ટેક્સ પ્લાનિંગ: મૂકેશ પટેલ સાથે ખાસ રજૂઆત

ના રોજ પ્રકાશિત Sat, 15, 2016 પર 14:36  |  સ્ત્રોત : CNBC-Bajar

આપણી પ્રાથમિક કરમુક્તિ અઢી થી ત્રણ લાખ રૂપિયાની છે. ત્યારબાદ 2.5થી 5 લાખ રૂપિયા ઉપર 10 ટકા, 5થી 10 લાખ રૂપિયાની આવક ઉપર 20 ટકા અને 10 લાખથી વધુની આવક ઉપર 30 ટકા કરવેરાની ગ્રેડિંગ કરવામાં આવી છે. વ્યક્તિગત સિવાય પરિવારની અન્ય વ્યક્તિઓને પણ ટેક્સ એન્ટીટી તરીકે આયોજન કરવું જોઇએ. વ્યક્તિગત સિવાય પરિવારના સભ્યમાં લગ્નસાથી, પુખ્ત વયના સંતાન અને એચયુએફ એક વધારાની એન્ટીટી તરીકે ટેક્સ રિટર્ન ભરવા જોઇએ. સગીર વયના બાળકો માટે ડિસક્રિશનરી ટ્રસ્ટ બનાવીને કરવેરા આયોજન કરી શકો છો.

ગુરૂચાવી નંબર બેમાં શક્ય હોય તેટલી કરમુક્તિ અને કરકપાત મળે છે તે મેળવવાનું આયોજન કરો. તમારી ગ્રોસ આવકમાંથી પ્રચલિત કપાતો જેવી કે 1.5 લાખ રૂપિયા  સુધીની કલમ 80C અંતર્ગત રોકાણ અને કપાતનું આયોજન. આ ઉપરાંત કલમ 80D અને 80E હેઠળ અનુક્રમે સ્વાસ્થ્ય અને શિક્ષણની કપાતનો લાભ લઇ શકો. જો એનપીએસમાં 50 હજાર રૂપિયા સુધીનું રોકાણ કરો તો કલમ 80Cની મર્યાદા 1.5 લાખથી વધીને 2 લાખ સુધીની રહેશે.


રોકાણ સંબંધિત કપાત નહીં પરંતુ કેટલીક આવક જેમ કે સેવિંગ બેન્ક એકાઉન્ટમાં વાર્ષિક 10 હજાર રૂપિયા સુધીની આવક ઉપર કપાત મળશે. જો લેખક હોય તો રોયલ્ટી કે પેટન્ટની આવક હોય  તો તેના ઉપર વિશિષ્ટ પ્રકારની કપાતનું આયોજન કરી શકો. પગારદાર વર્ગને મળતાં ભથ્થાનું આયોજન કરી શકો છો. સૌથી પ્રચલિત કરમુક્તિની વાત કરીએ તો ડિવિડન્ડ, લોંગ ટર્મ કેપિટલ ગેઇન, પીપીએફ અને ટેક્સ ફ્રી બોન્ડનું વ્યાજ કોઇપણ મર્યાદા વિના કરમુક્તિનો લાભ લઇ શકો છો. આ તમામના સંદર્ભમાં કરમુક્ત આવકનું યોગ્ય આયોજન કરો તે આપના કરવેરા આયોજનની ગુરૂચાવી રહેશે.

કલમ 10 હેઠળ પગારદાર વર્ગ માટે અનેક કરમુક્તિઓ છે. જેમાં એલટીએ, હાઉસ રેન્ટ એલાઉન્સ અને કન્વેયન્સ એલાઉન્સ છે. તેમજ કલમ 10 (14) હેઠળ વિશિષ્ટ કરમુક્તિના લાભ માટેના ભથ્થા છે. પગારદાર વર્ગને પ્રોફેશ્નલ ટેક્સની કપાતનો લાભ છે આ ઉપરાંત કેટલાંક કરમુક્ત ભથ્થા મળે છે. કલમ 80સી સાથે કરમુક્ત ભથ્થા અને કરમુક્ત એલાઉન્સના લાભ લે તો 6 લાખ રૂપિયાના પેકેજ સુધીમાં શૂન્ય ટેક્સ ભરવાનો રહે. નિવૃતિ સમયે મળતાં નાણાં જેવા કે ગ્રેચ્યુઇટી, લીવ એન્કેશમેન્ટ માટેનું પણ યોગ્ય આયોજન કરી શકાય.

