IPO બજારમાં તેજીનો માહોલ: 18 વર્ષનો રેકોર્ડ તૂટ્યો, રોકાણકારો માટે સોનાની તક કે પછી જોખમ?

IPO News 2025: ભારતીય શેરબજાર માટે વર્ષ 2025 ખરેખર યાદગાર સાબિત થઈ રહ્યું છે. છેલ્લા 18 વર્ષમાં પહેલીવાર, મેઇનબોર્ડ IPO (પ્રારંભિક જાહેર ઓફર)ની સંખ્યા 100ના આંકડાને પાર કરવા જઈ રહી છે. આ એક એવો રેકોર્ડ છે જે છેલ્લે 2007માં બન્યો હતો. આ વર્ષે કંપનીઓએ IPO દ્વારા બજારમાંથી 1.70 લાખ કરોડ જેવી માતબર રકમ એકત્ર કરી છે, જે પોતે જ એક નવો માઈલસ્ટોન છે.

આ વર્ષે અત્યાર સુધીમાં 96 કંપનીઓ પોતાના IPO લાવી ચૂકી છે અને આવનારા દિવસોમાં વધુ 5 કંપનીઓ (આઈપ્રુ એસેટ, પાર્ક મેડી વર્લ્ડ, કોરોના રેમેડીઝ, નેફ્રોકેર હેલ્થ અને વેકફિટ ઇનોવેશન) લાઇનમાં છે. આ સાથે જ IPOની સદી પૂરી થઈ જશે. રસપ્રદ વાત એ છે કે, ભારતમાં સતત બીજા વર્ષે પ્રાઇમરી માર્કેટમાં આટલું મોટું ફંડ એકત્ર થયું છે.

બજારની ઉથલપાથલ છતાં IPO માર્કેટ કેમ મજબૂત રહ્યું?

જૂન મહિનાથી બજારમાં નબળા કોર્પોરેટ પરિણામો અને વૈશ્વિક અનિશ્ચિતતાઓને કારણે દબાણ જોવા મળ્યું હતું. નિફ્ટી, મિડકેપ અને સ્મોલકેપ જેવા મુખ્ય સૂચકાંકોમાં ઘટાડો પણ થયો. આમ છતાં, IPO માર્કેટ પર તેની કોઈ ખાસ અસર થઈ નથી. જૂન મહિનાથી દર મહિને સરેરાશ 8 કે તેથી વધુ IPO બજારમાં આવ્યા છે.

સપ્ટેમ્બર: આ મહિનો તો ઇતિહાસનો સૌથી વ્યસ્ત મહિનો રહ્યો, જેમાં 25 IPO આવ્યા. આવું છેલ્લે જાન્યુઆરી 1997માં જોવા મળ્યું હતું.

આ વર્ષે ટાટા કેપિટલ (15,512 કરોડ), LG ઇલેક્ટ્રોનિક્સ (11,604 કરોડ), અને લેન્સકાર્ટ સોલ્યુશન્સ (7,278 કરોડ) જેવી મોટી કંપનીઓના IPO પણ સફળ રહ્યા હતા.

રિટેલ રોકાણકારોનો ધસારો: લિસ્ટિંગ ગેઇનનું આકર્ષણ

આ IPO તેજી પાછળ રિટેલ એટલે કે નાના રોકાણકારોનો મોટો હાથ છે. આ વર્ષે લિસ્ટ થયેલી 93 કંપનીઓમાંથી 63 કંપનીઓએ રોકાણકારોને લિસ્ટિંગના દિવસે જ શાનદાર વળતર આપ્યું છે. કેટલાક IPOમાં તો રોકાણકારોને 76% સુધીનો જંગી નફો મળ્યો છે. આ "ઝડપી કમાણી"ના આકર્ષણને કારણે લાખો નવા રોકાણકારો બજાર તરફ ખેંચાયા છે. જોકે, અહીં એક સાવચેતી રાખવા જેવી બાબત પણ છે. ભલે લિસ્ટિંગ પર તગડો નફો મળ્યો હોય, પરંતુ લાંબા ગાળે ઇશ્યૂ કિંમતથી અત્યારના બજારભાવ સુધીનું સરેરાશ વળતર માત્ર 8% જ રહ્યું છે. આ દર્શાવે છે કે લિસ્ટિંગ પછી ઘણા શેર્સનું પ્રદર્શન નબળું પડ્યું છે.

ડીમેટ ખાતા ખોલાવવાની હોડ

IPOમાં રોકાણ કરવા માટે ડીમેટ ખાતું જરૂરી છે, અને આ IPO લહેરને કારણે ડીમેટ ખાતા ખોલાવવાની ગતિ પણ વધી છે. સિક્યુરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI) ના આંકડા મુજબ, દેશમાં રોકાણકારોની સંખ્યા 13.60 કરોડ અને ડીમેટ ખાતાઓની સંખ્યા 21 કરોડને પાર પહોંચી ગઈ છે.

ઓક્ટોબર 2025માં જ 30 લાખથી વધુ નવા ડીમેટ ખાતા ખુલ્યા હતા. આગામી મહિનાઓમાં પણ વધુ IPO આવવાના હોવાથી આ સંખ્યામાં હજુ વધારો થવાની પૂરી સંભાવના છે. આ આંકડા દર્શાવે છે કે ભારતમાં શેરબજારમાં રોકાણ કરવાનો ટ્રેન્ડ ઝડપથી વધી રહ્યો છે.