દિલ્હીમાં ઇન્ટરનેટ અને પ્રોપર્ટી દુનિયામાં સૌથી સસ્તા, પરંતુ પગારમાં સાવ પાછળ, દુનિયાના 69 શહેરોનો ચોંકાવનારો રિપોર્ટ

દેશની રાજધાની દિલ્હીમાં રહેવાના ખર્ચ અંગે એક અત્યંત રસપ્રદ અને ચોંકાવનારો રિપોર્ટ સામે આવ્યો છે. ડોઇશ બેંક દ્વારા 'મેપિંગ ધ વર્લ્ડ્સ પ્રાઇસ 2026' નામનો લેટેસ્ટ રિપોર્ટ જાહેર કરવામાં આવ્યો છે. આ રિપોર્ટમાં દુનિયાના 69 મોટા શહેરોના રહેણીકરણીના ખર્ચ અને જીવનધોરણની સરખામણી કરવામાં આવી છે. આ રિપોર્ટ મુજબ, દિલ્હીમાં ભલે પ્રોપર્ટી ખરીદવી અને ઇન્ટરનેટ વાપરવું દુનિયામાં સૌથી સસ્તું હોય, પરંતુ જ્યારે વાત લોકોના પગારની આવે છે, ત્યારે દિલ્હી દુનિયાના અન્ય મોટા શહેરોની સરખામણીમાં ઘણું પાછળ રહી જાય છે.

દુનિયાનું સૌથી સસ્તું બ્રોડબેન્ડ ઇન્ટરનેટ દિલ્હીમાં

આજના સમયમાં ઇન્ટરનેટ જીવનની જરૂરિયાત બની ગયું છે. આ રિપોર્ટમાં જાણવા મળ્યું છે કે સર્વેમાં સામેલ 69 શહેરોમાંથી દિલ્હીમાં દુનિયાનું સૌથી સસ્તું બ્રોડબેન્ડ ઇન્ટરનેટ મળે છે. દિલ્હીમાં એક મહિનાના ઇન્ટરનેટ કનેક્શનનો ખર્ચ માત્ર 7.3 ડોલર (અંદાજે 703 રૂપિયા) આવે છે.

'રોમેન્ટિક ડેટ' માટે પણ દિલ્હી સૌથી સસ્તું

પગાર બાબતે દિલ્હી છેક તળિયે

આંતરરાષ્ટ્રીય સ્તરે ભલે દિલ્હી સસ્તું લાગતું હોય, પણ કમાણીની વાત આવે ત્યારે દિલ્હીવાસીઓ પાછળ છે. 2026 ના ડેટા મુજબ, પગારના મામલે 69 શહેરોના લિસ્ટમાં દિલ્હી 66માં સ્થાને છે. દિલ્હીનો સરેરાશ નેટ મંથલી પગાર 538 ડોલર (આશરે 51,800 રૂપિયા) છે, જે ન્યૂયોર્કના લોકોના પગારના માત્ર 10 ટકા જેટલો જ છે. છેલ્લા એક દાયકામાં ડોલરના મૂલ્યમાં ગણતરી કરીએ તો દિલ્હીમાં પગારમાં 17.7 ટકાનો ઘટાડો જોવા મળ્યો છે. પગારના મામલે સ્વિટ્ઝરલેન્ડનું ઝ્યુરિચ શહેર 8,363 ડોલર (લગભગ 8,05,200 રૂપિયા) ની માસિક આવક સાથે દુનિયામાં પહેલા નંબરે છે.

પ્રોપર્ટી અને ઘરભાડું

આંતરરાષ્ટ્રીય માર્કેટની સરખામણીમાં દિલ્હીમાં પ્રોપર્ટીના ભાવ હજુ પણ કાબૂમાં છે. અહીં પ્રોપર્ટીની સરેરાશ કિંમત 2,465 ડોલર પ્રતિ ચોરસ મીટર (આશરે 2.37 લાખ રૂપિયા) છે. આ આધારે દિલ્હી 65માં ક્રમે આવે છે. જોકે, દેશની પ્રખ્યાત રિયલ એસ્ટેટ ફર્મ એનરોકના એક અલગ રિપોર્ટ મુજબ, સ્થાનિક સ્તરે દિલ્હી-NCR માં છેલ્લા એક વર્ષમાં મકાનોની કિંમતોમાં 13 ટકાનો મોટો ઉછાળો પણ નોંધાયો છે. ભાડાની વાત કરીએ તો, દિલ્હીના મુખ્ય વિસ્તારોમાં 3 બેડરૂમ વાળા ઘરનું માસિક ભાડું સરેરાશ 685 ડોલર (આશરે 65,970 રૂપિયા) છે.

પેટ્રોલનો ભાવ ન્યૂયોર્ક બરાબર, પણ જીવનધોરણમાં પાછળ

જ્યાં એક તરફ દિલ્હીમાં જીમની મેમ્બરશીપ અને કપડાં છેલ્લા દસ વર્ષમાં સસ્તા થયા છે, ત્યાં બીજી તરફ પેટ્રોલના ભાવ અમેરિકાના ન્યૂયોર્ક શહેરની બરાબરી કરી રહ્યા છે. દિલ્હીમાં પેટ્રોલ 1.05 ડોલર પ્રતિ લિટર છે, જ્યારે ન્યૂયોર્કમાં તે 1.08 ડોલર છે.

આ બધી સસ્તી સુવિધાઓ હોવા છતાં, જ્યારે લોકોના જીવનધોરણની વાત આવે છે, ત્યારે દિલ્હી ટોપ 50 શહેરોમાં પણ જગ્યા બનાવી શક્યું નથી. કારણ કે આ રેન્કિંગમાં લોકોની ખરીદશક્તિ, સુરક્ષા, આરોગ્ય સેવાઓ, પ્રદૂષણ અને હવામાન જેવા અગત્યના પરિબળો ધ્યાનમાં લેવામાં આવે છે, જેમાં દિલ્હી હજુ ઘણું પાછળ છે.