ભારત-યુકે ફ્રી ટ્રેડ એગ્રીમેન્ટ અંતિમ તબક્કામાં, સસ્તી સ્કોચ વ્હિસ્કી અને જગુઆર લેન્ડ રોવરનો ખુલશે રસ્તો

ભારત અને યુનાઇટેડ કિંગડમ (યુકે) વચ્ચે લાંબા સમયથી ચાલતી ફ્રી ટ્રેડ એગ્રીમેન્ટ (FTA)ની વાટાઘાટો હવે અંતિમ તબક્કામાં પહોંચી ગઈ છે. આ કરારથી યુકેની સ્કોચ વ્હિસ્કી, વાઇન અને જગુઆર લેન્ડ રોવર જેવી લક્ઝરી કાર ભારતમાં સસ્તી થશે, જ્યારે ભારતીય ગાર્મેન્ટ અને ફૂટવેરની નિકાસ યુકેમાં વધશે.

આ કરાર હેઠળ બંને દેશો એકબીજાના પ્રોડક્ટ્સ પર આયાત જકાત ઘટાડશે. હાલમાં યુકેની સ્કોચ વ્હિસ્કી અને વાઇન પર ભારતમાં 150 ટકા સુધીની આયાત જકાત લાગે છે, જે હવે તબક્કાવાર ઘટાડવામાં આવશે. તેવી જ રીતે, યુકેની કાર જેવી કે જગુઆર લેન્ડ રોવર પર હાલ 100 ટકાની જકાત લાગે છે, જે ઘટવાથી આ કારની કિંમતોમાં નોંધપાત્ર ઘટાડો થશે.

આ ઉપરાંત, હીરા, સોનું, ચાંદી અને પેટ્રોલિયમ જેવા પ્રોડક્ટ્સ પર પણ આયાત જકાતમાં ઘટાડો થશે. બીજી તરફ, યુકે ભારતના ગાર્મેન્ટ અને ફૂટવેર પર લાગતી આયાત જકાત ઘટાડશે, જેનાથી ભારતની નિકાસને વેગ મળશે. આ કરારથી યુકેમાં ભારતીય વિદ્યાર્થીઓ માટે અભ્યાસ અને નોકરીની તકો પણ વધશે.

હાલના આંકડા મુજબ, ભારત યુકેમાં 10.5 અબજ ડોલરની નિકાસ કરે છે, જ્યારે યુકેમાંથી ભારત 7 અબજ ડોલરની આયાત કરે છે. આ એફટીએ બંને દેશો વચ્ચે વેપાર સંતુલનને વધુ મજબૂત કરશે.

આગામી સપ્તાહના અંતે ભારતના ઉદ્યોગ મંત્રી ફરી યુકેની મુલાકાતે જઈ શકે છે, જે આ કરાર પર હસ્તાક્ષરની સંભાવનાને વધુ મજબૂત બનાવે છે. આ એફટીએ બંને દેશોના આર્થિક સંબંધોને નવી ઉંચાઈઓ પર લઈ જશે.

આ પણ વાંચો- આ મોટી અમેરિકન IT કંપની 2025માં ભારતમાં 20,000 ફ્રેશર્સને આપશે નોકરીઓ, રહો તૈયાર