ટાટાએ એર ઈન્ડિયાના કાયાકલ્પની કરી શરૂઆત, વિશ્વને પ્રથમ રેટ્રોફિટેડ એરક્રાફ્ટની બતાવી ઝલક

ટાટા ગ્રુપનો ભાગ બનેલી એર ઇન્ડિયાએ આજે ​​વિશ્વ સમક્ષ તેના પ્રથમ રેટ્રોફિટેડ નેરો બોડી એરક્રાફ્ટ VT-EXNની ઝલક રજૂ કરી. એરલાઇને આને તેના પરિવર્તન તરફ એક મોટું પગલું ગણાવ્યું છે. ટાટા ગ્રુપે 2022માં એર ઇન્ડિયા હસ્તગત કરી અને આ પ્રોસેસમાં 27 નેરો બોડી એરક્રાફ્ટ મેળવ્યા. આ A320neo વિમાન તેમાં સામેલ છે. આ વિમાન સંપૂર્ણપણે રૂપાંતરિત થઈ ગયું છે. તેમાં એક નવું કેબિન અને એડવાન્સ ફિચર્સ છે. વિમાનને રિટ્રોફિટિંગ કરવાનું કામ ગયા વર્ષે શરૂ થયું હતું. આ એર ઇન્ડિયાના તેના વિમાનોને સુધારવાના પ્રયાસોનો એક ભાગ છે. ટાટા ગ્રુપે એર ઇન્ડિયાના વિમાનોને રિટ્રોફિટ કરવા માટે $400 મિલિયનનો કાર્યક્રમ શરૂ કર્યો છે. આ અંતર્ગત વિમાનોનું નવીનીકરણ કરવામાં આવી રહ્યું છે. વિમાનમાં નવી સીટો, કાર્પેટ અને પડદા લગાવવામાં આવ્યા છે. તેમજ કેબિનને નવો લૂક આપવામાં આવ્યો છે. એર ઇન્ડિયાએ એક પ્રેસ રિલીઝમાં જણાવ્યું હતું કે, વિમાનમાં ત્રણ સીરીઝની સિટીંગ છે. આમાં બિઝનેસ, પ્રીમિયમ ઇકોનોમી અને ઇકોનોમીનો સમાવેશ થાય છે. આ બેઠકો મુસાફરોને આરામદાયક અને એડવાન્સ ફ્લાયનો એક્સપિરિયન્સ પૂરો પાડવા માટે બનાવવામાં આવી છે.

શું છે પ્લાન?

VT-EXNએ 27 A320neo એરક્રાફ્ટમાંથી પ્રથમ છે જે બદલાશે. 2025ના ત્રીજા ક્વાર્ટર સુધીમાં બધા 27 વિમાનોને બદલવાની યોજના છે. આ વિમાનો લોકલ અને ટૂંકા અંતરની આંતરરાષ્ટ્રીય ફ્લાઇટ્સ પર કામ કરશે. આ સાથે 14 નવા A320neo એરક્રાફ્ટ પણ હશે જેમાં સમાન સુવિધાઓ હશે. એરક્રાફ્ટ રેટ્રોફિટિંગ પ્રોગ્રામમાં 3,500થી વધુ ઇકોનોમી ક્લાસ સીટો, 600થી વધુ પ્રીમિયમ ઇકોનોમી સીટો અને 200 બિઝનેસ ક્લાસ સીટોનો સમાવેશ થશે.

આ સુધારેલા વિમાનમાં પોર્ટેબલ ઇલેક્ટ્રોનિક ડિવાઇસ હોલ્ડર્સ, USB પોર્ટ અને સુધારેલ વધુ આરામદાયક વાતાવરણ હશે. એરલાઈને જણાવ્યું હતું કે નવા કાર્પેટ, પડદા અને કેબિન પેનલ એર ઈન્ડિયાની નવી ઓળખ દર્શાવે છે. આ ફેરફાર ફક્ત નેરોબોડી એરક્રાફ્ટ પૂરતો મર્યાદિત નથી. એરલાઇન તેના મોટા વિમાનોને બદલવાની પણ યોજના બનાવી રહી છે. 40 B-787 અને B-777 વિમાનોનું પણ નવીનીકરણ કરવામાં આવશે. પ્રથમ B-787 વિમાન આવતા મહિને રિપ્લેસમેન્ટ માટે મોકલવામાં આવશે.