કોમોડિટી લાઈવ: ક્રૂડમાં દબાણ, બ્રેન્ટ $85ની નીચે, સોના-ચાંદીમાં વોલેટાઈલ કારોબાર

FOMCની મિનિટ્સ પહેલા સોનામાં નીચલા સ્તરેથી રિકવરી જોવા મળ્યા, જ્યાં COMEX પર ભાવ 1902 ડૉલરના સ્તરની પાસે રહ્યા, તો સ્થાનિક બજારમાં ₹58,845ના સ્તની આસપાસ કારોબાર જોવા મળી રહ્યો છે. આ સાથે જ USમાં જુલાઈમાં રિટેલ વેચાણ અનુમાન કરતા વધારે રહેતા સોનાની કિંમતો પર અસર દેખાઈ, તો બીજી બાજું જેમ્સ એન્ડ જ્વેલરી એક્સપોર્ટ પ્રમોશન કાઉન્સિલના આંકડાઓ મુજબ ભારતમાં જુલાઈમાં જેમ્સ એન્ડ જ્વેલરી એક્સપોર્ટ YoY ધોરણે 33.1% ઘટી 1.68 બિલિયન ડૉલર પર રહ્યો, તો ઇમ્પોર્ટ 36% ઘટીને 1.69 બિલિયન ડૉલર પર પહોંચતો દેખાયો છે.

સોનાને પગલે ચાંદીમાં પણ ઉપલા સ્તરેથી દબાણ આવતા ઉતાર-ચઢાવ સાથેનો કારોબાર નોંધાયો, અહીં વૈશ્વિક બજારમાં કિંમતો 23 ડૉલરની નીચે યથાવત્ છે, તો સ્થાનિક બજારમાં ₹69,895ના સ્તરની આસપાસ કારોબાર જોવા મળી રહ્યો છે.

ક્રૂડ ઓઇલમાં રાતોરાત 2%નો ઘટાડો આવતા બ્રેન્ટમાં 85 ડૉલરની નીચે કારોબાર જોવા મળ્યો, ચાઈનાના રિટેલ વેચાણ આંકડા નબળા રહેતા અને ચાઈનાની સેન્ટ્ર બેન્કોએ કી લેડિંગ રેટ ઘટાડ્યો હોવાથી ક્રૂડની કિંમતો પર અસર જોવા મળી. ઉલ્લેખનિય છે કે છેલ્લા 7 સપ્તાહમાં ક્રૂડમાં લગભગ 20%નો વધારો નોંધાઈ ચુક્યો છે. પણ ત્યાર બાદ હવે ઉપલા સ્તરેથી ઘટાડો આવતા NYMEX ક્રૂડમાં પણ 81 ડૉલરની નીચે કિંમતો પહોંચતી દેખાઈ રહી છે.

શરૂઆતી કારોબારમાં સ્થાનિક બજારમાં નેચરલ ગેસમાં લગભગ 4 ટકાની લોઅર સર્કિટ લાગતા કિંમતો 221ના સ્તરની આસપાસ પહોંચતી દેખાઈ.

નજર કરીએ એગ્રી કૉમોડિટીના કારોબાર પર તો, ગુવારગમમાં લગભગ દોઢ ટકા જેટલી તેજી યથાવત્ રહેતી દેખાઈ, જ્યારે મસાલા પેકમાં જીરા, ધાણા અને હળદરમાં નરમાશ છે, જેમાં હળદરમાં સૌથી વધારે 2 ટકાથી વધુનો ઘટાડો દેખાઈ રહ્યો છે..પણ એરંડામાં લગભગ અડધા ટકાથી વધુની તેજી રહી, તો કપાસિયા ખોળમાં પણ અડધા ટકાથી વધુની મજબૂતી સાથેનો કારોબાર થઈ રહ્યો છે.