બજાર » સમાચાર » બજાર

LRD પરીક્ષા મામલે સરકારનો મોટો નિર્ણય

ના રોજ પ્રકાશિત Mon, 17, 2020 પર 16:43  |  સ્ત્રોત : CNBC-Bajar

વિવાદિત પરિપત્ર મુદ્દે અનામતને લઈને ગૂંચવાયેલું કોકડૂં ઉકેલવા સરકારે એક મોટો નિર્ણય લીધો. સરકારે પહેલી ઓગસ્ટ 2018ના એ પરિપત્રને હાલ અભેરાઈએ ચઢાવીને બેઠકોની સંખ્યામાં વધારો કર્યો.


અનામત વર્ગ અને બિન અનામત વર્ગના આંદોલનકારીઓ સાથે બેઠક બાદ નાયબ મુખ્યમંત્રી નીતિન પટેલ, શિક્ષણ મંત્રી ભૂપેન્દ્રસિંહ ચુડાસમા, મહેસૂલ મંત્રી કૌશિક પટેલ એક સાથે મીડિયા સમક્ષ આવ્યા અને જાહેરાત કરી કે GADના પહેલી ઓગસ્ટ 2018ના પરિપત્રને અલગ રાખીને સરકારે એવો નિર્ણય કર્યો છે કે 62.5 ટકા ગુણ આવ્યા હશે એવી તમામ મહિલા LRD ઉમેદવારોની ભરતી કરાશે.


સાથે જ સરકારે ભરતી કરવાની થતી બેઠકોની સંખ્યામાં પણ તોતીંગ વધારો કર્યો. આ નવી ફોર્મ્યુલા પ્રમાણે જનરલ કેટેગરીમાં જે 421 બહેનોની ભરતી કરવાની હતી તેના બદલે હવે 880 બહેનોની પસંદગી થશે. ઓબીસી કેટેગરીમાં 1834 જગ્યાથી વધારીને 3248 બેઠકો કરાઈ. તો એસસીમાં 346ના સ્થાને હવે 588 જગ્યાઓ રહેશે. અને એસટી કેટેગરી માટે બેઠકોની સંખ્યા 476થી વધારીને 511 કરાઈ છે.


અનામત વર્ગની મહિલાઓ છેલ્લા 69 દિવસથી વિવાદિત પરિપત્ર રદ કરવાની માગ સાથે ગાંધીનગરની સત્યાગ્રહ છાવણી ખાતે આંદોલન કરી રહી છે. તો પરિપત્ર રદ ન કરવાની માગ સાથે બિન અનામતવર્ગની મહિલા ઉમેદવારો 5 દિવસથી આંદોલન ચલાવી રહી છે. આ વિવાદને ઉકેલવા સરકારે નવી ફોર્મ્યુલા અજમાવી. જો કે, અનામત વર્ગની આંદોલનકારી મહિલા ઉમેદવારો હજુ પણ તેનાથી નાખૂશ જણાઈ.


LRD પ્રકરણ અંગે મુખ્યમંત્રી વિજય રૂપાણીએ નિવેદન આપ્યું છે. તેમણે કહ્યું કે સરકારનો આ નિર્ણય દરેક વર્ગની દીકરીઓ માટેનો નિર્ણય છે અને આ નિર્ણયથી વધુ નોકરીઓ મળશે.