Currency Market: ક્રૂડ ઓઇલ સસ્તું થતાં રૂપિયામાં શાનદાર રિકવરી, ડોલર સામે 94.61 પર પહોંચ્યો, જાણો બોન્ડ યીલ્ડની સ્થિતિ

Currency Market: ભારતીય કરન્સી માર્કેટમાં મંગળવારે સકારાત્મક માહોલ જોવા મળ્યો છે. અમેરિકા અને ઈરાન વચ્ચે ચાલી રહેલા શાંતિ કરારના અહેવાલોથી કાચું તેલ સસ્તું થયું છે, જેનો સીધો ફાયદો ભારતીય રૂપિયાને મળ્યો છે.

આંકડાકીય રીતે જોઈએ તો, મંગળવારે રૂપિયો US ડોલર સામે 10 પૈસાની મજબૂતી સાથે 94.61 ના સ્તર પર ખુલ્યો હતો. અગાઉ સોમવારે રૂપિયો 94.71 ના સ્તરે બંધ રહ્યો હતો. રોકાણકારો સતત એ વાતનો અંદાજ લગાવી રહ્યા છે કે ક્રૂડ ઓઇલના ઘટતા ભાવ રૂપિયાને કેટલો ફાયદો કરાવશે.

રૂપિયામાં તેજી અને ક્રૂડ ઓઇલનું કનેક્શન

છેલ્લા બે ટ્રેડિંગ સેશનમાં સ્થાનિક કરન્સી (રૂપિયા) માં લગભગ 1.1% નો ઉછાળો જોવા મળ્યો છે. આ તેજી પાછળનું મુખ્ય કારણ કાચા તેલના ભાવમાં આવેલો મોટો ઘટાડો છે.સોમવારે બ્રેન્ટ ક્રૂડનો ભાવ ઘટીને $82.40 પ્રતિ બેરલ પર આવી ગયો હતો, જે છેલ્લા ત્રણ મહિનાથી વધુ સમયનું સૌથી નીચલું સ્તર છે. એક બેંકના કરન્સી ટ્રેડરના જણાવ્યા અનુસાર, "જો ક્રૂડ ઓઇલના ભાવમાં આ ઘટાડો ચાલુ રહેશે, તો રૂપિયો 93.50 થી 94.00 ના સ્તર સુધી જવાની પૂરી શક્યતા છે." જોકે, તેમણે એવી ચેતવણી પણ આપી કે જો ક્રૂડના ભાવ ફરી ઉછળશે તો રૂપિયા પર દબાણ વધી શકે છે.

મંગળવારે ગ્લોબલ માર્કેટમાં થોડી સાવચેતી જોવા મળી હતી. અમેરિકા-ઈરાન કરારને લઈને શરૂઆતી ઉત્સાહ હવે ધીમો પડી રહ્યો છે. આ જ કારણે ક્રૂડના ભાવમાં નજીવો વધારો થયો, જ્યારે મોટાભાગની એશિયન કરન્સી અને ઇક્વિટી નબળી પડી હતી. આ સાથે જ US ટ્રેઝરી યીલ્ડમાં પણ વધારો જોવા મળ્યો હતો.

MUFG બેંકના એનાલિસ્ટનું કહેવું છે કે હજુ સુધી આ ડીલની સંપૂર્ણ વિગતો બહાર આવી નથી. દુનિયાના મુખ્ય ઓઇલ શિપિંગ રૂટ 'સ્ટ્રેટ ઓફ હોર્મુઝ' ને ક્યારે ખોલવામાં આવશે તેની ટાઈમલાઈન અંગે અનિશ્ચિતતા છે. માર્કેટની આ તેજી કેટલી ટકશે તેનો આધાર વાતચીત કેવી રીતે આગળ વધે છે તેના પર છે.

ભારતીય અર્થવ્યવસ્થાને ફાયદો

ભારત ક્રૂડ ઓઇલનો ખૂબ મોટો આયાતકાર દેશ છે. જ્યારે પણ આંતરરાષ્ટ્રીય બજારમાં કાચા તેલના ભાવ ઘટે છે, ત્યારે દેશની વ્યાપાર ખાધ અને કરન્ટ એકાઉન્ટ ડેફિસિટમાં મોટી રાહત મળે છે. આર્થિક ચિંતાઓ ઘટવાથી રૂપિયાને સીધો સપોર્ટ મળે છે.

બોન્ડ માર્કેટની સ્થિતિ

16 જૂનના રોજ ભારત સરકારના બોન્ડ એકદમ સ્થિર ખુલ્યા હતા. રોકાણકારો હાલ સીઝફાયર ડીલ અંગે વધુ માહિતીની રાહ જોઈ રહ્યા છે. 10 વર્ષીય બેન્ચમાર્ક યીલ્ડ 6.8693% પર ટ્રેડ કરી રહી હતી, જે અગાઉના સેશનમાં 6.8704% હતી.

આ પણ વાંચો-Share Market Rally: મેટલ સેક્ટરના દબાણ છતાં સેન્સેક્સમાં 400 પોઈન્ટનો ઉછાળો, જાણો માર્કેટની રોનકના 5 મુખ્ય કારણો