રૂપિયામાં કડાકો: યુએસ ડોલર સામે ભારતીય રૂપિયો 37 પૈસા તૂટ્યો, જાણો ઘટવાનું મુખ્ય કારણ

Currency Market: આંતરરાષ્ટ્રીય બજારમાં ક્રૂડ ઓઈલની કિંમતોમાં થયેલો મોટો ઉછાળો અને એશિયન શેરબજારોમાં જોવા મળી રહેલી ભારે વેચવાલીની સીધી અસર કરન્સી માર્કેટ પર પડી છે. સોમવાર 8 જૂનના રોજ યુએસ ડોલર સામે ભારતીય રૂપિયો 37 પૈસા નબળો ખૂલ્યો છે. સ્થાનિક કરન્સી આજે ડોલર સામે 95.32 ના સ્તર પર ખૂલી છે, જ્યારે અગાઉના સત્રમાં એટલે કે શુક્રવાર 5 જૂનના રોજ રૂપિયો 94.95 પ્રતિ ડોલર પર બંધ થયો હતો.

અગાઉ 5 જૂનના રોજ જ્યારે ભારતીય રિઝર્વ બેંકે કરન્સીને સપોર્ટ આપવા માટે કેટલાક મહત્વના પગલાં લીધા હતા, ત્યારે રૂપિયામાં છેલ્લા બે મહિનાનો સૌથી મોટો ઉછાળો જોવા મળ્યો હતો. પરંતુ વીકેન્ડમાં બદલાયેલી ગ્લોબલ સ્થિતિએ રૂપિયા પર ફરી દબાણ વધારી દીધું છે.

ક્રૂડ ઓઈલ અને ઈઝરાયેલ-લેબેનોન વિવાદની અસર

વીકેન્ડ દરમિયાન ઇઝરાયેલે લેબેનોન પર ફરીથી નવા હુમલા શરૂ કર્યા છે. બંને દેશો વચ્ચે યુદ્ધવિરામ હોવા છતાં આ હુમલા થતાં જ ક્રૂડ ઓઈલની કિંમતો 3 ટકાથી વધુ વધી ગઈ છે અને તે 96 ડોલર પ્રતિ બેરલની સપાટીને પાર કરી ગઈ છે. આ તણાવના કારણે અમેરિકા અને ઈરાન વચ્ચે શાંતિ સમજૂતીની આશાઓને ફરી મોટો ઝટકો લાગ્યો છે, જેની સીધી નકારાત્મક અસર રૂપિયા પર પડી છે.

રૂપિયાને ઝડપથી નીચે પડતો અટકાવવા માટે આરબીઆઈએ વ્યાજ દરોને 5.25 ટકા પર સ્થિર રાખવાની સાથે કેટલીક ખાસ સુવિધાઓની જાહેરાત કરી છે.સેન્ટ્રલ બેંકે એક્સટર્નલ કમર્શિયલ બોરોઇંગ (ECB) કરતી પીએસયુ કંપનીઓ માટે હેજિંગ વધારી દીધું છે. બિન-નિવાસી ભારતીયો પાસેથી 3 થી 5 વર્ષ માટે ડિપોઝિટ મેળવતી બેંકોને પણ આવી જ સુવિધા આપવામાં આવી છે. આ બંને વિશેષ સુવિધાઓ આગામી 30 સપ્ટેબર સુધી ચાલુ રહેશે. એકલા સ્ટેટ બેંક ઓફ ઇન્ડિયા (SBI) ને જ આ FCNR (B) ડિપોઝિટ યોજના દ્વારા 34 બિલિયન ડોલરથી વધુનો ઇનફ્લો મળવાની આશા છે.

એક્સપર્ટ્સનું શું કહેવું છે?

એક વિદેશી બેંકના ટ્રેડરે જણાવ્યું કે આ અઠવાડિયે રૂપિયામાં રિકવરી જોવા મળી શકે છે કારણ કે ટ્રેડર્સ લોન્ગ ડોલર પોઝિશનમાં સતત ઘટાડો કરી રહ્યા છે.

બીજી તરફ, સીઆર ફોરેક્સ એડવાઇઝરીના મેનેજિંગ ડિરેક્ટર અમિત પાબારીના જણાવ્યા મુજબ, મીડિયમ ટર્મ આઉટલુક હજુ પણ પોઝિટિવ છે. USDINR નો રેટ 94.50 રૂપિયાની નીચે જઈને ધીમે-ધીમે 94.00 થી 93.80 રૂપિયાના ઝોન તરફ આગળ વધે તેવી શક્યતા છે, જોકે આ બધું આંતરરાષ્ટ્રીય પરિબળો પર જ આધાર રાખશે.

ક્રૂડ ઓઈલ ઉપરાંત યુએસ ઇક્વિટી માર્કેટમાં આવેલી વેચવાલીએ પણ એશિયન બજારોની સાથે રૂપિયાને પ્રભાવિત કર્યો છે. ટેકનોલોજી શેરોમાં રોકાણકારો પ્રોફિટ બુકિંગ કરી રહ્યા છે. શુક્રવારે નાસ્ડેકમાં 4 ટકાથી વધુનો ઘટાડો આવ્યા બાદ દક્ષિણ કોરિયાનો ઇન્ડેક્સ પણ લગભગ 7 ટકા જેટલો તૂટ્યો છે, જેના કારણે કરન્સી માર્કેટ પણ દબાણ હેઠળ છે.

આ પણ વાંચો-Gold Price Today: સપ્તાહની શરૂઆતમાં જ સોનું અને ચાંદી વધુ સસ્તા થયા, જાણો અમદાવાદથી લઈને દિલ્હી સુધીના લેટેસ્ટ રેટ