રામદેવના પતંજલિને હાઇકોર્ટનો મોટો આદેશ, ડાબર ચ્યવનપ્રાશને બદનામ કરતી જાહેરાત પર પ્રતિબંધ

દિલ્હી હાઈકોર્ટે યોગ ગુરુ બાબા રામદેવની કંપની પતંજલિ આયુર્વેદને મોટો ઝટકો આપ્યો છે. કોર્ટે ડાબર ઈન્ડિયા લિમિટેડની અરજી પર આદેશ આપ્યો છે કે પતંજલિ ડાબર ચ્યવનપ્રાશ વિરુદ્ધ ભ્રામક અને નકારાત્મક એડ પ્રસારિત ન કરે. આ આદેશ ન્યાયમૂર્તિ મિની પુષ્કર્ણાની અધ્યક્ષતાવાળી બેન્ચે આપ્યો હતો, અને કેસની આગળની સુનાવણી 14 જુલાઈ, 2025ના રોજ નક્કી કરવામાં આવી છે.

શું છે આખો મામલો?

ડાબર ઈન્ડિયાએ હાઈકોર્ટમાં એક અરજી દાખલ કરી હતી, જેમાં એવો આરોપ લગાવ્યો હતો કે પતંજલિના ટીવી એડ ડાબર ચ્યવનપ્રાશને નિશાન બનાવીને તેની છબી ખરડવાનો પ્રયાસ કરે છે. ડાબરના વરિષ્ઠ વકીલ સંદીપ સેઠીએ કોર્ટમાં દલીલ કરી કે પતંજલિના એડમાં દાવો કરવામાં આવે છે કે તેમનું ચ્યવનપ્રાશ 51થી વધુ જડીબુટ્ટીઓથી બનેલું છે, જ્યારે હકીકતમાં તેમાં માત્ર 47 જડીબુટ્ટીઓ છે. આ ઉપરાંત, ડાબરે એવો પણ આરોપ લગાવ્યો કે પતંજલિના ઉત્પાદનમાં પારો હોવાનું જણાયું છે, જે બાળકો માટે હાનિકારક હોઈ શકે છે.

ડાબરે વધુમાં જણાવ્યું કે પતંજલિએ તેમના ઉત્પાદનને "ઓરિજિનલ" ગણાવીને ડાબરના ચ્યવનપ્રાશને "સામાન્ય" તરીકે રજૂ કર્યું, જેનાથી ગ્રાહકોમાં ભ્રમ ફેલાય છે. સેઠીએ એ પણ નોંધ્યું કે ડિસેમ્બર 2024માં કોર્ટે સમન્સ જારી કર્યા હોવા છતાં, પતંજલિએ એક અઠવાડિયામાં 6,182 ભ્રામક એડ પ્રસારિત કરી.

પતંજલિ તરફથી વરિષ્ઠ વકીલ જયંત મહેતાએ આરોપોનો ખંડન કર્યું. તેમણે દલીલ કરી કે પતંજલિનું ઉત્પાદન આયુર્વેદિક ધોરણો અનુસાર બનાવવામાં આવ્યું છે અને તેમાં વપરાયેલી તમામ જડીબુટ્ટીઓ સુરક્ષિત છે. તેમણે એમ પણ કહ્યું કે ઉત્પાદનમાં કોઈ હાનિકારક તત્વો નથી, અને તે માનવ ઉપભોગ માટે સંપૂર્ણપણે સલામત છે.

ડાબરનું બજારમાં વર્ચસ્વ

ડાબરે કોર્ટમાં એવી દલીલ કરી કે તે ચ્યવનપ્રાશ માર્કેટમાં 61.6%નો હિસ્સો ધરાવે છે, અને પતંજલિની આવી એડ દ્વારા તેની પ્રતિષ્ઠાને નુકસાન થઈ શકે છે. ડાબરે એમ પણ કહ્યું કે આયુર્વેદિક ચ્યવનપ્રાશના ઉત્પાદન માટે ડ્રગ્સ એન્ડ કોસ્મેટિક્સ એક્ટ હેઠળ નિયત ધોરણોનું પાલન કરવું જરૂરી છે, જેનો ઉલ્લંઘન પતંજલિની એડ કરે છે.

શું હશે આગળ?

આ કેસ ભારતના FMCG સેક્ટરમાં એડવર્ટાઈઝિંગના ધોરણો અને નિયમોની ચર્ચાને ઉત્તેજન આપે છે. હાઈકોર્ટનો આ નિર્ણય ભવિષ્યમાં આવા વિવાદો માટે એક મહત્વનો નજીર બની શકે છે. આ કેસની આગળની સુનાવણી 14 જુલાઈએ થશે, જેમાં વધુ વિગતો સામે આવે તેવી શક્યતા છે.

આ પણ વાંચો- ડૉલરની દુર્દશા: 1973 પછીનું સૌથી મોટું ગાબડું, તમારા ખિસ્સા પર શું થશે અસર?