અદાણી ગ્રુપે ડિસ્ક્લોઝર નિયમોનુ પાલન નહીં કર્યા હોવાનું સેબીની તપાસમાં જણાયુ

નાણા બજાર નિયામક સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી)એ અદાણી ગ્રુપ કંપનીઓમાં સંભવિત નિયમ ઉલ્લંઘન થયા હોવાની તપાસ કરી હતી. લિસ્ટેડ એન્ટીટીઓએ ડિસ્ક્લોઝર સંબંધિત નિયમોનું પાલન નહીં કર્યા હોવાનું જણાયુ છે, એમ સૂત્રોએ કહ્યું હતું.

અમેરિકાની શોર્ટ સેલર હિડનબર્ગ રિસર્ચે તેમના રિપોર્ટમાં અદાણી ગ્રુપ સામે જે આક્ષેપ કર્યા હતા તે પછી સેબીએ અદાણી ગ્રુપ કંપનીઓમાં તપાસ શરૂ કરી હતી. આ રિપોર્ટ બાદ અદાણી ગ્રુપના બજાર મૂલ્યમાં 100 અબજ ડૉલરથી અધિકનો ઘટાડો થયો હતો.

જોકે, સેબી સુનાવણી પહેલા જાહેરમાં કોઈ માહિતી પુરી પાડશે એવી શક્યતા ઓછી છે. સોમવારે પણ નિયામકે આ બાબતે કોઈ પ્રતિક્રિયા આપી નહોતી. ગયા શુક્રવારે સેબીએ સુપ્રિમ કોર્ટને કહ્યું હતું કે અદાણી ગ્રુપમાં તપાસ પુરી થવામાં છે અને અમૂક રિલેટેડ-પાર્ટી ટ્રાન્ઝેક્શન્સમાં ડિસ્ક્લોઝિંગ નિયમોનું ઉલ્લંઘન થયુ છે.

સૂત્રોએ કહ્યું કે જો દંડ થશે તો કમસેકમ રૂ.૧ કરોડ સુધીનો થઈ શકે છે. તેમ જ અદાણી કંપનીઓના ઓફશોર ફંડ્સ હોલ્ડિંગની પણ ઈન્ક્વાયરી થઈ શકે છે. ભારતીય કાયદા મુજબ ઓફશોર રોકાણકાર ભારતીય કંપનીમાં ફોરેન પોર્ટફોલિયો ઈનવેસ્ટરના માધ્યમે મહત્તમ 10 ટકા રોકાણ કરી શકે છે. આ મર્યાદાનો પણ ભંગ થયા હોવાનું જણાય છે.