મઝગાંવ ડોક શિપબિલ્ડર્સ: 99000 કરોડની મેગા ડિફેન્સ ડીલના સમાચારથી શેરમાં 2 જ દિવસમાં 17%નો તોફાની ઉછાળો

Mazagon Dock Shipbuilders share price: શેરબજારમાં ડિફેન્સ સેક્ટરની સરકારી કંપની મઝગાંવ ડોક શિપબિલ્ડર્સ (Mazagon Dock Shipbuilders)ના રોકાણકારો માટે ખુશીના સમાચાર છે. 6 માર્ચના રોજ સતત બીજા દિવસે કંપનીના શેરમાં જબરદસ્ત તેજી જોવા મળી હતી. BSE પર આ શેર તેના અગાઉના બંધ ભાવ કરતા લગભગ 9 ટકા જેટલો ઉછળીને 2559 રૂપિયાની ઊંચી સપાટીએ પહોંચી ગયો હતો. માત્ર બે જ દિવસમાં આ શેરમાં 17 ટકાનો તોફાની ઉછાળો નોંધાયો છે.

શેરમાં તેજીનું મુખ્ય કારણ: 99,000 કરોડની ડીલ

શેરમાં આવેલા આ જંગી ઉછાળા પાછળ એક મોટા સમાચાર જવાબદાર છે. રિપોર્ટ્સ અનુસાર, ભારતીય નૌકાદળ (Indian Navy) લગભગ 99,000 કરોડ રૂપિયાની એક મેગા ડીલ ફાઈનલ કરવાની તૈયારીમાં છે. આ ડીલ અંતર્ગત જર્મન કંપની થિસેનક્રુપ મરીન સિસ્ટમ્સ (ThyssenKrupp Marine Systems) પાસેથી 6 અત્યાધુનિક સબમરીન ખરીદવામાં આવશે. સૌથી મહત્વની વાત એ છે કે, આ સબમરીનનું નિર્માણ મુંબઈમાં મઝગાંવ ડોક શિપબિલ્ડર્સ દ્વારા કરવામાં આવે તેવી પૂરેપૂરી શક્યતા છે.

આ સમાચાર વાયુવેગે પ્રસરતા જ કંપનીએ શેરબજારોને ઔપચારિક સ્પષ્ટતા આપતા જણાવ્યું હતું કે, મઝગાંવ ડોક શિપબિલ્ડર્સની સરકાર સાથે CNC (Cost Negotiation Committee) ની વાતચીત પૂર્ણ થઈ ગઈ છે અને હવે આ પ્રસ્તાવને અંતિમ મંજૂરી માટે સક્ષમ અધિકારી (Competent Authority) પાસે મોકલી આપવામાં આવ્યો છે.

રોકાણકારોને માલામાલ કરવામાં આ કંપનીએ કોઈ કસર છોડી નથી. છેલ્લા બે વર્ષમાં જ આ શેરે પોતાના રોકાણકારોને 140 ટકા જેટલું જંગી રિટર્ન આપ્યું છે. શેરમાં આવેલી આ તેજીને કારણે કંપનીનું કુલ માર્કેટ કેપિટલાઇઝેશન 1 લાખ કરોડ રૂપિયાને પાર કરી ગયું છે. આ શેરની ફેસ વેલ્યુ 5 રૂપિયા છે. ડિસેમ્બર 2025 ના અંત સુધીના આંકડા મુજબ, કંપનીમાં ભારત સરકારની 81.22 ટકા જેટલી મોટી હિસ્સેદારી છે. BSE પર આ શેરનો 52 સપ્તાહનો હાઈ (High) 3778 રૂપિયા અને લો (Low) 2130 રૂપિયા છે.

મજબૂત ઓર્ડર બુક અને ભવિષ્યનો અંદાજ

કંપનીના કામકાજની વાત કરીએ તો, ડિસેમ્બર ક્વાર્ટરના અંતે મઝગાંવ ડોક પાસે 23758 કરોડ રૂપિયાની મજબૂત ઓર્ડર બુક હતી. નાણાકીય વર્ષ 2026 માટે કંપનીને અપેક્ષા છે કે તેની આવકમાં ગયા વર્ષની સરખામણીએ 9 ટકાનો વધારો થશે અને તે 12500 કરોડ રૂપિયા સુધી પહોંચી જશે. આ ઉપરાંત, ચાલુ અને આગામી નાણાકીય વર્ષમાં કંપનીનું માર્જિન 15 ટકાની આસપાસ જળવાઈ રહે તેવી શક્યતા છે.

કેવું છે કંપનીનું આર્થિક સ્વાસ્થ્ય?

ક્વાર્ટર રિઝલ્ટ: ઓક્ટોબર-ડિસેમ્બર 2025 ના ક્વાર્ટરમાં સ્ટેન્ડઅલોન ધોરણે કંપનીની આવક 3601.09 કરોડ રૂપિયા રહી હતી. આ સમયગાળા દરમિયાન કંપનીએ 837.13 કરોડ રૂપિયાનો ચોખ્ખો નફો (Net Profit) નોંધાવ્યો હતો.

ડિવિડન્ડની ભેટ: ડિસેમ્બર ક્વાર્ટરના શાનદાર પરિણામોની સાથે કંપનીએ નાણાકીય વર્ષ 2026 માટે શેરદીઠ 7.50 રૂપિયાના બીજા વચગાળાના ડિવિડન્ડની પણ જાહેરાત કરી હતી. આ માટે રેકોર્ડ ડેટ 13 ફેબ્રુઆરી 2026 નક્કી કરાઈ હતી અને તેનું પેમેન્ટ 7 માર્ચ અથવા તે પહેલાં કરી દેવામાં આવશે. આ અગાઉ કંપની 6 રૂપિયાનું પહેલું ડિવિડન્ડ પણ આપી ચૂકી છે.

વાર્ષિક આંકડા: નાણાકીય વર્ષ 2025 માં મઝગાંવ ડોક શિપબિલ્ડર્સની સ્ટેન્ડઅલોન આવક 11431.88 કરોડ રૂપિયા અને ચોખ્ખો નફો 2324.88 કરોડ રૂપિયા રહ્યો હતો.

આ પણ વાંચો- USની મોટી રાહત! રશિયન ક્રૂડ ઓઇલ ખરીદવા ભારતને 30 દિવસની છૂટ મળતા Relianceના શેરમાં જબરદસ્ત ઉછાળો

(Disclaimer: અહીં આપવામાં આવેલી માહિતી માત્ર ન્યૂઝ અને જાણકારીના હેતુથી છે. શેરબજારમાં રોકાણ કરવું એ બજારના જોખમોને આધીન છે. કોઈપણ શેરમાં પૈસા લગાવતા પહેલા તમારા સર્ટિફાઈડ ફાઇનાન્શિયલ એડવાઇઝરની સલાહ ચોક્કસથી લેવી. અમારી તરફથી અહીં કોઈપણ પ્રકારની રોકાણ કરવાની સલાહ આપવામાં આવતી નથી.)