Gold Price Today: યુદ્ધના કારણે સોનું થયું વધુ મોંઘુ, ચાંદીના ભાવમાં મોટો ઘટાડો, જાણો લેટેસ્ટ રેટ

Gold Price Today: જો તમે સોનું કે ચાંદી ખરીદવાનો પ્લાન બનાવી રહ્યા છો, તો બજારમાં જતાં પહેલા આજના લેટેસ્ટ ભાવ જાણવા ખૂબ જ જરૂરી છે. વૈશ્વિક બજારમાં ચાલી રહેલા યુદ્ધ અને ભૌગોલિક તણાવની સીધી અસર ભારતના બુલિયન માર્કેટ પર પડી રહી છે. ડોમેસ્ટિક અને ગ્લોબલ ફેક્ટર્સના કારણે સોનાના ભાવમાં ફરી એકવાર ભડકો જોવા મળ્યો છે, જ્યારે ચાંદીના ભાવમાં ગ્રાહકોને થોડી રાહત મળી છે.

શા માટે વધી રહ્યા છે સોનાના ભાવ?

ભૌગોલિક તણાવ વધવાના કારણે રોકાણકારો સોનાને સૌથી સુરક્ષિત રોકાણ માની રહ્યા છે. અમેરિકા, ઈઝરાયેલ અને ઈરાન વચ્ચે ચાલી રહેલા યુદ્ધની અસર બજાર પર સ્પષ્ટ દેખાય છે. અમેરિકન રાષ્ટ્રપતિ ડોનાલ્ડ ટ્રમ્પે હાલમાં જ એક ઇન્ટરવ્યુમાં કહ્યું છે કે અમેરિકા અને તેના સહયોગીઓએ પોતાના લક્ષ્યો પૂરા કરી લીધા છે અને ઈરાનમાં હવે હુમલો કરવા જેવું ખાસ કંઈ બચ્યું નથી. તેમના મતે આ યુદ્ધ બહુ જલ્દી ખતમ થઈ શકે છે.

જોકે, આ નિવેદન વચ્ચે ઈઝરાયેલના રક્ષા મંત્રી ઈઝરાયેલ કાટ્ઝે સ્પષ્ટ કર્યું છે કે જ્યાં સુધી સંપૂર્ણ સૈન્ય લક્ષ્યો પૂરા નહીં થાય અને નિર્ણાયક જીત નહીં મળે, ત્યાં સુધી લડાઈ ચાલુ રહેશે. નોંધનીય છે કે આ ખુલ્લી જંગ 28 ફેબ્રુઆરી 2026 ના રોજ શરૂ થઈ હતી, જ્યારે ઈઝરાયેલ અને અમેરિકાએ ઈરાન પર એર સ્ટ્રાઈક કરી હતી. જેના જવાબમાં ઈરાને પણ મિસાઈલ અને ડ્રોનથી હુમલા કર્યા હતા. આ જ અસ્થિરતાના કારણે આંતરરાષ્ટ્રીય બજારમાં હાજર સોનું 5189.05 ડોલર પ્રતિ ઔંસના રેકોર્ડ સ્તરે પહોંચી ગયું છે.

12 માર્ચની સવારના આંકડા મુજબ દેશમાં સોનાના ભાવમાં વધારો નોંધાયો છે. ચાલો જાણીએ મોટા શહેરોના રેટ

દિલ્હી: રાજધાની દિલ્હીમાં 24 કેરેટ સોનાનો ભાવ 163470 રૂપિયા પ્રતિ 10 ગ્રામ છે. જ્યારે 22 કેરેટનો ભાવ 149860 રૂપિયા પ્રતિ 10 ગ્રામ પર પહોંચ્યો છે. (એક દિવસ પહેલા દિલ્હીના શરાફા બજારમાં સોનું 900 રૂપિયા એટલે કે 0.54 ટકા વધીને 165600 રૂપિયા પ્રતિ 10 ગ્રામ થઈ ગયું હતું).

મુંબઈ, ચેન્નઈ અને કોલકાતા: આ મેટ્રો શહેરોમાં 24 કેરેટ સોનું 163320 રૂપિયા પ્રતિ 10 ગ્રામ અને 22 કેરેટ સોનું 149710 રૂપિયા પ્રતિ 10 ગ્રામના સ્તરે વેચાઈ રહ્યું છે.

પુણે અને બેંગલુરુ: આ શહેરોમાં પણ 24 કેરેટ ગોલ્ડનો રેટ 163320 રૂપિયા અને 22 કેરેટ ગોલ્ડનો રેટ 149710 રૂપિયા પ્રતિ 10 ગ્રામ ચાલી રહ્યો છે.

ચાંદીના ભાવમાં નોંધાયો ઘટાડો

બીજી તરફ, કિંમતી ધાતુ ચાંદીમાં 12 માર્ચની સવારે ઘટાડો જોવા મળ્યો છે. હાલમાં ચાંદીનો ભાવ ઘટીને 289900 રૂપિયા પ્રતિ કિલોગ્રામ પર આવી ગયો છે. એક દિવસ પહેલા દિલ્હીના બજારમાં ચાંદીના ભાવમાં 4275 રૂપિયા (1.53 ટકા) નો મોટો કડાકો બોલ્યો હતો અને ભાવ 275000 રૂપિયા પ્રતિ કિલોગ્રામ પર પહોંચી ગયો હતો.

આંતરરાષ્ટ્રીય માર્કેટની વાત કરીએ તો ચાંદી 86.69 ડોલર પ્રતિ ઔંસ પર ટ્રેડ કરી રહી છે. તમને જણાવી દઈએ કે, માર્કેટની આ ભારે ઉથલપાથલ વચ્ચે આ વર્ષે જાન્યુઆરી મહિનામાં ચાંદીએ 4 લાખ રૂપિયાનો ઐતિહાસિક આંકડો પણ ક્રોસ કરી લીધો હતો. જો તમે સોના-ચાંદીમાં રોકાણ કરવા માંગો છો, તો વૈશ્વિક બજારની સ્થિતિ પર નજર રાખવી ખૂબ જરૂરી છે.

આ પણ વાંચો-Stocks to Watch: સેન્સેક્સની એક્સપાયરીના દિવસે બજારમાં રહેશે ઉતાર-ચઢાવ! Wipro, Ashok Leyland અને Borosil સહિત આ શેરો પર રાખો નજર