શું ડોલર સામે રૂપિયો ગગડીને 100 પર પહોંચી જશે? જાણો માર્કેટ એક્સપર્ટ્સની ચોંકાવનારી આગાહી

છેલ્લા કેટલાક અઠવાડિયાથી ડોલર સામે રૂપિયામાં સતત મોટો ઘટાડો જોવા મળી રહ્યો છે. ખાસ કરીને અમેરિકા-ઇઝરાયેલ અને ઈરાન વચ્ચે યુદ્ધ શરૂ થયા બાદ રૂપિયા પર દબાણ ખૂબ જ વધી ગયું છે. એક તરફ ડોલર મજબૂત થઈ રહ્યો છે અને બીજી તરફ રૂપિયો નબળો પડી રહ્યો છે. ત્યારે રોકાણકારો અને સામાન્ય માણસના મનમાં એક જ સવાલ છે કે, શું રૂપિયો ગગડીને 100 ના લેવલ પર પહોંચી જશે?

એક વર્ષમાં રૂપિયામાં 10% નો મોટો કડાકો

છેલ્લા એક વર્ષની વાત કરીએ તો રૂપિયો લગભગ 10% ગગડ્યો છે. એશિયામાં છેલ્લા કેટલાક મહિનાઓથી સૌથી ખરાબ પ્રદર્શન કરનારી કરન્સીમાં રૂપિયો સામેલ થઈ ગયો છે. આમ તો રૂપિયો પહેલાથી જ નબળો પડી રહ્યો હતો, પરંતુ મધ્ય પૂર્વમાં ચાલી રહેલા યુદ્ધે બળતામાં ઘી હોમવાનું કામ કર્યું છે. વેલ્સ ફાર્ગો અને વેનએકના એનાલિસ્ટ્સનું માનવું છે કે જો ક્રૂડના ભાવ વધવાનું ચાલુ રહેશે, તો રૂપિયાની સ્થિતિ હજુ વધુ બગડશે.

શું રૂપિયો 100 ના લેવલ પર પહોંચશે?

મોંઘા ક્રૂડ ઓઈલનો સીધો માર

ભારત પોતાની ક્રૂડ ઓઈલની જરૂરિયાત પૂરી કરવા માટે મોટાભાગે વિદેશી આયાત પર નિર્ભર છે. ક્રૂડ મોંઘુ થાય એટલે દેશનું ઈમ્પોર્ટ બિલ વધે છે. જેનાથી કરંટ એકાઉન્ટ ડેફિસિટ અને દેશમાં મોંઘવારી બંને વધે છે. અને આ જ કારણોસર રૂપિયો નબળો પડે છે. પશ્ચિમ એશિયામાં યુદ્ધ શરૂ થયા પછી ક્રૂડના ભાવમાં 44% નો ઉછાળો આવ્યો છે અને એક સમયે તે 119.50 ડોલર પ્રતિ બેરલની સપાટી સુધી પહોંચી ગયું હતું.

રિઝર્વ બેંકના પ્રયાસો રહ્યા નિષ્ફળ

RBI એ રૂપિયાને વધુ પડતો બચાવવા ઘણા પ્રયાસો કર્યા છે, પરંતુ તેની કોઈ ખાસ અને લાંબી અસર દેખાઈ નથી. ગયા મહિને જ, કેન્દ્રીય બેંકે ઓનશોર કરન્સી માર્કેટમાં બેંકોની એન્ડ-ઓફ-ડે પોઝિશન માટે 10 કરોડ ડોલરની લિમિટ નક્કી કરી દીધી હતી. આ નિર્ણયના બીજા દિવસે રૂપિયો 1.4% ઉછળ્યો હતો, પરંતુ કમનસીબે તે જ દિવસે ફરી ગગડીને 95.12 ના સ્તર પર આવી ગયો હતો.

જૂનના અંત સુધીમાં 100 નો આંકડો પાર થવાની શક્યતા

ઇક્વિટી ગ્રુપના ફાઇનાન્સિયલ માર્કેટ રિસર્ચના હેડ અહેમદ આઝમનું સ્પષ્ટ કહેવું છે કે, "ડોલર સામે રૂપિયાનું 100 નું લેવલ હવે બહુ દૂર નથી. જો બજારમાં હાલની પરિસ્થિતિઓ જળવાઈ રહેશે તો આવું ચોક્કસ થઈ શકે છે." બ્લૂમબર્ગના ડેટા અનુસાર, ડેરિવેટિવ્ઝ માર્કેટ પણ રૂપિયામાં હજુ 13% ના ઘટાડાનો સંકેત આપી રહ્યું છે. આ આંકડાઓ જોતાં જૂનના અંત સુધીમાં રૂપિયો ગગડીને 100 સુધી પહોંચી જાય તો નવાઈ નહીં.

આ પણ વાંચો-Market Outlook: શેરબજારમાં બમ્પર તેજી: બેન્ક નિફ્ટી સહિત તમામ ઇન્ડેક્સમાં ઉછાળો, જાણો 2 એપ્રિલે કેવી રહેશે માર્કેટની ચાલ