Silver Price: ચાંદીના ભાવમાં તોફાની તેજી! એક જ દિવસમાં 6%નો ઉછાળો, ભાવ 2.67 લાખને પાર; હવે રોકાણકારોએ શું કરવું?

Silver Price Today: સોમવાર, 23 ફેબ્રુઆરીનો દિવસ ચાંદીના રોકાણકારો માટે જબરદસ્ત ફાયદાકારક સાબિત થયો છે. સપ્તાહના પ્રથમ દિવસે જ ચાંદીની કિંમતોમાં (Silver Prices) જોરદાર તેજી જોવા મળી છે. દુનિયાભરમાં વધી રહેલા તણાવ અને સુરક્ષિત રોકાણ તરફ લોકોના ઝુકાવને કારણે કિંમતી ધાતુઓમાં ખરીદી નીકળી છે.

MCX પર ચાંદીમાં મોટો ઉછાળો

મલ્ટી કોમોડિટી એક્સચેન્જ (MCX) પર સોમવારે ચાંદીના વાયદા બજારમાં મોટો ભડકો જોવા મળ્યો હતો. ચાંદીનો ભાવ 2,67,673 રૂપિયા પ્રતિ કિલોગ્રામ પર ખૂલ્યો હતો. જે પાછલા બંધ ભાવની સરખામણીએ સીધો 5.82%નો જંગી ઉછાળો દર્શાવે છે. આ આંકડાઓ રોકાણકારોને ચોંકાવી દેનારા છે.

બીજી તરફ, ઈન્ડિયન બુલિયન જ્વેલર્સ એસોસિએશન (IBJA) દ્વારા 999 શુદ્ધતા વાળી ચાંદીનો સ્ટાન્ડર્ડ ભાવ 2,50,314 રૂપિયા પ્રતિ કિલોગ્રામ નક્કી કરવામાં આવ્યો છે, જે ગત બંધ ભાવ કરતા 2.26% વધારે છે. આંતરરાષ્ટ્રીય માર્કેટની વાત કરીએ તો, કોમેક્સ (Comex) પર પણ સ્પોટ સિલ્વર 5.65% ની તેજી સાથે 86.90 ડોલર પ્રતિ ઓંસ પર ટ્રેડ થઈ રહી હતી.

માર્કેટના જાણકારોના મતે, આ તેજી પાછળનું મુખ્ય કારણ ‘જીઓ-પોલિટિકલ ટેન્શન' (ભૂ-રાજકીય તણાવ) છે. અમેરિકા અને ઈરાન વચ્ચેનો તણાવ તથા રશિયા-યુક્રેન વચ્ચે ચાલી રહેલી ગતિવિધિઓને કારણે રોકાણકારો શેરબજાર જેવા જોખમી વિકલ્પો છોડીને સોના-ચાંદી જેવા ‘સેફ હેવન' (સુરક્ષિત રોકાણ) તરફ વળ્યા છે. જોકે, હાલમાં અમેરિકન ડોલરની મજબૂતીની અસર પણ બજાર પર દેખાઈ રહી છે.

અમેરિકામાં જાન્યુઆરી મહિનાના મોંઘવારીના આંકડા થોડા નરમ આવ્યા હતા, જેનાથી વ્યાજદરમાં ઘટાડાની આશા જાગી હતી. પરંતુ, મજબૂત નોન-ફાર્મ પેરોલ ડેટા અને સ્થિર આર્થિક ગ્રોથના આંકડાઓએ ફેડરલ રિઝર્વ દ્વારા તાત્કાલિક વ્યાજદર ઘટાડવાની શક્યતાઓ ઓછી કરી દીધી છે. જેના કારણે ડોલર મજબૂત થયો છે અને કિંમતી ધાતુઓમાં વોલેટિલિટી (ઉતાર-ચઢાવ) વધી છે.

હવે રોકાણકારોએ શું કરવું?

હવે બજારની નજર ફેડરલ રિઝર્વની જાન્યુઆરી મહિનાની મિટિંગના મિનિટ્સ (દસ્તાવેજો) પર છે. આ રિપોર્ટ પરથી વ્યાજદરો કઈ દિશામાં જશે તેનો સ્પષ્ટ સંકેત મળશે. વ્યાજદરનો નિર્ણય જ સોના અને ચાંદીની આગળની ચાલ નક્કી કરશે.

ઓગમોન્ટ બુલિયન (Augmont Bullion)ના 20 ફેબ્રુઆરીના રિપોર્ટ મુજબ, ચાંદી હાલમાં 70 થી 90 ડોલર પ્રતિ ઓંસ (એટલે કે ભારતીય રૂપિયામાં અંદાજે 2,25,000થી 2,85,000 રૂપિયા પ્રતિ કિલોગ્રામ) ની રેન્જમાં રહી શકે છે. રિપોર્ટમાં ચેતવણી પણ આપવામાં આવી છે કે જો ભાવ 70 ડોલરની નીચે જાય, તો તે ગગડીને 64 ડોલર (આશરે 2,00,000 રૂપિયા પ્રતિ કિલોગ્રામ) સુધી પણ જઈ શકે છે.

એક્સપર્ટ્સ રોકાણકારોને હાલમાં “ઘટાડા પર ખરીદી અને ઉછાળે નફા વસૂલી” (Buy on dips, Sell on rise)ની રણનીતિ અપનાવવાની સલાહ આપી રહ્યા છે. ટૂંકમાં કહીએ તો, તેજી મજબૂત છે પણ ગ્લોબલ સંકેતો પર નજર રાખવી જરૂરી છે.

આ પણ વાંચો- IT Stocks News: જેફરીઝે TCS અને ઇન્ફોસિસ સહિત 6 કંપનીઓના ટાર્ગેટ પ્રાઇસમાં કર્યો 33%નો ઘટાડો, જાણો શું છે કારણ?

(ડિસ્ક્લેમર: Moneycontrol પર એક્સપર્ટ્સ કે બ્રોકરેજ ફર્મ્સ દ્વારા આપવામાં આવેલા વિચારો તેમના અંગત હોય છે. વેબસાઈટ કે મેનેજમેન્ટ તેના માટે જવાબદાર નથી. કોઈપણ રોકાણ કરતા પહેલા પ્રમાણિત આર્થિક સલાહકારની મદદ લેવી હિતાવહ છે.)