Jioનો ટેકનોલોજીમાં દબદબો: પેટન્ટ ફાઇલિંગમાં દિગ્ગજ કંપનીઓને છોડી પાછળ, બની નંબર 1

Reliance Jio Patent Filing: રિલાયન્સ ઇન્ડસ્ટ્રીઝની ટેકનોલોજી કંપની, જિયો પ્લેટફોર્મ્સ લિમિટેડે નાણાકીય વર્ષ 2024-25માં એક નવી ઊંચાઈ હાંસલ કરી છે. સરકારી રિપોર્ટ અનુસાર, જિયો હવે ગ્લોબલ પેટન્ટ ફાઇલિંગના મામલે ભારતની નંબર 1 કંપની બની ગઈ છે. આ સિદ્ધિ કંપનીના આર્ટિફિશિયલ ઇન્ટેલિજન્સ (AI) અને ડીપ-ટેકનોલોજી પરના ફોકસનું પરિણામ છે.

પેટન્ટ ફાઇલિંગમાં જિયોનો દબદબો

પેટન્ટ, ડિઝાઇન અને ટ્રેડ માર્ક્સના કંટ્રોલર જનરલની ઓફિસ દ્વારા જાહેર કરાયેલા વાર્ષિક રિપોર્ટ મુજબ, જિયો પ્લેટફોર્મ્સે આ વર્ષે કુલ 1,037 આંતરરાષ્ટ્રીય પેટન્ટ ફાઈલ કર્યા છે. આ આંકડો એટલો મોટો છે કે બીજા ક્રમથી લઈને દસમા ક્રમ સુધીની તમામ કંપનીઓના કુલ પેટન્ટ કરતાં પણ બમણાથી વધુ છે.

જો સ્થાનિક પેટન્ટને પણ સામેલ કરવામાં આવે, તો જિયોના કુલ પેટન્ટની સંખ્યા 1,654 પર પહોંચી જાય છે. આ લિસ્ટમાં અન્ય મુખ્ય ભારતીય કંપનીઓ જિયોથી ઘણી પાછળ છે:

* CSIR: 70 પેટન્ટ

* IIT મદ્રાસ: 44 પેટન્ટ

* ઓલા ઇલેક્ટ્રિક: 31 પેટન્ટ

રિસર્ચ અને ડેવલપમેન્ટમાં પણ ભારે રોકાણ

આ સફળતા પાછળ કંપનીનું રિસર્ચ એન્ડ ડેવલપમેન્ટ (R&D)માં ભારે રોકાણ છે. નાણાકીય વર્ષ 2025માં, જિયોએ R&D પાછળ 4,185 કરોડ રૂપિયા ખર્ચ કર્યા, જે ગત વર્ષની સરખામણીમાં 14.9%નો વધારો દર્શાવે છે. આ રોકાણ કંપનીને નવી ટેકનોલોજી વિકસાવવામાં મદદ કરી રહ્યું છે.

મુકેશ અંબાણીનું 'ડીપ-ટેક' વિઝન

આટલી મોટી સંખ્યામાં પેટન્ટ ફાઇલ કરવી એ રિલાયન્સના ચેરમેન મુકેશ અંબાણીના વિઝનનો એક ભાગ છે. તેમણે 2025ની વાર્ષિક સામાન્ય સભા (AGM)માં કહ્યું હતું કે તેઓ રિલાયન્સને એક એવી "ડીપ-ટેક કંપની" બનાવવા માગે છે જેની પાસે પોતાની ઉત્પાદન ક્ષમતાઓ હોય.

રિલાયન્સ જિયો ઇન્ફોકોમના ચેરમેન આકાશ અંબાણીએ પણ આ વિશે વાત કરતાં જણાવ્યું હતું કે, "અમે દેશમાં જ અમારા એન્જિનિયરો દ્વારા ડિઝાઇન અને ડેવલપ કરેલા ટેકનોલોજી સ્ટેક પર કામ કર્યું છે. 5G કોર વિકસાવવાથી લઈને વિશ્વની પ્રથમ હોમ કનેક્ટ ટેકનોલોજી સુધી, અમે એક ડીપ-ટેક કંપની તરીકે અમારી ઓળખ મજબૂત કરી છે."

છેલ્લા ત્રણ વર્ષમાં જિયોએ ટેલિકોમ, AI અને ડિજિટલ ટેકનોલોજી ક્ષેત્રે 4,000 થી વધુ ગ્લોબલ એપ્લિકેશન્સ ફાઇલ કરી છે. આ આંકડા સ્પષ્ટપણે દર્શાવે છે કે જિયો હવે માત્ર એક ટેલિકોમ ઓપરેટર નથી, પરંતુ ટેકનોલોજીના સંશોધન અને વિકાસમાં પણ એક અગ્રણી ખેલાડી બની ગયું છે.

આ પણ વાંચો - Stocks to Watch: આજે 4 નવી લિસ્ટિંગ, Swiggy અને HCL Techમાં રહેશે મોટી હલચલ, જાણો કયા શેર્સ પર રાખવી નજર

ડિસ્ક્લેમરઃ મનીકંટ્રોલ ડૉટ કૉમ નેટવર્ક 18 સમૂહનો હિસ્સો છે. મનીકંટ્રોલ ડૉટ કૉમ અને અન્ય ડિઝિટલ, પ્રિન્ટ અને ટીવી ચેનલ નેટવર્ક 18 ના અંતર્ગત આવે છે. નેટવર્ક 18 ના સ્વામિત્વ અને પ્રબંધન રિલાયન્સ ઈન્ડસ્ટ્રીઝના હાથમાં છે.