BBCની દિલ્હી અને મુંબઈ ઓફિસમાં ઇન્કમ ટેક્સના દરોડા, તમામ કર્મચારીઓના ફોન જપ્ત

ઇન્કમ ટેક્સ વિભાગે વિશ્વની સૌથી પ્રતિષ્ઠિત આંતરરાષ્ટ્રીય મીડિયા સંસ્થાઓમાંથી એક બ્રિટિશ બ્રોડકાસ્ટિંગ કોર્પોરેશન (BBC)ની દિલ્હી અને મુંબઈ ઓફિસ પર દરોડા પાડ્યા છે. જો કે, બિનસત્તાવાર રીતે એવું કહેવામાં આવી રહ્યું છે કે આ કોઈ દરોડો નથી પરંતુ એક પ્રકારની ચેકિંગ પ્રોસેસ છે. કર્મચારીઓનું કહેવું છે કે તેમના ફોન જપ્ત કરવામાં આવ્યા છે અને ઘરે જવા માટે કહેવામાં આવ્યું છે. સમાચાર એજન્સી પીટીઆઈના જણાવ્યા અનુસાર ઇન્કમ ટેક્સ વિભાગની ટીમો દિલ્હી અને મુંબઈમાં BBCની ઓફિસમાં સર્વે કરી રહી છે.

રાજધાની દિલ્હીમાં BBCની ઓફિસ કેજી માર્ગ પર આવેલી છે. કહેવામાં આવી રહ્યું છે કે ઓફિસને સંપૂર્ણ રીતે સીલ કરી દેવામાં આવી છે. આ સાથે તમામ કર્મચારીઓના મોબાઈલ ફોન જપ્ત કરવામાં આવ્યા છે. સૂત્રોના જણાવ્યા અનુસાર BBCના તમામ કર્મચારીઓના ફોન જપ્ત કરવામાં આવ્યા છે.

કહેવામાં આવી રહ્યું છે કે કર્મચારીઓને ઓફિસ છોડીને ઘરે જવા માટે કહેવામાં આવ્યું છે. લંડનમાં BBC ઓફિસમાં દરોડા અંગે માહિતી આપવામાં આવી છે. જો કે, હજુ સુધી આ અંગે ઇન્કમ ટેક્સ વિભાગ અથવા BBC દ્વારા કોઈ માહિતી આપવામાં આવી નથી.

દરમિયાન આ દરોડાને લઈને રાજકારણ પણ શરૂ થઈ ગયું છે. કોંગ્રેસે ઇન્કમ ટેક્સ વિભાગની આ કાર્યવાહીને BBC ડોક્યુમેન્ટ્રી પર પ્રતિબંધ સાથે જોડી દીધી છે. કોંગ્રેસે ટ્વીટ કર્યું, "પહેલા BBC ડોક્યુમેન્ટરી આવી, તેના પર પ્રતિબંધ મુકાયો. હવે BBC પર આઈટીના દરોડા અઘોષિત ઈમરજન્સી."

કેન્દ્ર સરકારે BBCની આ ડોક્યુમેન્ટરીને પ્રચાર ગણાવીને ભારતમાં પ્રદર્શિત કરવા પર પ્રતિબંધ મૂક્યો હતો. આ અંગે સુપ્રીમ કોર્ટમાં અરજીઓ પણ દાખલ કરવામાં આવી છે. આવી સ્થિતિમાં, વિપક્ષ ઇન્કમ ટેક્સ વિભાગના દરોડાને BBCની ડોક્યુમેન્ટ્રી સાથે જોડીને કેન્દ્ર સરકાર પર નિશાન સાધી રહ્યું છે.

આ પણ વાંચો - રુપિયામાં ટ્રેડના ભારતના પ્લાને લાગ્યું ગ્રહણ, રશિયા પાસેથી ઓઇલ ખરીદવામાં ક્યાં આવી રહી છે અડચણ