કુમાર મંગલમ બિડલા ફરી સંભાળશે વોડાફોન આઈડિયાની કમાન: શું દેવાના ડુંગર નીચે દબાયેલી કંપની ઉગરી શકશે?

Kumar Mangalam Birla: ભારતીય ટેલિકોમ ક્ષેત્રના મોટા સમાચાર સામે આવ્યા છે. જાણીતા ઉદ્યોગપતિ કુમાર મંગલમ બિડલા ફરી એકવાર દેવામાં ડૂબેલી કંપની વોડાફોન આઈડિયા (Vi)ની કમાન સંભાળવા જઈ રહ્યા છે. કંપનીએ તેમને નોન-એક્ઝિક્યુટિવ ચેરમેન તરીકે નિયુક્ત કર્યા છે, જેની અસર 5 મે 2026 થી જોવા મળશે.

રવિંદર ટક્કરની જગ્યા લેશે બિડલા

રેગ્યુલેટરી ફાઈલિંગ અનુસાર, કુમાર મંગલમ બિડલા અત્યારના ચેરમેન રવિંદર ટક્કરનું સ્થાન લેશે. જોકે, રવિંદર ટક્કર કંપની સાથે જોડાયેલા રહેશે અને હવે તેઓ નોન-એક્ઝિક્યુટિવ વાઈસ ચેરમેન તરીકે ભૂમિકા ભજવશે. આ ફેરફાર કંપનીના ટ્રાન્ઝિશન પિરિયડમાં મદદરૂપ થશે તેવું માનવામાં આવી રહ્યું છે. રોકાણકારો માટે આ એક પોઝિટિવ સંકેત હોઈ શકે છે, પરંતુ બિડલા માટે રસ્તો આસાન નથી.

કંપની સામેના મોટા પડકારો

AGR બાકી રકમ: 2019માં સુપ્રીમ કોર્ટના AGR (Adjusted Gross Revenue) ના નિર્ણય બાદ કંપની પર આશરે 53,000 કરોડનું ભારણ આવ્યું હતું.

ભીષણ સ્પર્ધા: મુકેશ અંબાણીની રિલાયન્સ જિયો (Reliance Jio) ના સસ્તા ડેટા અને ફ્રી કોલિંગ પ્લાન્સે વોડાફોન આઈડિયાના માર્કેટ શેર પર મોટી અસર પાડી છે.

નેગેટિવ નેટવર્થ: ડિસેમ્બર 2025 સુધીના નવ મહિનામાં કંપનીને 17,418 કરોડનું મોટું નુકસાન થયું છે અને તેની નેટવર્થ ઘટીને માઈનસ (-) 87,744 કરોડ પર પહોંચી ગઈ છે.

સરકારી રાહત છતાં ચિંતા યથાવત

સરકાર તરફથી કંપનીને થોડી રાહત ચોક્કસ મળી છે. AGR બાકી રકમનું પુનર્મૂલ્યાંકન કરીને તેને 87,695 કરોડથી ઘટાડીને 64,046 કરોડ કરવામાં આવી છે. જોકે, બજારના નિષ્ણાતો માને છે કે આ રાહત અપેક્ષા કરતા ઓછી છે. IIFL કેપિટલના જણાવ્યા અનુસાર, જો વ્યાજ અને પેનલ્ટીમાં વધુ છૂટ મળી હોત તો કંપનીને મોટી રાહત મળી શકત.

હપ્તાઓનું ભારણ અને ભવિષ્યનું આયોજન

વોડાફોન આઈડિયાએ આગામી વર્ષોમાં મોટી રકમની ચુકવણી કરવાની છે:

FY2031-32 થી FY2034-35 સુધી: દર વર્ષે ઓછામાં ઓછા 100 કરોડ ચૂકવવાના રહેશે.

FY2035-36 થી FY2040-41 સુધી: દર વર્ષે 10,608 કરોડનો મોટો હપ્તો આપવો પડશે.

સ્પેક્ટ્રમ બાકી રકમ: BofA ગ્લોબલ રિસર્ચ મુજબ, આગામી ત્રણ વર્ષમાં કંપનીએ અંદાજે 49,000 કરોડ ચૂકવવા પડશે.

કુમાર મંગલમ બિડલાની વાપસીથી બજારમાં ચોક્કસ ઉત્સાહ જોવા મળી રહ્યો છે, પરંતુ આંકડાઓ સ્પષ્ટ કરે છે કે વોડાફોન આઈડિયા હજુ પણ મુશ્કેલીઓમાંથી બહાર આવી નથી. અબજો રૂપિયાનું દેવું અને સતત થતા નુકસાન વચ્ચે કંપનીને ફરીથી બેઠી કરવી એ બિડલા માટે ‘અગ્નિપરીક્ષા’ સમાન સાબિત થશે. શું તેમની રણનીતિ કંપનીને ફરીથી ટેલિકોમ માર્કેટમાં મજબૂત કરી શકશે? તે જોવું રસપ્રદ રહેશે.

આ પણ વાંચો-Raymond Realtyના શેરમાં 18%નો તોફાની ઉછાળો: પ્રી-સેલ્સ બમણું થતા રોકાણકારો ગેલમાં, જાણો શું છે નવો ટાર્ગેટ?