Innovision IPO લિસ્ટિંગ ડેટમાં ફરી ફેરફાર! હવે 23 માર્ચે શેર બજારમાં થશે એન્ટ્રી, ગ્રે માર્કેટમાં શેર ડિસ્કાઉન્ટ પર

Innovision IPO: મેઈનબોર્ડ સેગમેન્ટમાં આવનારા Innovision IPOની લિસ્ટિંગની તારીખ ફરી એકવાર લંબાઈ ગઈ છે. પહેલા આ શેર શુક્રવાર, 20 માર્ચના રોજ શેર બજારમાં લિસ્ટ થવાનો હતો, પરંતુ હવે તેમાં ફેરફાર કરવામાં આવ્યો છે. નવી અપડેટ મુજબ, હવે આ કંપનીના શેર 23 માર્ચના રોજ BSE અને NSE પર એન્ટ્રી કરશે. ચાલો આપણે આ આર્ટિકલમાં આ IPO વિશેની તમામ માહિતી વિગતવાર જાણીએ.

વારંવાર તારીખોમાં કેમ થયો ફેરફાર?

Innovision કંપનીના IPOની સફર અત્યાર સુધી રોકાણકારો માટે થોડી મૂંઝવણભરી રહી છે. શરૂઆતમાં આ ઇશ્યૂ 10 માર્ચના રોજ ખુલ્યો હતો અને 12 માર્ચના રોજ બંધ થવાનો હતો. તેની લિસ્ટિંગ માટે 17 માર્ચની તારીખ નક્કી કરવામાં આવી હતી.

જોકે, રોકાણકારો તરફથી જોઈએ તેવો ઉત્સાહ ન જોવા મળતાં (ઠંડા રિસ્પોન્સના કારણે) કંપનીના મેનેજમેન્ટ દ્વારા સબસ્ક્રિપ્શન ક્લોઝિંગ ડેટ વધારીને 17 માર્ચ કરવામાં આવી હતી. ક્લોઝિંગ ડેટ લંબાતા લિસ્ટિંગ ડેટ આપોઆપ 20 માર્ચ થઈ ગઈ હતી. પરંતુ, હવે કોઈ કારણસર આ તારીખને વધુ એક વખત આગળ ધપાવીને 23 માર્ચ કરવામાં આવી છે.

રોકાણકારોને આકર્ષવા માટે કંપનીએ પોતાના શેરના પ્રાઇસ બેન્ડમાં પણ ઘટાડો કર્યો હતો. અગાઉ આ પ્રાઇસ બેન્ડ 521 થી 548 રૂપિયા પ્રતિ શેર નક્કી કરવામાં આવ્યો હતો, જેને પાછળથી ઘટાડીને 494 થી 519 રૂપિયા પ્રતિ શેર કરવામાં આવ્યો હતો.

આ IPO વિશે વાત કરીએ તો:

કંપની 255 કરોડ રૂપિયાના 49 લાખ નવા શેર (Fresh Issue) જારી કરી રહી છે. આ ઉપરાંત, 64.25 કરોડ રૂપિયાના 12 લાખ શેરોની ઓફર ફોર સેલ (OFS) પણ રાખવામાં આવી છે. ગ્રે માર્કેટ (GMP) અને સબસ્ક્રિપ્શન સ્ટેટસ જે રોકાણકારોએ આ IPOમાં પૈસા લગાવ્યા છે તેમના માટે ચિંતાનો વિષય એ છે કે, Innovision નો શેર ગ્રે માર્કેટમાં ડિસ્કાઉન્ટ પર ટ્રેડ કરી રહ્યો છે. આના પરથી માર્કેટ નિષ્ણાતો એવો અંદાજ લગાવી રહ્યા છે કે શેરનું લિસ્ટિંગ નુકસાન (Listing Loss) સાથે થઈ શકે છે. જોકે શેરબજારમાં ક્યારે શું થાય તે પહેલેથી જ 100% નિશ્ચિત હોતું નથી.

