Novus Loyalty IPO Listing: બજારમાં એન્ટ્રી થતાં જ 146 રૂપિયાનો શેર ગગડ્યો, લોઅર સર્કિટ લાગતા રોકાણકારોને લાગ્યો મોટો ઝટકો!

Novus Loyalty IPO Listing: શેરબજારમાં રોકાણકારો હંમેશા IPO માંથી સારા લિસ્ટિંગ ગેઈનની આશા રાખતા હોય છે. પરંતુ દર વખતે આવું થાય તે જરૂરી નથી. આવું જ કંઈક નોવુસ લોયલ્ટી (Novus Loyalty) ના IPO માં રોકાણ કરનારાઓ સાથે થયું છે. લોયલ્ટી અને રિવોર્ડ સોલ્યુશન્સ પૂરા પાડતી આ કંપનીના શેર આજે BSE SME પ્લેટફોર્મ પર લિસ્ટ થયા છે, પરંતુ આ એન્ટ્રીએ રોકાણકારોને નિરાશ કર્યા છે. ચાલો જાણીએ આજના લિસ્ટિંગ અને કંપનીની સંપૂર્ણ ડિટેલ્સ.

લિસ્ટ થતા જ શેરમાં લાગી લોઅર સર્કિટ

નોવુસ લોયલ્ટીના શેરની આજે BSE SME પર એકદમ ફ્લેટ (સપાટ) એન્ટ્રી થઈ છે. કંપનીએ પોતાના IPO માટે પ્રતિ શેર 146 રૂપિયાનો ભાવ નક્કી કર્યો હતો. આજે બજારમાં તેનું લિસ્ટિંગ પણ બરાબર 146.00 રૂપિયા પર જ થયું. આનો સીધો અર્થ એ છે કે, જે રોકાણકારોને શેર લાગ્યા હતા તેમને શરૂઆતમાં શૂન્ય (0) લિસ્ટિંગ ગેઈન મળ્યો.

પરંતુ રોકાણકારો માટે મુશ્કેલી અહીં જ અટકી ન હતી. લિસ્ટિંગ થયાની થોડી જ વારમાં શેરમાં મોટો કડાકો બોલી ગયો. શેર તૂટીને 138.70 રૂપિયા (Novus Loyalty Share Price) પર આવી ગયો અને તેમાં લોઅર સર્કિટ લાગી ગઈ. આ ઘટાડાને કારણે IPO માં પૈસા લગાવનાર રોકાણકારો હવે 5.00% ના સીધા નુકસાનમાં છે.

નોવુસ લોયલ્ટીનો આ IPO 17 થી 20 માર્ચ વચ્ચે રોકાણ માટે ખુલ્લો મૂકવામાં આવ્યો હતો. કંપનીએ આ ઈશ્યૂ દ્વારા કુલ 60 કરોડ રૂપિયા એકઠા કરવાનો ટાર્ગેટ રાખ્યો હતો.

ઓવરઓલ સબસ્ક્રિપ્શન: આ IPO એકંદરે 1.55 ગણો ભરાયો હતો.

QIB (ક્વોલિફાઈડ ઈન્સ્ટીટ્યુશનલ બાયર્સ): આ કેટેગરીમાં 1.38 ગણું સબસ્ક્રિપ્શન (એક્સ-એન્કર) મળ્યું હતું.

NII (નોન-ઈન્સ્ટીટ્યુશનલ ઈન્વેસ્ટર્સ): આ હિસ્સો 1.17 ગણો ભરાયો હતો.

રિટેલ રોકાણકારો: સામાન્ય રોકાણકારોએ સૌથી વધુ રસ દાખવ્યો હતો અને આ ભાગ 1.82 ગણો છલકાયો હતો.

ક્યાં વપરાશે IPO ના 60 કરોડ રૂપિયા?

આ 60 કરોડ રૂપિયાના IPO માં બે ભાગ હતા. જેમાં 48 કરોડ રૂપિયાના નવા શેર (Fresh Issue) બહાર પાડવામાં આવ્યા છે, જ્યારે બાકીના 10 રૂપિયાની ફેસ વેલ્યુ ધરાવતા 8.20 લાખ શેર ઓફર ફોર સેલ (OFS) હેઠળ વેચવામાં આવ્યા છે. OFS હેઠળ મળેલા પૈસા સીધા તે શેરહોલ્ડર્સને જશે જેમણે પોતાના શેર વેચ્યા છે. જ્યારે નવા શેર દ્વારા મળેલા ફંડનો ઉપયોગ કંપની નીચે મુજબ કરશે:

13.00 કરોડ રૂપિયા: સિસ્ટમ અપગ્રેડેશન અને નવા પ્રોડક્ટ્સના ડેવલપમેન્ટ માટે.

