Yashhtej Industries IPO: રોકાણકારોને રાતા પાણીએ રોવડાવ્યા! 20% ડિસ્કાઉન્ટ સાથે લિસ્ટિંગ, ત્યારબાદ સીધી લોઅર સર્કિટ

Yashhtej Industries IPO: શેરબજારમાં SME IPO નો ક્રેઝ ચાલી રહ્યો છે, પરંતુ દરેક IPO કમાણી કરાવી આપે તે જરૂરી નથી. યશતેજ ઇન્ડસ્ટ્રીઝ (Yashhtej Industries India) ના કિસ્સામાં આવું જ કંઈક બન્યું છે. મંગળવારે, 25 ફેબ્રુઆરીના રોજ આ કંપનીનું લિસ્ટિંગ BSE SME પ્લેટફોર્મ પર થયું હતું, પરંતુ રોકાણકારો માટે આ શરૂઆત ખૂબ જ નિરાશાજનક રહી છે. જે રોકાણકારોએ નફાની આશાએ પૈસા રોક્યા હતા, તેમને પહેલા જ દિવસે મોટું નુકસાન વેઠવાનો વારો આવ્યો છે.

ભારે ડિસ્કાઉન્ટ સાથે લિસ્ટિંગ અને લોઅર સર્કિટ

યશતેજ ઇન્ડસ્ટ્રીઝના શેરનું લિસ્ટિંગ 20%ના ભારે ઘટાડા સાથે થયું હતું. કંપનીએ IPOમાં શેરની કિંમત (Issue Price) 110 રૂપિયા નક્કી કરી હતી, પરંતુ બજારમાં આ શેર 88 રૂપિયાના ભાવે ખુલ્યો હતો. એટલે કે લિસ્ટિંગ થતાની સાથે જ રોકાણકારોને શેર દીઠ 22 રૂપિયાનું નુકસાન ગયું હતું.

જોકે, વાત અહીં અટકી ન હતી. લિસ્ટિંગ બાદ તરત જ શેરમાં વેચવાલીનું દબાણ જોવા મળ્યું અને શેર વધુ 5% તૂટ્યો હતો. આ ઘટાડા સાથે શેર 83.60 રૂપિયાના સ્તરે પહોંચી ગયો અને ત્યાં લોઅર સર્કિટ (Lower Circuit) લાગી ગઈ હતી. આમ, પહેલા જ દિવસે રોકાણકારોની મૂડીમાં મોટું ધોવાણ થયું છે.

આ કંપનીનો કુલ 88.88 કરોડ રૂપિયાનો IPO 18 ફેબ્રુઆરીએ ખુલ્યો હતો અને 20 ફેબ્રુઆરીએ બંધ થયો હતો. રોકાણકારો તરફથી તેને મિશ્ર પ્રતિસાદ મળ્યો હતો.

કુલ સબસ્ક્રિપ્શન: 1.37 ગણું

* રિટેલ રોકાણકારો (Retail Investors): 2.35 ગણું

* નૉન-ઈન્સ્ટિટ્યુશનલ ઈન્વેસ્ટર્સ (NII): માત્ર 0.39 ગણું

આમ, રિટેલ રોકાણકારોએ થોડો રસ દાખવ્યો હતો, પરંતુ મોટા રોકાણકારો આ ઈશ્યુથી દૂર રહ્યા હતા, જેની અસર લિસ્ટિંગ પર પણ જોવા મળી છે.

કંપની શું બિઝનેસ કરે છે?

વર્ષ 2018માં સ્થપાયેલી યશતેજ ઇન્ડસ્ટ્રીઝ મુખ્યત્વે સોયાબીન પ્રોસેસિંગના બિઝનેસમાં છે. કંપની ‘સોલ્વન્ટ એક્સટ્રેક્શન પ્રોસેસ' દ્વારા સોયાબીનમાંથી ક્રૂડ ઓઈલ બનાવે છે અને તેનું પ્રોસેસિંગ કરે છે. આ ઉપરાંત, કંપની સોયાબીન ડી-ઓઈલ્ડ કેક (ખોળ) પણ બનાવે છે.

કંપનીનો બિઝનેસ ‘B2B' (બિઝનેસ ટુ બિઝનેસ) મોડલ પર ચાલે છે. એટલે કે, તેઓ સોયાબીન ક્રૂડ ઓઈલ સીધું એવા ગ્રાહકોને સપ્લાય કરે છે જેઓ રિફાઈનિંગનું કામ કરે છે. આ ઉપરાંત કંપનીએ હવે સોલાર પાવર જનરેશન (Solar Power Generation) ક્ષેત્રે પણ ઝુકાવ્યું છે.

કંપનીની આર્થિક સ્થિતિ અને ભંડોળનો ઉપયોગ

IPO દ્વારા એકત્ર કરાયેલા ભંડોળનો ઉપયોગ કંપની પોતાની મૂડી ખર્ચ (Capital Expenditure) ની જરૂરિયાતો પૂરી કરવા, વર્કિંગ કેપિટલ માટે અને સામાન્ય કોર્પોરેટ હેતુઓ માટે કરશે.

કંપનીના આર્થિક પાસાઓની વાત કરીએ તો, એપ્રિલ-સપ્ટેમ્બર 2025 ના સમયગાળામાં કંપનીની કુલ આવક 191.22 કરોડ રૂપિયા અને શુદ્ધ નફો 7.25 કરોડ રૂપિયા નોંધાયો હતો. આ સમયગાળામાં કંપની પર 37.47 કરોડ રૂપિયાનું દેવું હતું. જ્યારે સમગ્ર નાણાકીય વર્ષ દરમિયાન કુલ આવક 324.96 કરોડ અને નફો 11.57 કરોડ રૂપિયા રહ્યો હતો.

આ પણ વાંચો- Top 20 Stocks Today: આજે શેરબજારમાં આ શેરો મચાવશે ધમાલ! રોકાણ કરતા પહેલા લિસ્ટ જોઈ લો

(Disclaimer: અહીં આપેલી માહિતી માત્ર સમાચાર અને જાણકારીના હેતુ માટે છે. શેરબજારમાં રોકાણ જોખમોને આધીન છે. રોકાણ કરતા પહેલા હંમેશા તમારા નાણાકીય સલાહકાર અથવા એક્સપર્ટની સલાહ ચોક્કસ લો.)