સબસ્ક્રિપ્શનના આંકડાઓ પર નજર કરીએ તો, Innovision IPOને કુલ 3.46 ગણું સબસ્ક્રિપ્શન મળ્યું છે. ક્વાલિફાઇડ ઇન્સ્ટિટ્યુશનલ બાયર્સ (QIB) માટે રિઝર્વ રાખવામાં આવેલો હિસ્સો 14.30 ગણો ભરાયો હતો. નોન ઇન્સ્ટિટ્યુશનલ ઇન્વેસ્ટર્સ (NII) નો હિસ્સો 8.60 ગણો ભરાયો હતો. જ્યારે રિટેલ ઇન્વેસ્ટર્સ (સામાન્ય રોકાણકારો) નો હિસ્સો માત્ર 0.60 ગણો જ ભરાયો હતો.

Innovision કંપનીનું બેકગ્રાઉન્ડ શું છે?

Innovision Limited એ ભારતભરમાં પોતાના ક્લાયન્ટ્સને મેનપાવર સર્વિસિસ, ટોલ પ્લાઝા મેનેજમેન્ટ અને સ્કીલ ડેવલપમેન્ટ ટ્રેનિંગ જેવી મહત્વપૂર્ણ સેવાઓ પૂરી પાડે છે. સમગ્ર ભારતમાં કંપનીની કુલ 35 ઓફિસો આવેલી છે. 15 જાન્યુઆરી, 2026 ના ડેટા મુજબ, આ કંપની ભારતના 23 રાજ્યો અને 5 કેન્દ્રશાસિત પ્રદેશોમાં પોતાનું કામકાજ સફળતાપૂર્વક સંભાળી રહી હતી. કંપનીના પ્રમોટર્સમાં લેફ્ટિનેન્ટ કર્નલ રણદીપ હુંડલ અને ઉદય પાલ સિંહનો સમાવેશ થાય છે. નાણાકીય સ્થિતિ અને IPO ફંડનો ઉપયોગ કોઈપણ કંપનીમાં રોકાણ કરતા પહેલા તેની નાણાકીય સ્થિતિ (Financial Health) જાણવી ખૂબ જરૂરી છે.

એપ્રિલ થી સપ્ટેમ્બર 2025ના સમયગાળા દરમિયાન Innovisionની કુલ આવક 483.10 કરોડ રૂપિયા રહી હતી અને તેનો ચોખ્ખો નફો 20 કરોડ રૂપિયા નોંધાયો હતો. આ સમય દરમિયાન કંપની પર 112.39 કરોડ રૂપિયાની ઉધારી (દેવું) હતી. અગાઉ નાણાકીય વર્ષ 2025 ના સંપૂર્ણ વર્ષ દરમિયાન કંપનીની કુલ આવક 895.95 કરોડ રૂપિયા અને ચોખ્ખો નફો 29 કરોડ રૂપિયા રહ્યો હતો. કંપની આ નવા શેર ઇશ્યૂ કરીને મળનારા પૈસાનો ઉપયોગ પોતાના દેવાને (લોનને) અમુક અંશે અથવા સંપૂર્ણપણે ચૂકવવા, વર્કિંગ કેપિટલની જરૂરિયાતોને પૂરી કરવા અને અન્ય સામાન્ય કોર્પોરેટ હેતુઓ માટે કરશે.

Innovisionનો IPO શરૂઆતથી જ ધીમો રહ્યો છે. રિટેલ રોકાણકારોનો ઓછો રસ, તારીખોમાં વારંવાર થતા ફેરફાર અને ગ્રે માર્કેટમાં ચાલી રહેલું ડિસ્કાઉન્ટ દર્શાવે છે કે 23 માર્ચે લિસ્ટિંગ વખતે રોકાણકારોએ સાવચેત રહેવાની જરૂર છે. હવે માર્કેટ ઓપન થયા બાદ જ ખબર પડશે કે બજાર આ કંપનીને કેવો આવકાર આપે છે.

આ પણ વાંચો- HDFC બેંકના ચેરમેનના રાજીનામા છતાં બ્રોકરેજ ફર્મ્સ કેમ છે બુલિશ? શેરમાં 55% સુધીના જબરદસ્ત ઉછાળાની આગાહી

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.