RBI MPC Meeting 2026: તમારી હોમ અને કાર લોનની EMI ઘટશે કે વધશે? આજે RBI ગવર્નર કરશે નવી વ્યાજ દરોની જાહેરાત

RBI MPC Meeting 2026: કરોડો બેંક ગ્રાહકો, લોનની EMI ચૂકવતા સામાન્ય લોકો અને શેરબજારના રોકાણકારો માટે આજનો દિવસ ખૂબ જ મહત્વનો છે. ભારતીય રિઝર્વ બેંકની મોનેટરી પોલિસી કમિટીની ત્રણ દિવસીય સમીક્ષા બેઠકનો અંતિમ નિર્ણય આજે, એટલે કે બુધવાર, 5 ઓગસ્ટ 2026 ના રોજ આવવાનો છે.

આ મહત્વપૂર્ણ જાહેરાત પહેલા શેરબજારમાં રોકાણકારો સાવચેત જોવા મળી રહ્યા છે. જોકે, ગિફ્ટ નિફ્ટી 24,744.50 ના સ્તર પર કારોબાર કરીને ભારતીય બજાર માટે મજબૂત શરૂઆતના સંકેત આપી રહ્યો છે. અગાઉ મંગળવારે, F&O એક્સપાયરીના કારણે બજારમાં ભારે ઉતાર-ચઢાવ જોવા મળ્યો હતો અને ઇન્ડેક્સ લાલ નિશાનમાં બંધ થયા હતા.

ક્યારે અને ક્યાં જોશો RBI ગવર્નરનું લાઈવ સંબોધન?

બુધવાર, 5 ઓગસ્ટ 2026 ના રોજ સવારે 10:00 વાગ્યે નવી પોલિસીની જાહેરાત થશે. બપોરે 12:00 વાગ્યે RBI ગવર્નર સંજય મલ્હોત્રા મીડિયાને સંબોધિત કરશે અને પત્રકારોના સવાલોના જવાબ આપશે. આ સંબોધન તમે રિઝર્વ બેંકની સત્તાવાર વેબસાઈટ, તેમના ઓફિશિયલ YouTube ચેનલ અને સોશિયલ મીડિયા પ્લેટફોર્મ X પર લાઈવ જોઈ શકશો.

મનીકંટ્રોલના એક રિપોર્ટ મુજબ, મોટાભાગના અર્થશાસ્ત્રીઓનું માનવું છે કે 6 સભ્યોની બનેલી MPC સતત ચોથી વખત રેપો રેટમાં કોઈ જ ફેરફાર નહીં કરે. હાલમાં રેપો રેટ 5.25% છે અને તે આ જ સ્તર પર જળવાઈ રહે તેવી પૂરી શક્યતા છે. મિડલ ઈસ્ટમાં ચાલી રહેલા સંઘર્ષ અને વૈશ્વિક સ્તરે જોવા મળતી અનિશ્ચિતતાઓને ધ્યાનમાં રાખીને મધ્યસ્થ બેંક અત્યારે ઉતાવળ કરવાના બદલે સાવચેતીભર્યું વલણ અપનાવી શકે છે.

જૂન મહિનાની બેઠકમાં શું નિર્ણય લેવાયો હતો?

અગાઉ 3 થી 5 જૂન 2026 વચ્ચે યોજાયેલી MPC બેઠકમાં પણ RBI એ વ્યાજ દરોમાં કોઈ ફેરફાર કર્યો ન હતો. તે સમયે લેવાયેલા મુખ્ય નિર્ણયો નીચે મુજબ હતા.રેપો રેટ 5.25% પર સ્થિર રાખવામાં આવ્યો હતો અને બેંકનું વલણ 'ન્યુટ્રલ' જાહેર કરાયું હતું. સ્ટેન્ડિંગ ડિપોઝિટ ફેસિલિટી 5% પર રાખવામાં આવી હતી. માર્જિનલ સ્ટેન્ડિંગ ફેસિલિટી અને બેંક રેટને 5.5% પર યથાવત રાખવામાં આવ્યા હતા. નાણાકીય વર્ષ 2026-27 (FY27) માટે ભારતનો વાસ્તવિક GDP ગ્રોથ 6.6% અને રિટેલ મોંઘવારી દર 5.1% રહેવાનો અંદાજ મુકવામાં આવ્યો છે. જૂનમાં RBI ગવર્નર સંજય મલ્હોત્રાએ સ્પષ્ટ કર્યું હતું કે ભલે વૈશ્વિક અર્થવ્યવસ્થામાં સપ્લાય ચેન ખોરવાઈ હોય, પરંતુ ભારતીય અર્થવ્યવસ્થા કોઈપણ બાહ્ય આંચકાઓ સહન કરવા માટે સંપૂર્ણપણે મજબૂત છે.

સામાન્ય જનતા માટે આ બેઠક કેમ છે આટલી ખાસ?

તમને જણાવી દઈએ કે, રેપો રેટ એ દર છે જે દરે RBI અન્ય કોમર્શિયલ બેંકોને લોન આપે છે. જો રેપો રેટ વધે છે, તો બેંકો માટે ભંડોળ મોંઘુ થાય છે. પરિણામે, બેંકો તમારી હોમ લોન, ઓટો લોન અને પર્સનલ લોનના વ્યાજ દરમાં વધારો કરે છે, જેનાથી તમારી દર મહિનાની EMI વધી જાય છે.

બીજી તરફ, જો આજે રેપો રેટ સ્થિર રહેશે તો તમારી EMI પર કોઈ નવો આર્થિક બોજ પડશે નહીં અને બેંકમાં ફિક્સ ડિપોઝિટ કરાવનારા રોકાણકારોને પણ પહેલાની જેમ જ આકર્ષક રિટર્ન મળતું રહેશે.