Tata Group માં ચાલી રહેલા વિવાદ વચ્ચે Noel Tata અને ચંદ્રશેખરનની મુલાકાત, બેઠકમાં શું થયું?

Tata Group News: ટાટા ગ્રુપના ટોચના નેતૃત્વ વચ્ચે ચાલી રહેલા મતભેદોને ઉકેલવા માટે યોજાયેલી એક મહત્ત્વપૂર્ણ બેઠક કોઈ પરિણામ વિના પૂરી થઈ હોવાનું અહેવાલમાં જણાવાયું છે. અહેવાલ અનુસાર, Tata Sonsના ચેરમેન એન. ચંદ્રશેખરન અને Tata Trustsના ચેરમેન Noel Tata વચ્ચે 25 ઓક્ટોબરના રોજ એક ગુપ્ત બેઠક યોજાઈ હતી. ટાટા ગ્રુપના પૂર્વ દિગ્ગજ અધિકારી એન.એ. સનવાલાની પહેલ પર આ બેઠક બોલાવવામાં આવી હતી. જોકે, બેઠકમાં કોઈ સર્વસંમતિ બની શકી નહોતી.

આ ગુપ્ત બેઠક અંગેનો અહેવાલ The Economic Times દ્વારા પ્રકાશિત કરવામાં આવ્યો છે. જોકે, મનીકંટ્રોલઆ રિપોર્ટની સ્વતંત્ર રીતે પુષ્ટિ કરી શક્યું નથી.

રિપોર્ટના અનુસાર, બંને ટોચના નેતાઓ વચ્ચેની વાતચીત મુખ્યત્વે ત્રણ મહત્ત્વના મુદ્દાઓ પર કેન્દ્રિત હતી.

- Tata Sonsનું લિસ્ટિંગ: ટાટા ગ્રુપની હોલ્ડિંગ કંપની Tata Sonsને શેરબજારમાં લિસ્ટ કરવાના પ્રસ્તાવ પર ચર્ચા થઈ હતી.

- Shapoorji Pallonji Groupની હિસ્સેદારી: Tata Sonsમાં Shapoorji Pallonji Group પાસે રહેલી હિસ્સેદારી ખરીદવાની સંભવિત યોજના અંગે ચર્ચા થઈ હતી.

- ચંદ્રશેખરનનો કાર્યકાળ: Tata Sonsના ચેરમેન તરીકે એન. ચંદ્રશેખરનના કાર્યકાળ અને તેમની પુનર્નિયુક્તિની પ્રક્રિયા અંગે પણ વાતચીત થઈ હતી.

Noel Tataના પત્રથી વધી હતી ચર્ચા

Noel Tataએ 26 ઓક્ટોબરના રોજ લખેલા એક પત્રમાં એન. ચંદ્રશેખરનની પુનર્નિયુક્તિને મંજૂરી આપવા માટે અપનાવવામાં આવેલી પ્રક્રિયા અને વોટિંગની જરૂરિયાતો સામે સવાલ ઉઠાવ્યા હતા.

તેમણે સંભવિત હિતોના ટકરાવ (Conflict of Interest)નો મુદ્દો પણ ઉઠાવ્યો હતો. આ સાથે તેમણે બોર્ડ મીટિંગનું રેકોર્ડિંગ, અંતિમ મિનિટ્સ અને વોટિંગ રેકોર્ડની માગણી કરી હતી.

12 નવેમ્બરે 6 ટાટા કંપનીઓમાંથી નિવૃત્ત થશે Noel Tata

Noel Tata 12 નવેમ્બરે 70 વર્ષના થશે. ટાટા ગ્રુપની નોન-એક્ઝિક્યુટિવ ડિરેક્ટર્સ માટેની નિવૃત્તિ નીતિ હેઠળ તેઓ ગ્રુપની કેટલીક મહત્ત્વપૂર્ણ કંપનીઓના બોર્ડમાંથી રાજીનામું આપશે.

તેઓ નીચેની કંપનીઓમાં ચેરમેન પદ છોડશે:

- ટ્રેન્ટ

- વોલ્ટાસ

- ટાટા ઇન્વેસ્ટમેન્ટ કોર્પોરેશન

- ટાટા ઇન્ટરનેશનલ

- ટ્રેન્ટ હાઇપરમાર્કેટ

- ટાટા ઇન્ટરનેશનલ વેસ્ટ એશિયા ડીએમસીસી (DMCC)

આ ઉપરાંત તેઓ Tata Steel અને Titan Companyમાં નોન-એક્ઝિક્યુટિવ વાઇસ ચેરમેનનું પદ છોડશે. જ્યારે Inditex Trent Retail Indiaના ડિરેક્ટર પદેથી પણ હટી જશે.

Tata Sonsના બોર્ડમાં જવાબદારી યથાવત રહેશે.

જોકે, આ કંપનીઓનાં પદ છોડ્યા બાદ પણ Noel Tataની Tata Sonsમાં ભૂમિકા યથાવત રહેશે. તેઓ Tata Trustsના નોમિની ડિરેક્ટર તરીકે ટાટા ગ્રુપની હોલ્ડિંગ કંપની Tata Sonsના બોર્ડમાં પોતાની જવાબદારી નિભાવતા રહેશે.

આમ, Tata Groupના ટોપના નેતૃત્વ વચ્ચેના મતભેદો, Tata Sonsના સંભવિત લિસ્ટિંગ અને ચંદ્રશેખરનની પુનર્નિયુક્તિ જેવા મુદ્દાઓ પર હવે સૌની નજર રહેશે.