ક્રૂડ ઓઈલના ભાવ ભડકે બળ્યા! મિડલ ઈસ્ટ સંકટ વચ્ચે કિંમત 83 ડોલરને પાર, જાણો શેરબજારની સ્થિતિ

Crude Oil Price: મિડલ ઈસ્ટમાં ચાલી રહેલા તણાવની સીધી અસર હવે વૈશ્વિક બજાર પર જોવા મળી રહી છે. ગુરુવારે કાચા તેલ (Crude Oil) ની કિંમતોમાં મોટો ઉછાળો જોવા મળ્યો છે. સતત 5 મા દિવસે ભાવ વધતા બ્રેન્ટ ક્રૂડનો ભાવ 83 ડોલરની ઉપર પહોંચી ગયો છે.

કેમ વધી રહ્યા છે ક્રૂડ ઓઈલના ભાવ?

અમેરિકા અને ઈરાન વચ્ચે ચાલી રહેલા સંઘર્ષના કારણે હોર્મુઝ સ્ટ્રેટ (Strait of Hormuz) લાંબા સમય સુધી બંધ રહે તેવી ચિંતા બજારમાં ફેલાઈ ગઈ છે. આ મહત્વનો જળમાર્ગ બંધ થવાથી મિડલ ઈસ્ટમાંથી આવતો જરૂરી તેલ અને ગેસનો સપ્લાય અટકી ગયો છે.

બીજી તરફ, પ્રોડક્શન કંપનીઓએ પણ પોતાનું આઉટપુટ મર્યાદિત કરી દીધું છે. અમેરિકાએ ઓઈલ ટેન્કરોની સુરક્ષાનો પૂરો ભરોસો આપ્યો હોવા છતાં, ટ્રેડર્સમાં ડરનો માહોલ છે. અમેરિકા-ઈઝરાયેલ અને ઈરાન વચ્ચે યુદ્ધ ચાલુ રહેવાના એંધાણને લીધે એનર્જી માર્કેટમાં ભારે ઉથલપાથલ મચી છે.

બ્રેન્ટ ક્રૂડ: કિંમતમાં 1.67 ડોલર એટલે કે 2.05% નો વધારો જોવા મળ્યો છે, જેનાથી ભાવ 83.07 ડોલર પ્રતિ બેરલ પર પહોંચી ગયો છે.

US WTI ક્રૂડ: અમેરિકાનું વેસ્ટ ટેક્સાસ ઈન્ટરમીડિએટ (WTI) ક્રૂડ પણ 1.94 ડોલર અથવા 2.60% ઉછળીને 76.60 ડોલર પર ટ્રેડ કરી રહ્યું છે.

શેરબજારમાં રિકવરીનો માહોલ

એક તરફ ક્રૂડ ઓઈલ મોંઘુ થઈ રહ્યું છે, તો બીજી તરફ એશિયન શેરબજારોમાં ફરીથી ખરીદી જોવા મળી રહી છે. અમેરિકાના સારા આર્થિક આંકડાઓને કારણે વોલ સ્ટ્રીટમાં તેજી આવી, જેની પોઝિટિવ અસર એશિયન બજારો પર પડી છે. અગાઉના સેશનમાં જોવા મળેલા ભારે કડાકા બાદ બજારોએ શાનદાર વાપસી કરી છે.

દક્ષિણ કોરિયાનો કોસ્પી (Kospi) ઈન્ડેક્સ સૌથી વધુ 12% ઉછળ્યો છે, જે એશિયન બજારોમાં સૌથી ટોચ પર રહ્યો.

MSCI એશિયા પેસિફિક ઈન્ડેક્સમાં પણ 2.8%નો વધારો નોંધાયો છે.

મિડલ ઈસ્ટના સંઘર્ષને કારણે શરૂઆતમાં શેરબજારમાં જે ગભરાહટ જોવા મળ્યો હતો, તે હવે ધીમે ધીમે શાંત થઈ રહ્યો છે અને રોકાણકારોના સેન્ટિમેન્ટમાં સ્થિરતા આવી રહી છે. જોકે, ક્રૂડ ઓઈલના વધતા ભાવ આવનારા સમયમાં વિશ્વભરના અર્થતંત્ર અને પેટ્રોલ-ડીઝલના ભાવ પર મોટી અસર પાડી શકે છે.

આ પણ વાંચો- Stocks to Watch Today: 5 માર્ચે શેરબજારમાં HUL, BSE અને Bharat Forge સહિત આ શેર્સ પર રાખો નજર, જોવા મળશે મોટો ઉતાર-ચઢાવ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.