9.62 કરોડ રૂપિયા: બિઝનેસ ડેવલપમેન્ટ, નવા સ્ટાફની ભરતી અને માર્કેટિંગ પાછળ.

બાકીની રકમ કંપનીના સામાન્ય કોર્પોરેટ હેતુઓ માટે વાપરવામાં આવશે.

નોવુસ લોયલ્ટી (Novus Loyalty) કંપની શું કામ કરે છે?

વર્ષ 2011માં સ્થપાયેલી આ કંપની મુખ્યત્વે અલગ અલગ ઇન્ડસ્ટ્રીઝને લોયલ્ટી અને રિવોર્ડ સોલ્યુશન્સ પૂરા પાડે છે. સાદી ભાષામાં કહીએ તો, ગ્રાહકોને જાળવી રાખવા માટે જે રિવોર્ડ પોઈન્ટ્સ કે લોયલ્ટી પ્રોગ્રામ ચલાવવામાં આવે છે, તેનું સોફ્ટવેર અને પ્લેટફોર્મ આ કંપની બનાવે છે.

કંપની ફિનટેક, ઈ-કોમર્સ, સોફ્ટવેર, બેન્કિંગ, FMCG અને રિયલ એસ્ટેટ જેવા સેક્ટર્સમાં કામ કરે છે. કંપની બે મોડલ પર કામ કરે છે - પહેલું રેડી ટુ યુઝ (સીધું વાપરી શકાય તેવું) અને બીજું ગ્રાહકની જરૂરિયાત મુજબ કસ્ટમાઇઝ કરી શકાય તેવું. તેમની સિસ્ટમ વેબ, મોબાઈલ એપ અને ફિઝિકલ સ્ટોર એમ બધે જ સરળતાથી કનેક્ટ થઈ જાય છે.

કંપનીની આર્થિક સ્થિતિ (Financial Health) કેટલી મજબૂત છે?

જો આપણે નોવુસ લોયલ્ટીના ફાઈનાન્સિયલ રિપોર્ટ પર નજર કરીએ, તો કંપની સતત પ્રોફિટમાં વધારો કરી રહી છે.

નાણાકીય વર્ષ 2023: કંપનીએ 55 લાખ રૂપિયાનો ચોખ્ખો નફો (Net Profit) નોંધાવ્યો હતો.

નાણાકીય વર્ષ 2024: નફો મોટો કૂદકો મારીને 2.96 કરોડ રૂપિયા થઈ ગયો.

નાણાકીય વર્ષ 2025: નફો વધુ વધીને 3.58 કરોડ રૂપિયા પર પહોંચી ગયો.

કુલ આવક: આ સમયગાળા દરમિયાન કંપનીની કુલ આવક 32% ના વાર્ષિક ચક્રવૃદ્ધિ દર (CAGR) થી વધીને 104.63 કરોડ રૂપિયા થઈ ગઈ છે.

ચાલુ નાણાકીય વર્ષ (2026): એપ્રિલ થી સપ્ટેમ્બર 2025 ના પ્રથમ છ મહિનામાં જ કંપનીએ 71.43 કરોડ રૂપિયાની કુલ આવક અને 5.80 કરોડ રૂપિયાનો ચોખ્ખો નફો કમાઈ લીધો છે.

સપ્ટેમ્બર 2025ના અંતે કંપનીના રિઝર્વ અને સરપ્લસ ખાતામાં 6.64 કરોડ રૂપિયા જમા હતા.

જોકે કંપનીના ફંડામેન્ટલ્સ અને આર્થિક આંકડા ખૂબ જ મજબૂત અને પોઝિટિવ દેખાઈ રહ્યા છે, પરંતુ શેરબજારના આજના મૂડ અને સપાટ લિસ્ટિંગે હાલ પૂરતો રોકાણકારોનો સ્વાદ બગાડી નાખ્યો છે. હવે જોવાનું એ રહે છે કે આવનારા દિવસોમાં આ શેર રિકવરી કરીને રોકાણકારોને ફાયદો કરાવે છે કે કેમ.

આ પણ વાંચો - શેરબજારમાં રિકવરીના સંકેત છતાં સાવચેતીનો માહોલ: જાણો આજના ટ્રેડિંગ માટે નિફ્ટી અને બેન્ક નિફ્ટીનો સંપૂર્ણ ટ્રેડ સેટઅપ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.