ભારતમાં તુર્કીના ઉત્પાદનોનો વિરોધ, પાકિસ્તાનને ખુલ્લેઆમ સમર્થન આપનાર તુર્કીને આર્થિક પડશે ફટકો?

ભારત અને પાકિસ્તાન વચ્ચે તાજેતરના સંઘર્ષ દરમિયાન તુર્કીએ પાકિસ્તાનને ખુલ્લેઆમ સમર્થન આપ્યું હતું, જેના કારણે ભારતમાં તુર્કીના ઉત્પાદનો અને સેવાઓનો વિરોધ શરૂ થયો છે. તુર્કીએ પાકિસ્તાનને હથિયારો, ખાસ કરીને ડ્રોન, સહિતની મદદ પૂરી પાડી હોવાનું સામે આવ્યું છે, જેનો ઉપયોગ પાકિસ્તાને ભારત વિરુદ્ધ કર્યો હતો. આ ઘટનાએ ભારતમાં તુર્કી, અઝરબૈજાન અને ઉઝબેકિસ્તાન જેવા દેશોના ઉત્પાદનોના બહિષ્કારની લહેર શરૂ કરી છે.

ભારતમાં વેચાતા તુર્કીની પ્રોડક્ટ્સ

ભારતમાં તુર્કીના ઉત્પાદનોની માંગ હંમેશાં ઊંચી રહી છે, પરંતુ હવે આ ઉત્પાદનોનો બહિષ્કાર થઈ રહ્યો છે. નીચે તુર્કીના કેટલાક લોકપ્રિય ઉત્પાદનોની યાદી આપવામાં આવી છે:-

કાલીન અને ફર્નિચર: તુર્કીની હાથથી બનાવેલી કાલીન અને ફર્નિચર ભારતીય બજારમાં ખૂબ પસંદ કરવામાં આવે છે.

ખાદ્ય ઉત્પાદનો: ડ્રાય ફ્રૂટ્સ (હેઝલનટ્સ, અખરોટ, કિસમિસ, બદામ), ઓલિવ ઓઈલ, ચેરી, ચોકલેટ, કન્ફેક્શનરી, મસાલા અને હર્બલ ટી.

ફેશન અને જ્વેલરી: તુર્કીના ફેશન પરિધાનો, બુનાટના કાપડ અને હાથથી બનાવેલી જ્વેલરી ભારતમાં લોકપ્રિય છે.

સજાવટની વસ્તુઓ: હાથથી બનાવેલી સજાવટની વસ્તુઓ અને પરંપરાગત ટાઈલ્સ.

ભારત-તુર્કી વેપાર પર અસર

વિતેલા વર્ષોમાં ભારત અને તુર્કી વચ્ચેનો વેપાર સતત વધતો રહ્યો છે, પરંતુ તાજેતરના ઘટનાક્રમે તેને અસર કરી છે. વર્ષ 2023-24માં બંને દેશો વચ્ચેનો કુલ દ્વિપક્ષીય વેપાર 10.43 અબજ ડોલર હતો, જેમાં ભારતની નિકાસ 6.65 અબજ ડોલર અને આયાત 3.78 અબજ ડોલર હતી. જોકે, ફેબ્રુઆરી 2024થી ફેબ્રુઆરી 2025 દરમિયાન ભારતની તુર્કીને નિકાસ 9.7 મિલિયન ડોલર (2.06%) ઘટીને 470 મિલિયન ડોલરથી 461 મિલિયન ડોલર થઈ છે. તે જ રીતે, તુર્કીથી આયાત 232 મિલિયન ડોલર (61.9%) ઘટીને 375 મિલિયન ડોલરથી 143 મિલિયન ડોલર થઈ છે.

ભારતમાં બહિષ્કારની લહેર

તુર્કીના પાકિસ્તાનને સમર્થનના કારણે ભારતમાં તેના ઉત્પાદનો અને પર્યટનનો વિરોધ વધ્યો છે. દર વર્ષે લાખો ભારતીય પર્યટકો તુર્કી અને અઝરબૈજાનની મુલાકાતે જાય છે, પરંતુ હવે આ સંખ્યામાં ઘટાડો થવાની શક્યતા છે. સોશિયલ મીડિયા પર પણ #BoycottTurkey અને #SayNoToTurkishProducts જેવા હેશટેગ ટ્રેન્ડ કરી રહ્યા છે.

ભારતનો જવાબ

ભારતે તુર્કીની આ હરકતોનો રાજદ્વારી સ્તરે વિરોધ કર્યો છે અને આંતરરાષ્ટ્રીય મંચો પર આ મુદ્દો ઉઠાવવાની તૈયારી દર્શાવી છે. આ ઉપરાંત, ભારતીય બજારમાં તુર્કીના ઉત્પાદનોના વિકલ્પોને પ્રોત્સાહન આપવાની ચર્ચા પણ શરૂ થઈ છે. તુર્કીના પાકિસ્તાનને સમર્થનથી ભારતમાં તેની આર્થિક અને પર્યટન સંબંધિત પ્રવૃત્તિઓ પર નકારાત્મક અસર પડી રહી છે. આગામી દિવસોમાં ભારત-તુર્કી વેપારમાં વધુ ઘટાડો થવાની શક્યતા છે, જે તુર્કીની અર્થવ્યવસ્થા માટે મોટો ફટકો સાબિત થઈ શકે છે.

આ પણ વાંચો-ઓપરેશન સિંદૂર દરમિયાન ભારતની પરિપક્વતાએ વધાર્યું રોકાણકારોનું આકર્ષણ, બજારમાં ઉછાળો: નીલેશ શાહ