પગાર બાદ આવકનો બીજો સ્ત્રોત મકાન મિલકતની આવક. સ્વ માલિકીની મિલકતની લોન ઉપર 2 લાખ રૂપિયા સુધીનું વ્યાજ ચૂકવતાં હોય તો તેના ઉપર કરકપાતનો લાભ મળે છે. ઉલ્લેખનીય છે કે આ લોન બેન્ક કે નાણાંકીય સંસ્થા નહીં પરંતુ વ્યક્તિ પાસેથી લીધેલી લોન ઉપર પણ વ્યાજની ચૂકવણીનો કરકપાતનો લાભ મળે છે. કલમ 80C હેઠળ બેન્ક કે અન્ય નાણાંકીય સંસ્થા પાસેથી લોન લીધેલી હોય તો આ લોન ઉપર ચૂકવવામાં આવતી મૂડીની ભરપાઇ ઉપર કરમુક્તિનો લાભ મળે છે. ભાડે આપેલી મકાન મિલકત ઉપરની આવક 30 ટકા સ્ટાન્ડર્ડ ડિડ્કશનનો લાભ મળે છે.


ત્રીજું શિર્ષક છે ધંધા-વ્યવસાયની આવક. ધંધા-વ્યવસાયની જરૂરીયાત માટે જે ખર્ચ કરવામાં આવ્યા હોય તેના ઉપર કરવેરા કપાતનો લાભ મળી શકે છે. આ ઉપરાંત નોશનલ કપાત તરીકે ઘસારાનો લાભ મળે છે જેમાં મશીનરી, ધંધા-વ્યવસાય માટે ખરીદેલા વાહન ઉપર ઘસારાનો લાભ મળે છે. ચોથું શિર્ષક છે મૂડીનફાની આવક.


લાંબાગાળાનો નફો એક કે ત્રણ વર્ષ માટે કન્સેશનલ ટેક્સ ગણવામાં આવે છે. મકાન મિલકતના લાંબાગાળાના નફામાં ઇન્ડેક્સેશનનો લાભ મળી શકે છે. ઘર સામે ઘર લેવા માંગતા હોય તેમજ અન્ય કોઇ મિલકત વેચીને ઘર ખરીદવા માંગતા હોવ તો તેમાં પણ મૂડીનફાની સંપૂર્ણ કરમુક્તિનો લાભ લઇ શકો છો. પાંચમું શિર્ષક છે અન્ય સ્ત્રોત. અન્ય આવક કમાવવા માટે કરવામાં આવેલ તમામ ખર્ચ ઉપર કર કપાતનો લાભ મળે છે.

આવકવેરા કાયદા હેઠળ ક્લબિંગ પ્રોવિઝનને ધ્યાનમાં રાખવાની રહેશે. ધારો કે પતિ તેની 50 લાખ રૂપિયાની આવક પત્નીને ગિફ્ટ તરીકે આપે છે પરંતુ આવકવેરા કાયદા અનુસાર પત્નીને આપવામાં આવેલી ગિફ્ટમાંથી ઉદ્દભવતી આવક ક્લબિંગ ઓફ ઇન્કમ તરીકે પતિની આવકમાં પણ ઉમેરાશે. આ પ્રકારની ગિફ્ટ એચયુએફ, સગીર વયના સંતાનો કે પુત્રવધૂને આપી હોય તો તે ભેટ ઉપર ઉદ્દભવતી આવક ક્લબિંગ પ્રોવિઝન અંતર્ગત આવકમાં ઉમેરાશે. એચયુએફમાં આવક ઉભી કરવા માટે ભેટ આપવાને બદલે વ્યાજ વગરની લોન આપવામાં આવે તો તેમાં કલબિંગનું પ્રોવિઝન લાગુ પડશે નહીં.