બેન્કને સુપ્રીમ કોર્ટમાંથી મળી રાહત, બોમ્બે હાઈકોર્ટના નિર્ણય પર લંબાવ્યો સ્ટે, સમજો આખો મામલો

Yes Bank AT1 bonds Case: આજે સુપ્રીમ કોર્ટે ખાનગી ક્ષેત્રની દિગ્ગજ બેન્ક યસ બેન્કને હજુ થોડા દિવસો માટે રાહત આપી છે. સુપ્રીમ કોર્ટે એડિશનલ ટાયર 1 (AT1) બોન્ડના કેસમાં બોમ્બે હાઈકોર્ટના નિર્ણય પર રોક લગાવી છે. 20 જાન્યુઆરીના રોજ, બોમ્બે હાઈકોર્ટે યસ બેન્કના નિર્ણયને રદ કર્યો હતો જેના હેઠળ માર્ચ 2020 માં, બેંકે 8415 કરોડ રૂપિયાના AT1 બોન્ડનું મૂલ્ય શૂન્ય કરી દીધું હતું. જોકે હાઈકોર્ટે પણ આ નિર્ણય સામે અપીલ કરવા માટે છ સપ્તાહનો સમય આપ્યો હતો.

આ પછી બેંકે સુપ્રીમ કોર્ટમાં અરજી દાખલ કરી અને હાઈકોર્ટના આદેશ પર સ્ટે વધુ થોડા સમય માટે લંબાવવામાં આવ્યો. આ મામલે હજુ સુનાવણી થવાની છે અને ત્યાર બાદ જ સુપ્રીમ કોર્ટ પોતાનો ચુકાદો સંભળાવી શકે છે.

બોન્ડ ધારકોનો પક્ષ પણ સાંભળશે સુપ્રીમ કોર્ટ

સુપ્રીમ કોર્ટે યસ બેન્કની અરજી પર AT1 બોન્ડના મૂલ્યને શૂન્ય કરવાના બોમ્બે હાઈકોર્ટના નિર્ણય પરના સ્ટેને વધુ લંબાવ્યો છે. ચીફ જસ્ટિસ ડીવાય ચંદ્રચુડની આગેવાની હેઠળની સુપ્રીમ કોર્ટની બેંચે યસ બેન્કની અરજી પર બોન્ડ ધારકો પાસેથી જવાબ પણ માંગ્યો છે. આ મામલાની આગામી સુનાવણી માર્ચના અંતિમ સપ્તાહમાં થઈ શકે છે.

છેતરપિંડી, નાણાકીય અનિયમિતતા અને એનપીએના બોજથી દબાયેલી યસ બેન્ક પતનની આરે હતી. ત્યારે કેન્દ્રીય બેન્કના નિર્દેશ પર બેન્કોનું એક જૂથ તેને બચાવવા માટે આગળ આવ્યું છે. બેન્કને બચાવવાની યોજનાના ભાગરૂપે, એક નવા મેનેજમેન્ટ અને બોર્ડની રચના કરવામાં આવી હતી અને આરબીઆઈએ માર્ચ 2020 માં યસ બેન્કને મોરેટોરિયમ હેઠળ મૂકી હતી. પુનર્નિર્માણ યોજના હેઠળ, બેન્કના AT1 બોન્ડનું અવમૂલ્યન શૂન્ય કરવામાં આવ્યું હતું.

આ પણ વાંચો - આ લોકો માટે PAN સાથે આધાર લિંક કરાવવું નથી ફરજિયાત, જાણો તમે પણ આ કેટેગરીમાં સામેલ છો કે નહીં

ત્યારબાદ બોન્ડધારકોએ બેન્ક પર આરોપ લગાવ્યો કે તે તેમને સુપર એફડી તરીકે વેચવામાં આવી હતી જે વધુ વળતર મેળવશે અને પૈસા પણ સુરક્ષિત રાખશે. માર્કેટ રેગ્યુલેટર સેબીને પણ તેની તપાસમાં બોન્ડધારકોનો દાવો સાચો લાગ્યો હતો. સેબીની તપાસમાં બહાર આવ્યું છે કે બેંકે તેને સુપર એફડી અને એફડી જેવા સલામત સાધન તરીકે રજૂ કર્યું હતું. બોન્ડધારકો મામલો બોમ્બે હાઈકોર્ટમાં લઈ ગયા, જ્યાં તેણે આ બોન્ડની કિંમત શૂન્ય કરવા સામે ચુકાદો આપ્યો.