વિશ્વ બેંકે મોટા ભાગના દેશોના GDP ગ્રોથનું ઘટાડ્યું અનુમાન,-“નવો ઝટકો અને મંદીમાં ધકેલાશે વિશ્વ”

વિશ્વ બેંકે તેના તાજેતરના અંદાજમાં વિશ્વના મોટાભાગના દેશોના આર્થિક વિકાસ દરમાં ઘટાડો કર્યો છે. સાથે ચેતવણી આપી હતી કે અર્થવ્યવસ્થાના લેવલે કોઈપણ નવો આંચકો વૈશ્વિક અર્થતંત્રમાં મંદી તરફ દોરી શકે છે. વિશ્વ બેંકે વર્ષ 2023માં વૈશ્વિક જીડીપીની ગતિ 1.7 ટકા રહેવાનું અનુમાન કર્યું છે. આ હજુ પણ જૂન મહિનામાં તેના અંદાજ કરતાં અડધો છે. જો આવું થાય છે, તો તે છેલ્લા 3 દાયકામાં ત્રીજું સૌથી ખરાબ પ્રદર્શન કરનાર વર્ષ હશે. અગાઉ 2009 અને 2020માં પણ વૈશ્વિક અર્થતંત્રમાં સંકોચન જોવા મળ્યું હતું.

સતત ઊંચા ફુગાવા અને વ્યાજ દરોને આભારી વિશ્વ બેંકે 2024 માટે તેના વિકાસના અનુમાનમાં પણ ઘટાડો કર્યો છે. તેણે યુક્રેન પર રશિયાના આક્રમણ અને રોકાણમાં ઘટાડાની અસરનો પણ ઉલ્લેખ કર્યો છે.

વિશ્વ બેંકના પ્રમુખ ડેવિડ માલપાસે બેંકના અર્ધવાર્ષિક ગ્લોબલ ઇકોનોમિક પ્રોસ્પેક્ટ્સ રિપોર્ટના પ્રસ્તાવનામાં લખ્યું હતું કે "વૃદ્ધિની કટોકટી ઊંડી થઈ ગઈ છે" અને વૈશ્વિક સમૃદ્ધિને આંચકાઓ ચાલુ રહેશે. તેમણે કહ્યું કે વિકાસશીલ અને ઉભરતા દેશોની જીડીપી વૃદ્ધિ પ્રી-કોરોના અંદાજ કરતાં લગભગ 6 ટકા ઓછી હશે.

વિશ્વ બેંકે આ વર્ષે અમેરિકન જીડીપીમાં માત્ર 0.5 ટકા વૃદ્ધિની આગાહી કરી છે. જોકે તે મંદીમાંથી બચી જશે. વિશ્વ બેંકે કહ્યું કે અમેરિકામાં વ્યાજદરમાં તીવ્ર વધારાને કારણે આ વર્ષે માંગ પર અસર થવાની છે. તેનાથી કંપનીઓની કમાણી અને ગ્રાહકોના ખિસ્સા પર અસર થશે. વર્લ્ડ બેંકનો આ રિપોર્ટ એવા સમયે આવ્યો છે જ્યારે અમેરિકાની સેન્ટ્રલ બેંક વ્યાજ દરો પર બેઠક યોજવાની છે.

આ પહેલા ડિસેમ્બરમાં વર્લ્ડ બેંકે એક રિપોર્ટમાં FY2023માં ભારતનો GDP ગ્રોથ 6.9 ટકા રહેવાનો અંદાજ મૂક્યો હતો. જો કે, 2024 માટે, તેમણે ભારતનો જીડીપી વૃદ્ધિ દર થોડો ઓછો 6.6 ટકા રહેવાનો અંદાજ મૂક્યો હતો.