KSH International IPO: રોકાણકારોને નિરાશા! 3% ડિસ્કાઉન્ટ સાથે શેર બજારમાં લિસ્ટિંગ, જાણો કંપનીની આર્થિક કુંડળી

KSH International IPO: દેશમાં મેગ્નેટ વાયરના ઉત્પાદનમાં અગ્રણી અને ત્રીજા નંબરની સૌથી મોટી કંપની KSH International ના શેર્સ આજે શેરબજારમાં લિસ્ટ થયા છે. જોકે, રોકાણકારો માટે આજનો દિવસ થોડો નિરાશાજનક રહ્યો છે, કારણ કે કંપનીના શેર્સ પ્રીમિયમને બદલે ડિસ્કાઉન્ટ ભાવે લિસ્ટ થયા છે. કંપનીના IPOને રોકાણકારો તરફથી અપેક્ષા મુજબનો 'ઠંડો પ્રતિસાદ' મળ્યો હતો, જેની સીધી અસર તેના લિસ્ટિંગ પર જોવા મળી છે.

શેર લિસ્ટિંગ અને ભાવમાં ઘટાડો

KSH Internationalના IPO હેઠળ શેરનો ભાવ 384 નક્કી કરવામાં આવ્યો હતો. આજે BSE અને NSE બંને એક્સચેન્જ પર આ શેર 370 ના ભાવે લિસ્ટ થયો છે. આનો અર્થ એ થયો કે રોકાણકારોને લિસ્ટિંગ પર કોઈ નફો મળ્યો નથી, પરંતુ તેમની મૂડીમાં સીધો 3.65%નો ઘટાડો થયો છે. લિસ્ટિંગ બાદ પણ શેરમાં વેચવાલીનું દબાણ જોવા મળ્યું હતું અને ભાવ તૂટીને BSE પર 358.70 સુધી નીચે આવી ગયો હતો. આમ, IPO ભરનારા રોકાણકારો હાલમાં અંદાજે 6.59%ના નુકસાનમાં ચાલી રહ્યા છે.

IPO સબસ્ક્રિપ્શનની વિગતો

* ક્વોલિફાઇડ ઇન્સ્ટિટ્યુશનલ બાયર્સ (QIB) નો હિસ્સો 1.12 ગણો ભરાયો હતો.

* નોન-ઇન્સ્ટિટ્યુશનલ ઇન્વેસ્ટર્સ (NII) નો હિસ્સો માત્ર 0.44 ગણો ભરાયો હતો.

* રિટેલ રોકાણકારોનો હિસ્સો 0.91 ગણો સબસ્ક્રાઇબ થયો હતો.

IPO ફંડનો ઉપયોગ ક્યાં થશે?

આ IPO દ્વારા કંપનીએ કુલ 644 કરોડ એકત્ર કરવાનું આયોજન કર્યું હતું. જેમાં 420 કરોડના નવા શેર જારી કરવામાં આવ્યા છે, જ્યારે 5ની ફેસ વેલ્યુ ધરાવતા 58,45,001 શેર 'ઓફર ફોર સેલ' (OFS) હેઠળ વેચવામાં આવ્યા છે. OFSના પૈસા તો જૂના શેરધારકોને મળશે, પરંતુ નવા શેર દ્વારા એકત્ર કરાયેલા ભંડોળનો ઉપયોગ કંપની નીચે મુજબ કરશે:

* દેવું ચૂકવવા: આશરે 225.98 કરોડ કંપની પોતાના માથે રહેલું દેવું ઘટાડવા માટે વાપરશે.

* નવી મશીનરી: બે પ્લાન્ટ પર મશીનરીની ખરીદી અને સેટઅપ માટે 87.02 કરોડ ખર્ચવામાં આવશે.

* સોલાર પ્લાન્ટ: સુપા ફેસિલિટી ખાતે પાવર જનરેશન માટે રૂફટોપ સોલાર પાવર પ્લાન્ટ નાખવા માટે 8.83 કરોડ ફાળવવામાં આવ્યા છે.

* બાકીની રકમ સામાન્ય કોર્પોરેટ ઉદ્દેશ્યો માટે વાપરવામાં આવશે.

કંપની વિશે અને કારોબાર

વર્ષ 1979માં સ્થપાયેલી KSH International મેગ્નેટ વાયર બનાવતી ભારતની ત્રીજી સૌથી મોટી કંપની છે અને એક્સપોર્ટના મામલે સૌથી મોટી કંપની છે. KSH બ્રાન્ડ હેઠળ કંપની પાવર, રિન્યુએબલ એનર્જી, રેલવે, ઓટોમોટિવ અને ઇન્ડસ્ટ્રીયલ સેક્ટરમાં ઓરિજિનલ ઇક્વિપમેન્ટ મેન્યુફેક્ચરર્સ (OEM)ને માલ સપ્લાય કરે છે. તેના ગ્રાહકોમાં પાવર ગ્રીડ અને NTPC જેવી સરકારી કંપનીઓ સામેલ છે. આ ઉપરાંત, કંપની અમેરિકા, જર્મની, યુએઈ અને જાપાન સહિત કુલ 24 દેશોમાં નિકાસ કરે છે. મહારાષ્ટ્રના તલોજા અને ચાકનમાં કંપનીની ત્રણ મેન્યુફેક્ચરિંગ ફેસિલિટી આવેલી છે અને અહલ્યાનગરના સુપામાં ચોથો પ્લાન્ટ તૈયાર થઈ રહ્યો છે.

કંપનીનું આર્થિક સ્વાસ્થ્ય

કંપનીની આર્થિક સ્થિતિ છેલ્લાં કેટલાંક વર્ષોમાં મજબૂત થઈ છે.

* નફો: નાણાકીય વર્ષ 2023 માં કંપનીનો ચોખ્ખો નફો 26.61 કરોડ હતો, જે વર્ષ 2024 માં વધીને 37.35 કરોડ અને વર્ષ 2025 માં વધીને 67.99 કરોડ થયો છે.

* આવક: કંપનીની કુલ આવક વાર્ષિક 35% થી વધુના ચક્રવૃદ્ધિ દર (CAGR) થી વધીને 1,938.19 કરોડ પર પહોંચી છે.

* વર્તમાન સ્થિતિ: ચાલુ નાણાકીય વર્ષ 2026 ના પ્રથમ ક્વાર્ટર (એપ્રિલ-જૂન 2025) માં કંપનીએ 22.68 કરોડનો નફો અને 562.60 કરોડની આવક નોંધાવી છે.

* જૂન 2025ના અંતે કંપની પર કુલ 379.39 કરોડનું દેવું હતું, જ્યારે રિઝર્વ અને સરપ્લસમાં 293.07 કરોડ જમા હતા.

આ પણ વાંચો-  ભારત-બાંગ્લાદેશ તણાવ વચ્ચે રશિયાની એન્ટ્રી: કહ્યું- ‘વહેલી તકે સમાધાન કરો’, જાણો હિંસા પાછળનું કડવું સત્ય

ડિસ્ક્લેમર: અહીં આપેલી માહિતી સ્ટોક પર્ફોમન્સ પર આધારિત છે. એ નોંધવું અગત્યનું છે કે બજારમાં રોકાણ બજારના જોખમોને આધીન છે. રોકાણકાર તરીકે, પૈસાનું રોકાણ કરતા પહેલા હંમેશા નિષ્ણાતની સલાહ લો. મનીકંટ્રોલ ક્યારેય કોઈને અહીં પૈસા રોકવાની સલાહ આપતું નથી.