Crude Oil Price: મિડલ ઈસ્ટમાં યુદ્ધનો ભડકો, કાચા તેલના ભાવ ઉછળીને 97 ડોલરને પાર, જાણો બજારની સ્થિતિ

Crude Oil Price: પશ્ચિમ એશિયામાં ફરી એકવાર યુદ્ધના વાદળો ઘેરાયા છે, જેની સીધી અને ગંભીર અસર ગ્લોબલ માર્કેટ પર પડી રહી છે. યુદ્ધની સ્થિતિને કારણે દુનિયાભરમાં કાચા તેલના સપ્લાયને લઈને ચિંતા વધી ગઈ છે, જેના પરિણામે કાચા તેલના ભાવમાં જોરદાર ભડકો જોવા મળ્યો છે.

સતત ત્રીજા દિવસે ક્રૂડના ભાવમાં ઉછાળો

મિડલ ઈસ્ટમાં તણાવ વધવાથી નિરાશાનો માહોલ છે, અને આ કારણે સતત ત્રીજા દિવસે ક્રૂડ ઓઈલ મોંઘુ થયું છે. અગાઉના બે ટ્રેડિંગ સેશનમાં પણ તેલની કિંમતોમાં 7% થી વધુનો મોટો ઉછાળો આવ્યો હતો. આજના લેટેસ્ટ આંકડા પર નજર કરીએ તો:

બ્રેન્ટ ક્રૂડ : કિંમતમાં 1.13% નો વધારો થયો છે, જેનાથી ભાવ $97.08 પ્રતિ બેરલ પર પહોંચી ગયો છે.

ઈઝરાયેલ, લેબનોન અને ઈરાન વચ્ચે ઘર્ષણ

હાલમાં ઈઝરાયેલ દ્વારા લેબનોન પર સતત હુમલાઓ ચાલુ છે. આ કારણે અમેરિકા અને ઈરાનવચ્ચે ચાલી રહેલી શાંતિ વાટાઘાટો ખતરામાં મુકાઈ ગઈ છે. બીજી તરફ, સોશિયલ મીડિયા પ્લેટફોર્મ 'X' પર યુએસ સેન્ટ્રલ કમાન્ડએ માહિતી આપી છે કે ઈરાને કુવૈત અને બહેરીન પર બેલિસ્ટિક મિસાઈલો છોડી હતી, જોકે તેને રસ્તામાં જ તોડી પાડવામાં આવી છે. આના જવાબમાં અમેરિકી સેનાએ ઈરાનના કેશમ આઈલેન્ડ પર જવાબી હુમલા કર્યા છે.

શાંતિ કરાર અંગે ડોનાલ્ડ ટ્રમ્પનું નિવેદન

બુધવારે ઈઝરાયેલ અને લેબનોન વચ્ચે વાતચીતનો એક નવો રાઉન્ડ યોજાવાનો છે. આ વચ્ચે પ્રેસિડેન્ટ ડોનાલ્ડ ટ્રમ્પે આશા વ્યક્ત કરી છે કે અમેરિકા ટૂંક સમયમાં ઈરાન સાથે વચગાળાનો શાંતિ કરાર કરી શકે છે. ટ્રમ્પે ઈરાની મીડિયાના એ રિપોર્ટ્સને ફગાવી દીધા છે, જેમાં કહેવાયું હતું કે લેબનોન યુદ્ધને કારણે અમેરિકા સાથેની વાતચીત અટકી ગઈ છે.

ABC ન્યૂઝના રિપોર્ટ મુજબ, ટ્રમ્પ ઈચ્છે છે કે યુદ્ધ રોકવાના કરારના ભાગરૂપે ઈરાન પોતાના પરમાણુ કાર્યક્રમ અંગે લેખિતમાં બાંહેધરી આપે. અગાઉ ઈરાને માત્ર મૌખિક ખાતરી જ આપી હતી.

ગ્લોબલ ઓઈલ સપ્લાય પર ખતરો

આ યુદ્ધને કારણે સીઝફાયરમાં વિલંબ થઈ રહ્યો છે. આ ઉપરાંત, હોર્મુઝ સ્ટ્રેટમાંથી થતા ઓઈલના સપ્લાયના ભવિષ્યને લઈને પણ કોઈ સ્પષ્ટતા નથી. જો ફારસની ખાડીમાંથી એક્સપોર્ટ રાબેતા મુજબ શરૂ નહીં થાય, તો દુનિયાએ પોતાના રિઝર્વ ક્રૂડ ઓઈલના ભંડારનો વધુ ઉપયોગ કરવો પડશે, જે ભવિષ્યમાં પેટ્રોલ-ડીઝલના ભાવમાં મોટો વધારો લાવી શકે છે.

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.

આ પણ વાંચો-Stocks to Watch: ઇન્ટ્રા-ડે ટ્રેડિંગ માટે તૈયાર રહો, આજે Infosys, Canara Bank અને Indigo સહિત આ શેરોમાં જોવા મળશે મોટો એક્શન