Coforge Share Price: IT શેરોમાં તેજીની આંધી, કોફોર્જના શેરમાં 6%થી વધુનો ઉછાળો, જાણો બ્રોકરેજ ફર્મ CLSAનો નવો ટાર્ગેટ

Coforge Share Price: આજે શેરબજારમાં IT શેરોનો જબરદસ્ત દબદબો જોવા મળી રહ્યો છે. માર્કેટ ખુલતાની સાથે જ નિફ્ટીમાં આશરે 85 પોઈન્ટનો ઉછાળો આવ્યો છે અને તે 23700 ની સપાટી પાર કરી ગયો છે. બેંક નિફ્ટી ભલે આજે ફ્લેટ જોવા મળી રહ્યો હોય, પરંતુ મિડકેપ અને સ્મોલકેપ શેરોમાં રોકાણકારો દ્વારા જોરદાર ખરીદી ચાલી રહી છે. બજારમાં અસ્થિરતા દર્શાવતો ઈન્ડેક્સ INDIA VIX પણ 6% જેટલો નીચે આવ્યો છે, જેનાથી શેરબજારમાં પૈસા રોકનારાઓને મોટી રાહત મળી છે. IT શેરોની આ શાનદાર તેજીને કારણે નિફ્ટી IT ઈન્ડેક્સ લગભગ 4% જેટલો ઉછળ્યો છે. ઇન્ફોસિસ, પર્સિસ્ટન્ટ અને કોફોર્જ (Coforge) જેવા દિગ્ગજ શેરો 6% થી વધુ દોડ્યા છે. ખાસ વાત એ છે કે વાયદા બજારના ટોપ 5 ગેનર્સમાં માત્ર IT કંપનીઓ જ સામેલ છે.

કોફોર્જ (Coforge)ના શેરમાં જંગી ઉછાળો

IT ઈન્ડેક્સની આ તેજીમાં સૌથી મોટો ફાળો કોફોર્જ કંપનીનો છે. બપોરે 12.30 વાગ્યાની આસપાસ નેશનલ સ્ટોક એક્સચેન્જ (NSE) પર આ શેર 88.60 રૂપિયા (એટલે કે 6.57%) ના ઉછાળા સાથે 1437 રૂપિયાની આસપાસ ટ્રેડ થઈ રહ્યો હતો.

શેરની આજની સ્થિતિ પર એક નજર:

* આજનો લો (Low): 1,360.30 રૂપિયા

* 52 વીક હાઈ: 1,994 રૂપિયા

* 52 વીક લો: 1,008.10 રૂપિયા

* ગઈકાલે આ શેર 1,348.10 રૂપિયા પર બંધ થયો હતો, જ્યારે આજે તે 1,365 રૂપિયાના ભાવે ખુલ્યો હતો. આ સ્ટોકનું વોલ્યુમ 5,826,972 શેરની આસપાસ નોંધાયું છે.

બ્રોકરેજ ફર્મ CLSA નો નવો ટાર્ગેટ અને રેટિંગ

ગ્લોબલ બ્રોકરેજ ફર્મ CLSA એ કોફોર્જ માટે રોકાણકારોને ખુશ કરી દે તેવી જાહેરાત કરી છે. તેમણે આ શેરને ‘હાઈ કન્વિક્શન આઉટપરફોર્મ' રેટિંગ આપ્યું છે અને ભવિષ્ય માટે 2,075 રૂપિયા પ્રતિ શેરનો નવો ટાર્ગેટ આપ્યો છે.

CLSAના મતે કંપનીના ગ્રોથના મુખ્ય કારણોમાં કંપનીના મેનેજમેન્ટનું શાનદાર કામ આગળ પણ ચાલુ રહેવાની આશા છે. ઓછા નફાવાળા (Low margin) સરકારી પ્રોજેક્ટ્સમાંથી બહાર નીકળવાનો નિર્ણય કંપની માટે ફાયદાકારક સાબિત થશે. કંપની પાસે રહેલા ફ્રી કેશથી તેમના ચોખ્ખા નફાને મોટો સપોર્ટ મળશે. નાણાકીય વર્ષ 2027 (FY27)માં EPS (અર્નિંગ પર શેર)નો અંદાજ 9% અને FY28માં 5% વધારવામાં આવ્યો છે. કંપનીને આર્ટિફિશિયલ ઈન્ટેલિજન્સ (AI) સેક્ટરથી સૌથી મોટો ફાયદો થવાની સંભાવના છે અને તેમની ઓર્ડર બુક પણ ખૂબ જ મજબૂત છે.

કોફોર્જ શેરની અત્યાર સુધીની સફર

આ શેરના વળતરની વાત કરીએ તો, છેલ્લા 1 અઠવાડિયામાં આ શેરમાં 8.14% અને 1 મહિનામાં 8.46%ની તેજી જોવા મળી છે. જોકે, આ વર્ષની શરૂઆતથી અત્યાર સુધીમાં શેરમાં 14.15%નો ઘટાડો નોંધાયો છે. 1 વર્ષમાં આ શેરે 13.82%નું નુકસાન કરાવ્યું છે. પરંતુ જો 3 વર્ષનો ચાર્ટ જોઈએ તો આ શેરે રોકાણકારોને 67.01% નું શાનદાર રિટર્ન આપ્યું છે.

શા માટે IT શેરોમાં તાજેતરમાં કડાકો બોલ્યો હતો?

છેલ્લા કેટલાક દિવસોથી ભલે IT શેરોમાં રિકવરી દેખાઈ રહી હોય, પરંતુ તાજેતરમાં આ સેક્ટરમાં ભારે વેચવાલી જોવા મળી હતી. Anthropic ના ‘Claude Code' અને OpenAI દ્વારા લોન્ચ કરવામાં આવેલા નવા AI ટૂલ્સને કારણે માર્કેટમાં જબરદસ્ત હલચલ મચી ગઈ હતી. આ ટેક્નોલોજીકલ બદલાવના કારણે આ વર્ષે જાન્યુઆરીથી અત્યાર સુધીમાં IT ઈન્ડેક્સ 22% થી વધુ તૂટ્યો હતો.

રોકાણકારોમાં એ વાતનો સતત ડર રહેલો છે કે જનરેટિવ AI ના ઝડપી વિકાસને કારણે જૂની પરંપરાગત IT સેવાઓ અને પ્રોફેશનલ સર્વિસની માંગ ઘટી શકે છે. જોકે, કોફોર્જ જેવી કંપનીઓ હવે AI નો જ ઉપયોગ કરીને પોતાના માર્જિન વધારવા તરફ આગળ વધી રહી છે, જે માર્કેટ માટે એક સકારાત્મક સંકેત છે.

આ પણ વાંચો- ગૌતમ અદાણીને અમેરિકાથી મળી મોટી રાહત: તમામ ફોજદારી આરોપો રદ, શેરબજારમાં અદાણી ગ્રુપના શેરોમાં 3%નો ઉછાળો

(ડિસ્ક્લેમર: અહીં આપવામાં આવેલી માહિતી માત્ર સમાચાર અને એનાલિસ્ટ્સના મંતવ્યો પર આધારિત છે. મનીકંટ્રોલ અથવા અન્ય એક્સપર્ટ્સના વ્યક્તિગત વિચારો છે. કોઈપણ રોકાણ કરતા પહેલા તમારા સર્ટિફાઈડ ફાઈનાન્શિયલ એડવાઈઝરની સલાહ લેવી હિતાવહ છે.)