ભારતમાં ગૂગલ એન્ડ્રોઇડના લાયસન્સની શરતોમાં કરશે ફેરફાર, યુઝર્સને સિલેક્શનનો મળશે ઓપ્શન

વેટરન અમેરિકન ટેક કંપની ગૂગલ (Google) એ બુધવારે, 25 જાન્યુઆરીએ જણાવ્યું હતું કે, તે ભારતના કોમ્પિટિશન કમિશન (CCI)ના નિર્દેશો અનુસાર તેના પ્લેટફોર્મ અને બિઝનેસમાં ઘણા ફેરફારો કરી રહી છે. CCIના આદેશ સામે કોર્ટમાંથી કોઈ રાહત ન મળતા કંપનીએ આ પગલું ભર્યું છે. સીસીઆઈએ ગૂગલને તેના એન્ડ્રોઈડ અને પ્લે સ્ટોર પ્લેટફોર્મમાં કેટલાક ફેરફાર કરવાનો નિર્દેશ આપ્યો છે. આ ફેરફારો પછી, સ્માર્ટફોન નિર્માતાઓને તેમના હેન્ડસેટમાં પ્રી-ઇન્સ્ટોલેશન માટે અલગ-અલગ Google એપ્સ માટે અલગ-અલગ લાયસન્સ લેવાની સ્વતંત્રતા મળશે.

ઉપરાંત, ભારતીય યુઝર્સને હવે પોતાનું ડિફોલ્ટ સર્ચ એન્જિન પસંદ કરવાનો મોકો મળશે. જ્યારે પણ યુઝર્સ નવો સ્માર્ટફોન અથવા ટેબલેટ ચાલુ કરે છે, ત્યારે તેમની પાસે આ ડિફોલ્ટ સર્ચ એન્જિન પસંદ કરવાનો ઓપ્શન હશે.

સુપ્રીમ કોર્ટે ગયા અઠવાડિયે CCIના આદેશ પર સ્ટે આપવાનો ઇનકાર કર્યો હતો. ઓર્ડર હેઠળ, ગૂગલને તેની પોપ્યુલર ઓપરેટિંગ સિસ્ટમ “એન્ડ્રોઇડ”ની મોનોપોલી સ્થિતિનો દુરુપયોગ કરવા બદલ રૂ. 1,337.76 કરોડનો દંડ ફટકારવામાં આવ્યો હતો. એક અનુમાન મુજબ, દેશમાં લગભગ 600 મિલિયન સ્માર્ટફોનનો ઉપયોગ થઈ રહ્યો છે, જેમાંથી લગભગ 97 ટકા “Android” ઓપરેટિંગ સિસ્ટમ પર ચાલે છે.

CCIએ “Play Store” સંબંધિત કેટલીક નીતિઓ માટે Google પર 936 કરોડ રૂપિયાનો દંડ પણ લગાવ્યો છે.
ગૂગલે એક બ્લોગમાં લખ્યું, "અમે ભારતમાં સ્થાનિક કાયદા અને નિયમોનું ગંભીરતાથી પાલન કરવાની અમારી પ્રતિબદ્ધતાને પુનરોચ્ચાર કરીએ છીએ. એન્ડ્રોઇડ અને પ્લે સ્ટોર અંગે કોમ્પિટિશન કમિશન દ્વારા આપવામાં આવેલી તાજેતરની સૂચનાઓનું પાલન કરવા માટે ઘણા ફેરફારો કરવામાં આવ્યા છે. અમે CCIને જણાવ્યું છે કે કેવી રીતે અમે તેમના નિર્દેશોનું પાલન કરીશું."

આ પણ વાંચો - આઉટલુક અને ટીમ્સ જેવી માઇક્રોસોફ્ટની સર્વિસ થઇ ઠપ, ભારત સહિત વિશ્વભરના યુઝર્સને અસર