ટ્રમ્પનું રશિયા પર દબાણ: ક્રૂડ ઓઈલ 120 ડોલર સુધી પહોંચે તો આ વસ્તુઓ થશે મોંઘી!

Trump, Russia Crude Oil: અમેરિકી રાષ્ટ્રપતિ ડોનાલ્ડ ટ્રમ્પ યુક્રેન-રશિયા યુદ્ધને લઈને રશિયા પર દબાણ વધારી રહ્યા છે. તેમણે રશિયા પર વ્યાપક પ્રતિબંધો લગાવવાની જાહેરાત કરી છે, જેના કારણે નિષ્ણાતોનું માનવું છે કે ક્રૂડ ઓઈલના ભાવ 120 ડોલર પ્રતિ બેરલ સુધી પહોંચી શકે છે. આનાથી ભારત સહિત અન્ય દેશોમાં પેટ્રોલ, ડીઝલ, LPG અને રોજિંદા વપરાશની ઘણી વસ્તુઓના ભાવમાં વધારો થઈ શકે છે.

ટ્રમ્પનું રશિયા પર દબાણ

ટ્રમ્પે યુક્રેન-રશિયા યુદ્ધને લઈને રશિયા વિરુદ્ધ કડક પગલાં લેવાનું શરૂ કર્યું છે. તેમણે રશિયા નજીક બે ન્યૂક્લિયર પનડુબ્બીઓ તૈનાત કરી છે, જેનાથી બંને દેશો વચ્ચે તણાવ વધ્યો છે. આ ઉપરાંત, ટ્રમ્પે ભારત સહિત રશિયા પાસેથી ક્રૂડ ઓઈલ અને હથિયારોની આયાત કરતા દેશો પર 100% ટેરિફ અને દંડ લગાવવાની ચેતવણી આપી છે. તેમનો ઈરાદો ભારત જેવા દેશો રશિયા પાસેથી આયાત બંધ કરે તેવો છે.

નિષ્ણાતોના જણાવ્યા પ્રમાણે, રશિયા પર લાગેલા આ પ્રતિબંધો ક્રૂડ ઓઈલના પુરવઠા પર અસર કરી શકે છે. ઓઈલ માર્કેટ નિષ્ણાતોએ ANIને જણાવ્યું કે, વધતા ભૌગોલિક-રાજકીય તણાવ અને ખાસ કરીને યુક્રેન યુદ્ધને લઈને ટ્રમ્પની ચેતવણીઓથી તેલના પુરવઠામાં ઘટાડો થઈ શકે છે, જેની અસર લાંબા ગાળે જોવા મળશે.

વેન્ચુરા ખાતે કોમોડિટીઝ અને CRMના વડા એન.એસ. રામાસ્વામીએ જણાવ્યું કે, બ્રેન્ટ ઓઈલનો ભાવ ઓક્ટોબર 2025 સુધીમાં 76 ડોલર પ્રતિ બેરલના લક્ષ્યાંક સુધી પહોંચી શકે છે, જે 69 ડોલરના સપોર્ટ લેવલથી નીચે નોંધપાત્ર ઘટાડો નહીં થાય તો 2025ના અંત સુધીમાં 82 ડોલર સુધી જઈ શકે છે. WTI ક્રૂડ ઓઈલ સપ્ટેમ્બર 2025 સુધીમાં 69.65 ડોલરથી વધીને 76-79 ડોલરની રેન્જમાં પહોંચી શકે છે.

જોકે, ટ્રમ્પના નવા પ્રતિબંધો અને 100% ટેરિફની જાહેરાતથી રશિયન તેલ ખરીદતા દેશો પર સીધી અસર પડી શકે છે, જેના કારણે ક્રૂડ ઓઈલના ભાવ 100થી 120 ડોલર પ્રતિ બેરલ સુધી પહોંચી શકે છે.

ભારત પર શું થશે અસર?

સિનિયર એનર્જી નિષ્ણાત નરેન્દ્ર તનેજાના જણાવ્યા પ્રમાણે, રશિયા વૈશ્વિક અર્થતંત્રમાં દરરોજ 50 લાખ બેરલ તેલનું નિકાસ કરે છે. જો આ પુરવઠામાં અડચણ આવે તો ક્રૂડ ઓઈલના ભાવ 100થી 120 ડોલર સુધી પહોંચી શકે છે. ભારત રશિયા પાસેથી 35થી 40% તેલની આયાત કરે છે, જેથી ભાવ વધારાથી ભારત પણ પ્રભાવિત થશે. જોકે, 40થી વધુ દેશોમાંથી તેલનો પુરવઠો મળતો હોવાથી ભારતને સપ્લાયની કમીનો સામનો નહીં કરવો પડે, પરંતુ ગ્રાહક ભાવમાં વધારો થઈ શકે છે.

ભારતની રિફાઈનરી કંપનીઓ રશિયાના રિયાયતી તેલ પર નિર્ભર છે, જેણે 2022થી દેશમાં મોંઘવારી દરને સંતુલિત રાખવામાં મદદ કરી છે. જો આ કંપનીઓ પ્રતિબંધો બાદ પણ આયાત ચાલુ રાખે તો તેમને દંડ અને ઊંચા ટેરિફનો સામનો કરવો પડી શકે છે, જેનાથી ઘણી વસ્તુઓના ભાવ વધી શકે છે.

કઈ વસ્તુઓ થશે મોંઘી?

પેટ્રોલ, ડીઝલ અને LPG: આના ભાવમાં સીધી અસર થશે.

શાકભાજી, ફળો, દૂધ અને ખાદ્ય વસ્તુઓ: ક્રૂડ ઓઈલના ભાવ વધવાથી ટ્રાન્સપોર્ટ ખર્ચ વધશે, જેની અસર આ વસ્તુઓના ભાવ પર પડશે.

પ્લાસ્ટિક, રસાયણ, સિમેન્ટ, સ્ટીલ: આ ઉદ્યોગોમાં ઈનપુટ ખર્ચ વધવાથી બાંધકામ, ઈલેક્ટ્રોનિક્સ અને કાપડ ઉદ્યોગ પર અસર પડશે.

ટ્રાન્સપોર્ટ સેવાઓ: બસ, ટ્રક, ઓટો અને ટેક્સીનું ભાડું વધી શકે છે.

ઈ-કોમર્સ ડિલિવરી: ડિલિવરી ખર્ચ વધવાથી ઓનલાઈન શોપિંગ મોંઘું થઈ શકે છે.

આ પણ વાંચો- Trump-US economy: ટ્રમ્પના નિર્ણયોથી અમેરિકન અર્થતંત્ર ડગમગ્યું, મંદીનો ખતરો મંડરાયો