે તો એ સંબંધી આ પ્રશ્નો છો. હું અને મારા પત્ની મારી પુત્રીને કેટલી રકમની ગિફ્ટ આપી શકે? એક વર્ષમાં આ ગિફ્ટ કેટલી વખત આપી શકાય? આવકવેરા રિટર્ન ભરવા સમયે ગિફ્ટ જે આપવામાં આવે છે તેના કોઇ પુરાવા રાખવા પડશે? ગિફ્ટ આપ્યા બાદ તે રકમનું રોકાણ કરે તો તેમાં તે અથવા તેમના પત્ની કો-હોલ્ડર તરીકે રહી શકે?  આ રોકાણ શેર્સ-સિક્યોરિટીઝ કે બોન્ડમાં કરી શકાય?  આ રોકાણમાંથી જે આવક ઉભી થાય છે તેના ઉપર તેની પુત્રીના નામે અલગથી એસેસમેન્ટ થશે કે તેને માતા-પિતાની આવક સાથે જોડવામાં આવશે?

જવાબઃ આપની પુત્રીની 18 વર્ષ પૂર્ણ કર્યા બાદ જે કોઇ આવક થાય તેનું ક્લબિંગ માતા-પિતાની આવક સાથે નહીં થાય. આવકવેરાના કાયદા હેઠળ ગિફ્ટ આપવા માટેની કોઇ મર્યાદા નથી અને વર્ષમાં ગમે તેટલી વખત ભેટ આપી શકે છે. ગિફ્ટ આપનાર તેનો ઉદ્દેશ્ય સ્પષ્ટ કરે અને ગિફ્ટ લેનાર તેનો સ્વીકાર કર્યો છે તેટલી જ વિગતનું લખાણ લેવાની જરૂર રહેશે. ગિફ્ટની રકમનું રોકાણ કોઇપણ સાધનમાં કરી શકાય છે. રોકાણ બાદની આવક બક્ષિસ લેનારની જ આવક ગણાશે.

સવાલઃ સુધીર પૂજારા - એચયુએફ અને તેના સહવારસ તરફથી એચયુએફને સમયાંતરે લોન આપવામાં આવે છે તો આ લોનમાંથી એક વ્યવસાયિક મિલકત ખરીદી તેને ભાડે આપે છે તો તેની ગણતરી કેવી રીતે કરવામાં આવે છે?

જવાબઃ એચયુએફના નામે લેવામાં આવેલી મિલકત અને તેમાંથી જે કોઇ ભાડાની આવક મળે તે એચયુએફની જ આવક ગણવામાં આવે. એચયુએફને વ્યાજે કે વગર વ્યાજે મેળવેલા નાણાં વાસ્તવિક લોન તરીકે મળ્યા છે તેનો પુરાવો રાખવો જરૂરી છે. જો આ લોન અનએક્સપ્લેન રહેશે તો તેને આવકવેરા કાયદા અંતર્ગત અનએક્સપ્લેન નાણાંકીય સ્ત્રોત તરીકે ગણવામાં આવશે.