Adani Controversy: USમાં અદાણી પર લાંચ અને છેતરપિંડીનો આરોપ, ધરપકડ વોરંટ ઇશ્યૂ

Gautam Adani Alleged Bribery and Fraud: અદાણી ગ્રૂપના ચેરમેન અને દેશના બીજા સૌથી ધનિક ઉદ્યોગપતિ ગૌતમ અદાણી મોટી મુશ્કેલીમાં ફસાયેલા જોવા મળી રહ્યા છે. અદાણી અને અન્ય સાત લોકો પર USમાં અબજો ડોલરની લાંચ અને છેતરપિંડીનો આરોપ છે. આ કેસની સુનાવણી અમેરિકન કોર્ટમાં થઈ હતી. અદાણી અને તેમના ભત્રીજા સામે ધરપકડ વોરંટ ઇશ્યૂ કરવામાં આવ્યું છે. આ કેસમાં નામ આવ્યા બાદ અદાણી ગ્રૂપે અમેરિકામાં $600 મિલિયનના બોન્ડ રદ કર્યા હતા. એક અહેવાલ પ્રમાણે ફરિયાદીએ આરોપોની જાહેરાત કરી હતી. એવો આરોપ છે કે અદાણી ગ્રુપે સૌર ઉર્જાનો કોન્ટ્રાક્ટ મેળવવા માટે ભારતીય અધિકારીઓને લાંચ આપી હતી. અદાણીએ બુધવારે ગ્રીન એનર્જીમાં રોકાણની જાહેરાત કરી હતી. કંપનીના ચેરમેને અમેરિકાના ચૂંટાયેલા રાષ્ટ્રપતિ ડોનાલ્ડ ટ્રમ્પને તેમની ચૂંટણીમાં જીત બદલ અભિનંદન આપ્યા બાદ આ જાહેરાત કરવામાં આવી હતી.

ટ્રમ્પે વચન આપ્યું હતું

રોઇટર્સના અહેવાલમાં જણાવાયું છે કે રોકાણની જાહેરાત કરતી વખતે, અદાણીએ અમેરિકાના ચૂંટાયેલા રાષ્ટ્રપતિ ડોનાલ્ડ ટ્રમ્પને તેમની ચૂંટણીમાં જીત બદલ અભિનંદન પણ આપ્યા હતા. અત્રે નોંધનીય છે કે ટ્રમ્પે એનર્જી કંપનીઓ માટે નિયમો સરળ બનાવવાનું વચન આપ્યું છે. આ તેમના માટે ફેડરલ જમીનો પર ડ્રિલ અને પાઇપલાઇન્સ બનાવવાનું સરળ બનાવશે.

શું છે અદાણીનો કેસ?

આરોપમાં જણાવાયું છે કે અદાણી અને અન્ય લોકોએ આશરે $265 મિલિયન (અંદાજે રુપિયા 2237 કરોડ)ની લાંચ આપી હતી. તેમને અપેક્ષા હતી કે આ કોન્ટ્રાક્ટ્સ બે દાયકામાં $2 બિલિયન (આશરે રુપિયા 16882 કરોડ)નો નફો જનરેટ કરશે. પ્રોસિક્યુટર્સ દાવો કરે છે કે સ્કીમમાં સામેલ કેટલાક લોકોએ ગૌતમ અદાણીનો ઉલ્લેખ કરવા માટે 'ન્યુમેરો યુનો' અને 'ધ બિગ મેન' જેવા કોડ નામોનો ઉપયોગ કર્યો હતો.

ભત્રીજા સામે પણ આરોપ

આરોપમાં એવો પણ આક્ષેપ કરવામાં આવ્યો છે કે અદાણી, તેમના ભત્રીજા સાગર અદાણી અને અન્ય એક્ઝિક્યુટિવ વિનીત જૈને અદાણી ગ્રીન એનર્જી માટે $3 બિલિયનથી વધુની લોન અને બોન્ડ મેળવવા માટે ધિરાણકર્તાઓ અને રોકાણકારો પાસેથી લાંચ છુપાવી હતી. આ આરોપો ફોરેન કરપ્ટ પ્રેક્ટિસ એક્ટ હેઠળ આવે છે, જે વિદેશી વ્યાપારી સોદામાં લાંચ લેવા સામેનો US કાયદો છે.

ધરપકડ વોરંટ ઇશ્યૂ

અહેવાલમાં કહેવામાં આવ્યું છે કે ગૌતમ અદાણી અને સાગર અદાણી માટે ધરપકડ વોરંટ ઇશ્યૂ કરવામાં આવ્યું છે. US સિક્યોરિટીઝ એન્ડ એક્સચેન્જ કમિશને બંને વ્યક્તિઓ અને અન્ય વ્યક્તિ, સિરિલ કેબનેસ વિરુદ્ધ સંબંધિત નાગરિક આરોપો દાખલ કર્યા છે. જો કે, US સરકારે હજુ સુધી અદાણી અને અન્ય વ્યક્તિઓ સામેના ચોક્કસ આરોપો વિશે સંપૂર્ણ વિગતો આપી નથી.

અભિયોગના કલાકો પહેલા બોન્ડ વેચ્યા

આરોપના સમાચારના થોડા કલાકો પહેલા, અદાણી ગ્રુપના એક યુનિટે US કોર્પોરેટ બોન્ડ માર્કેટમાં $600 મિલિયનની ઓફર માટે પ્રવેશ કર્યો હતો. આ ઓફરને 3 ગણાથી વધુ લોકોએ ઓવરસબ્સ્ક્રાઇબ કરી હતી. બાદમાં આ બોન્ડ વેચવામાં આવ્યા હતા અને રદ પણ કરવામાં આવ્યા હતા.

કેસમાં સંડોવાયેલાના નામનું લિસ્ટ

US એટર્ની ઓફિસ (ન્યૂયોર્ક) અનુસાર, લાંચ અને છેતરપિંડીના કેસમાં સંડોવાયેલા લોકો છેઃ

1. ગૌતમ એસ. અદાણી

ઉંમર: 62, ભારત

2. સાગર એસ. અદાણી

ઉંમર: 30, ભારત

3. વિનીત એસ. જૈન

ઉંમર: 53, ભારત

4. રણજીત ગુપ્તા

ઉંમર: 54, ભારત

5. સિરિલ કેબનેસ

ઉંમર: 50, ફ્રાન્સ/ઓસ્ટ્રેલિયા

6. સૌરભ અગ્રવાલ

ઉંમર: 48, ભારત

7. દીપક મલ્હોત્રા

ઉંમર: 45, ભારત

8. રૂપેશ અગ્રવાલ

ઉંમર: 50, ભારત

આ પણ વાંચો - ભારતની સર્વિસ એક્સપોર્ટ 2030 સુધીમાં માલની એક્સપોર્ટ કરતાં નીકળી જશે આગળ, જોવા મળ્યો જબરદસ્ત ગ્રોથ