Crude Oil Price: અમેરિકા-ઈરાન વચ્ચે શાંતિની આશાથી ક્રૂડ ઓઈલ 7% તૂટ્યું, બ્રેન્ટ ક્રૂડ 84 ડોલરની આસપાસ

Crude Oil Price: આંતરરાષ્ટ્રીય બજારમાં સોમવારે કાચા તેલની કિંમતોમાં મોટો ઘટાડો જોવા મળ્યો છે. છેલ્લા છ મહિનાથી ઈરાન સાથે ચાલી રહેલા તણાવને કારણે ઈંધણના ભાવ આસમાને પહોંચ્યા હતા અને મોંઘવારીનો ભય સતાવી રહ્યો હતો. પરંતુ, હવે અમેરિકા અને ઈરાન વચ્ચે શાંતિ મંત્રણાની શક્યતા ઊભી થતાં બજારમાં મોટી રાહત જોવા મળી છે.

ક્રૂડ ઓઈલના ભાવમાં આવ્યો મોટો કડાકો

શાંતિની આશા વચ્ચે કાચા તેલના ભાવમાં જબરદસ્ત ઘટાડો નોંધાયો છે, જેનાથી જુલાઈ મહિનામાં આવેલી જંગી તેજી પર બ્રેક વાગી ગઈ છે, બ્રેન્ટ ક્રૂડ7.3% તૂટીને 81.55 ડોલર પ્રતિ બેરલ સુધી પહોંચી ગયું હતું. જોકે, બાદમાં તેમાં થોડી રિકવરી આવી અને તે 84 ડોલરની આસપાસ ટ્રેડ થવા લાગ્યું. વેસ્ટ ટેક્સાસ ઈન્ટરમીડિએટ 4.6% ના ઘટાડા સાથે 80.76 ડોલર પર આવી ગયું છે. સપ્ટેમ્બર WTI કોન્ટ્રાક્ટ પણ 4.9% ઘટીને 80.55 ડોલર પર બંધ થયો છે. નોંધનીય છે કે, જુલાઈ મહિનામાં બ્રેન્ટ ક્રૂડમાં લગભગ 25% નો ઉછાળો આવ્યો હતો, જે માર્ચ પછીનો સૌથી મોટો માસિક વધારો હતો.

ટ્રમ્પની જાહેરાતથી બજારમાં રાહત

ટ્રમ્પે સ્પષ્ટ કર્યું કે, સાઉદી અરેબિયા સહિત પશ્ચિમ એશિયાના મિત્ર દેશોની અપીલ બાદ તેમણે વાતચીતનો રસ્તો પસંદ કર્યો છે. જોકે, આ માટે તેમણે એક મોટી શરત રાખી છે કે હોર્મુઝ સ્ટ્રેટને ફરીથી ખોલવા માટે અધિકારીઓ ઝડપથી સમજૂતી કરે.

ઈરાન અને ઓમાન વચ્ચે વાતચીત અંતિમ તબક્કામાં

બ્લૂમબર્ગના અહેવાલ મુજબ, ઈરાનના વિદેશ મંત્રી અબ્બાસ અરાગચીએ 2 ઓગસ્ટના રોજ પોતાની ટેલિગ્રામ પોસ્ટમાં જણાવ્યું હતું કે, હોર્મુઝ સ્ટ્રેટમાંથી પસાર થતા નવા રૂટ માટે ઈરાન અને ઓમાન વચ્ચે ચાલી રહેલી વાતચીત હવે અંતિમ તબક્કામાં પહોંચી ગઈ છે. બીજી તરફ, OPEC+ દેશો દ્વારા ઉત્પાદન ક્વોટામાં કરાયેલા મામૂલી વધારાએ પણ તેલની કિંમતો પર દબાણ વધાર્યું છે.

દરિયાઈ માર્ગે હજુ પણ મંડરાઈ રહ્યો છે ખતરો

ભલે રાજકીય સ્તરે શાંતિના પ્રયાસો થઈ રહ્યા હોય, પરંતુ દરિયાઈ માર્ગે જોખમ હજુ યથાવત છે. UK મેરીટાઇમ ટ્રેડ ઓપરેશન્સે માહિતી આપી છે કે રવિવારે ઓમાન નજીક એક ટેન્કર પાસે મોટો ધડાકો સંભળાયો હતો. આ ઘટના ત્યારે બની જ્યારે હોર્મુઝ સ્ટ્રેટમાંથી પસાર થઈ રહેલા એક LNG ટેન્કર પર હુમલો થયો.

આ પણ વાંચો-Gift Nifty Indicator: ક્રૂડ ઓઈલના ભાવ ઘટતા શેરબજારમાં નવી ઉડાનના સંકેત, ગિફ્ટ નિફ્ટી 170 પોઈન્ટ ઉછળ્યો