India Oil Import Policy: સસ્તું અને સારામાં સારું ક્રૂડ ઓઈલ જ્યાંથી મળશે ત્યાંથી ભારત ખરીદશે: સરકારે સંસદીય સમિતિને કરી સ્પષ્ટતા

India Oil Import Policy: ભારત સરકારે પોતાની ઓઈલ ઈમ્પોર્ટ (તેલની આયાત) નીતિને લઈને ફરી એકવાર મોટું નિવેદન આપ્યું છે. મંગળવારે યોજાયેલી સંસદીય સમિતિની બેઠકમાં સરકારે સ્પષ્ટ કર્યું છે કે ભારત કાચા તેલ (Crude Oil) ની ખરીદી માટે કોઈ એક દેશ પર નિર્ભર નથી. ભારતને જ્યાંથી પણ સસ્તું અને શ્રેષ્ઠ ગુણવત્તાવાળું તેલ મળશે, ત્યાંથી તે ખરીદવાનું ચાલુ રાખશે.

સંસદીય સમિતિ સમક્ષ સરકારે મૂકી પોતાની વાત

કોંગ્રેસ નેતા શશિ થરૂરની અધ્યક્ષતામાં વિદેશી બાબતોની સંસદીય સ્થાયી સમિતિની એક મહત્વપૂર્ણ બેઠક મળી હતી. આ બેઠકમાં વિદેશ મંત્રાલય અને વાણિજ્ય મંત્રાલયના ટોચના અધિકારીઓ હાજર રહ્યા હતા. સૂત્રોના જણાવ્યા અનુસાર, અધિકારીઓએ સમિતિને જણાવ્યું કે ભારતીય ઓઈલ કંપનીઓ તેલ ખરીદતી વખતે માત્ર બે જ બાબતો પર ધ્યાન આપશે: એક તો તેલનો ભાવ સસ્તો હોવો જોઈએ અને બીજું તેની ક્વોલિટી સારી હોવી જોઈએ.

જોકે, આ ખરીદી કરતી વખતે ભારત ભૂ-રાજકીય પરિસ્થિતિ (Geopolitical Situation) અને જે સ્ત્રોતો પર પ્રતિબંધ નથી, તેને ધ્યાનમાં રાખશે. આ બેઠક લગભગ 3 કલાકથી વધુ સમય સુધી ચાલી હતી અને સમિતિના કુલ 30 સભ્યોમાંથી 28 સભ્યોએ તેમાં ભાગ લીધો હતો, જે આ વિષયનું મહત્વ દર્શાવે છે.

આ બેઠકમાં માત્ર ઓઈલ જ નહીં, પરંતુ ભારત અને અમેરિકા વચ્ચેના વેપાર કરારો પર પણ વિગતવાર ચર્ચા થઈ હતી. શશિ થરૂરે મીડિયા સાથેની વાતચીતમાં જણાવ્યું કે, "અધિકારીઓએ પૂછાયેલા દરેક સવાલના જવાબ ખૂબ જ આત્મવિશ્વાસ અને વિગતવાર આપ્યા હતા. આ બેઠક સમિતિના કામકાજનું ઉત્તમ ઉદાહરણ હતી."

સરકાર તરફથી વિદેશ સચિવ વિક્રમ મિસરીએ પણ સમિતિ સમક્ષ પોતાની વાત રજૂ કરી હતી. બેઠકમાં મુખ્યત્વે નીચે મુજબના મુદ્દાઓ પર ચર્ચા થઈ હતી:

ભારત-અમેરિકા વ્યાપાર સમજૂતી

* ભારત-યુરોપિયન યુનિયન મુક્ત વ્યાપાર કરાર (FTA)

* રશિયન ઓઈલ અને કૃષિ ઉત્પાદનોની આયાત-નિકાસ

* રશિયન ઓઈલ અને અમેરિકાના ટેરિફનો મુદ્દો

ઉલ્લેખનીય છે કે, હાલમાં જ ભારત અને અમેરિકા વચ્ચે એક વ્યાપાર સમજૂતીની જાહેરાત થઈ હતી. વ્હાઇટ હાઉસ દ્વારા જારી કરાયેલ ફેક્ટ શીટમાં દાવો કરવામાં આવ્યો હતો કે ભારતે રશિયા પાસેથી ક્રૂડ ઓઈલની ખરીદી રોકવાની ખાતરી આપી છે. જેના બદલામાં અમેરિકી રાષ્ટ્રપતિ ડોનાલ્ડ ટ્રમ્પે ભારત પર લગાવવામાં આવેલો 25% વધારાનો ટેરિફ હટાવવાની જાહેરાત કરી હતી.

આ મુદ્દે પણ બેઠકમાં ચર્ચા થઈ હતી. અમેરિકા દ્વારા લાદવામાં આવતા 18% જવાબી ટેરિફ પર શશિ થરૂરે ચિંતા વ્યક્ત કરતા કહ્યું કે આંતરરાષ્ટ્રીય વ્યાપારમાં હવે વેપારને એક હથિયાર તરીકે વાપરવામાં આવી રહ્યો છે. જોકે, અધિકારીઓએ સમિતિને જણાવ્યું કે ભારત અને અમેરિકા હાલમાં એક વચગાળાના કરારને આખરી ઓપ આપવા પર કામ કરી રહ્યા છે.

સાંસદોએ બેઠકને ગણાવી ઉપયોગી

આમ આદમી પાર્ટીના સાંસદ રાઘવ ચઢ્ઢાએ પણ આ બેઠકને ખૂબ જ ઉપયોગી ગણાવી હતી. તેમણે કહ્યું કે અધિકારીઓએ વ્યાપાર કરારોના દરેક પાસા પર ખૂબ જ સરળ અને વિસ્તૃત રીતે સમજણ આપી છે. એકંદરે, સરકારે સ્પષ્ટ સંદેશ આપ્યો છે કે ઉર્જા સુરક્ષા (Energy Security) અને દેશના નાગરિકોને સસ્તું ઈંધણ પૂરું પાડવું એ ભારતની પ્રાથમિકતા છે.

આ પણ વાંચો- વાયદા બજારમાં મોટો ધડાકો: ચાંદીમાં એક જ દિવસમાં 8290નો તોતિંગ ઉછાળો, સોનું પણ 1600 મોંઘું! જાણો આજના લેટેસ્ટ ભાવ