Hindalco Q1 Results : હિન્દાલ્કોની બમ્પર કમાણી, નફામાં 75%નો જંગી ઉછાળો, ઈતિહાસમાં પહેલીવાર 7000 કરોડનો આંકડો પાર કર્યો

Hindalco Q1 Results : આદિત્ય બિરલા ગ્રુપની ફ્લેગશિપ કંપની હિન્દાલ્કો ઇન્ડસ્ટ્રીઝે7 ઓગસ્ટના રોજ પોતાના એપ્રિલ-જૂન ક્વાર્ટરના શાનદાર પરિણામો જાહેર કર્યા છે. આ વખતે કંપનીએ કમાણીના તમામ જૂના રેકોર્ડ તોડી નાખ્યા છે અને પોતાના રોકાણકારોને ખુશ કરી દીધા છે.

ઇતિહાસમાં પ્રથમ વખત 7000 કરોડથી વધુ નફો

હિન્દાલ્કોના ઇતિહાસમાં આ પહેલીવાર બન્યું છે કે જ્યારે કંપનીએ કોઈ એક ક્વાર્ટરમાં 7,000 કરોડ રૂપિયાથી વધુનો નફો રળ્યો હોય.જૂન ક્વાર્ટરમાં કંપનીનો કન્સોલિડેટેડ ચોખ્ખો નફો વાર્ષિક ધોરણે 75 ટકા વધીને 7,013 કરોડ રૂપિયા નોંધાયો છે. ગયા વર્ષે આ જ સમયગાળામાં કંપનીનો નફો 4,004 કરોડ રૂપિયા હતો. જો આવકની વાત કરીએ તો, જૂન ક્વાર્ટરમાં કંપનીનું કન્સોલિડેટેડ રેવેન્યુ 32 ટકાના વધારા સાથે 84,825 કરોડ રૂપિયા પર પહોંચી ગયું છે. કંપનીનો એબિડ્ટા પણ 73 ટકાના ઉછાળા સાથે 14,989 કરોડ રૂપિયા રહ્યો છે.

વિવિધ બિઝનેસ સેક્ટરમાં રેકોર્ડ બ્રેક પ્રદર્શન

ઓપ્ટિમાઇઝેશન પ્રોગ્રામના ફાયદાથી નોવેલિસના નફામાં ઘણો સુધારો જોવા મળ્યો છે. તેનો એબિડ્ટા 37 ટકા વધીને 4,875 કરોડ રૂપિયા નોંધાયો છે. હાલમાં Bay Minuette માં પણ ઉત્પાદન શરૂ કરવાની પ્રક્રિયા ચાલી રહી છે. હિન્દાલ્કોના એલ્યુમિનિયમ અપસ્ટ્રીમ બિઝનેસનો એબિડ્ટા વાર્ષિક ધોરણે 81 ટકાના ગ્રોથ સાથે 7,390 કરોડ રૂપિયાના રેકોર્ડ લેવલ પર પહોંચી ગયો છે. કોપર બિઝનેસમાં પણ તેજી જોવા મળી છે. તેનો એબિડ્ટા 36 ટકા વધીને 918 કરોડ રૂપિયા થઈ ગયો છે. આ ઉપરાંત, જૂન મહિનાના અંતે હિન્દાલ્કોનો કન્સોલિડેટેડ નેટ ડેટ (દેવું) અને એબિડ્ટાનો રેશિયો 1.95 ગણો રહ્યો છે, જે ગયા વર્ષે સમાન ક્વાર્ટરમાં 1.02 ગણો હતો.

શેર બજારમાં હિન્દાલ્કોનો દબદબો

કંપનીના આ શાનદાર ત્રિમાસિક પરિણામોની સકારાત્મક અસર શેર બજારમાં પણ જોવા મળી હતી. રિઝલ્ટના આંકડા સામે આવતા જ હિન્દાલ્કોનો શેર 2.58 ટકા ઊછળીને 1,053 રૂપિયાના મજબૂત સ્તરે બંધ રહ્યો હતો.

જો લાંબા ગાળાના પ્રદર્શનની વાત કરીએ તો, છેલ્લા એક વર્ષમાં હિન્દાલ્કોના શેરમાં 53 ટકાથી વધુનો જબરદસ્ત ઉછાળો આવ્યો છે. નોંધનીય છે કે, આ જ એક વર્ષના સમયગાળામાં સેન્સેક્સમાં 2.63 ટકા અને નિફ્ટીમાં 0.27 ટકાનો ઘટાડો નોંધાયો છે, છતાં હિન્દાલ્કોનો શેર રોકાણકારો માટે મલ્ટીબેગર સાબિત થયો છે.

આ પણ વાંચો-Closing Bell : પશ્ચિમ એશિયાના તણાવથી સેન્સેક્સ 456 પોઈન્ટ ગગડ્યો, નિફ્ટી 24600ની નીચે બંધ

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.