તિરુપતિ બાલાજીના શરણે અનંત અંબાણી, મંદિરમાં કરાવ્યું મુંડન, TTDને 25 ઇલેક્ટ્રિક બસો આપવાની મોટી જાહેરાત

Anant Ambani visits Tirupati: રિલાયન્સ ઇન્ડસ્ટ્રીઝના એક્ઝિક્યુટિવ ડિરેક્ટર અનંત અંબાણીએ રવિવારે તિરુમાલા સ્થિત ભગવાન શ્રી વેંકટેશ્વર સ્વામી મંદિરની મુલાકાત લીધી હતી. આ મુલાકાત દરમિયાન તેમણે પોતાની ધાર્મિક આસ્થા પ્રગટ કરતા મંદિરની સદીઓ જૂની પરંપરા મુજબ કેશ દાન કર્યું હતું. એટલું જ નહીં, તેમણે તિરુમાલા તિરુપતિ દેવસ્થાનમને પર્યાવરણને અનુકૂળ એવી 25 ઇલેક્ટ્રિક બસો દાનમાં આપવાની જાહેરાત પણ કરી છે.

પરોઢિયે ખાસ પૂજા અને મુંડન સંસ્કાર

રવિવારે વહેલી સવારે અનંત અંબાણી મંદિરમાં થતી વિશેષ સુપ્રભાત સેવામાં જોડાયા હતા. ભગવાન વેંકટેશ્વર સ્વામીના દર્શન કર્યા બાદ તેમણે મંદિર પરિસરમાં થતા પારંપરિક ધાર્મિક અનુષ્ઠાનોમાં પણ ભાગ લીધો હતો.

દર્શન બાદ તેમણે ભગવાનના ચરણોમાં પોતાના કેશ અર્પણ કર્યા હતા. તિરુમાલામાં કેશ દાન કરવાની પરંપરા સેંકડો વર્ષોથી ચાલી આવે છે, જેને ભક્તો અહંકારના ત્યાગ અને ઈશ્વર પ્રત્યેના સંપૂર્ણ સમર્પણનું પ્રતીક માને છે. છેલ્લા કેટલાક સમયથી અનંત અંબાણીના લાંબા વાળ તેમની એક અલગ ઓળખ બની ગયા હતા, તેથી તેમના આ મુંડન સંસ્કારે લોકોનું ખાસ ધ્યાન ખેંચ્યું છે.

અનંત અંબાણીની આ શ્રદ્ધા અને ભક્તિને જોતા મંદિરના વૈદિક વિદ્વાનો દ્વારા તેમને વેદ આશીર્વચન આપવામાં આવ્યા હતા. ત્યારબાદ TTD ના અધિકારીઓએ તેમને શ્રીવારી તીર્થ પ્રસાદ આપીને અને પરંપરાગત રેશમી શાલ ઓઢાડીને તેમનું સન્માન કર્યું હતું.

રિલાયન્સ તરફથી અંદાજે 27.5 કરોડ રૂપિયાનું મોટું દાન

પોતાની આ યાત્રા દરમિયાન અનંત અંબાણીએ મંદિર પ્રશાસન અને શ્રદ્ધાળુઓની સુવિધા માટે એક મોટી જાહેરાત કરી છે. રિલાયન્સ ઇન્ડસ્ટ્રીઝ દ્વારા TTD ને નીચે મુજબની સહાય પૂરી પાડવામાં આવશે.

અંદાજે 27.5 કરોડ રૂપિયાના ખર્ચે 25 નવી ઇલેક્ટ્રિક બસોનું દાન.

આ બસો ચલાવવા માટે 50 ડ્રાઈવરોના પગાર અને અન્ય ભથ્થાનો સંપૂર્ણ ખર્ચ રિલાયન્સ ઉઠાવશે.

તિરુમાલા વિસ્તારમાં ઇલેક્ટ્રિક વાહનો (EV) માટે જરૂરી ચાર્જિંગ ઇન્ફ્રાસ્ટ્રક્ચર ઊભું કરવામાં પણ કંપની મદદ કરશે.

આ પહેલનો મુખ્ય હેતુ તિરુમાલામાં પ્રદૂષણ મુક્ત અને પર્યાવરણને અનુકૂળ પરિવહન વ્યવસ્થાને પ્રોત્સાહન આપવાનો છે.

ધાર્મિક આસ્થા અને પશુ પ્રેમનો સમન્વય

આ પહેલો પ્રસંગ નથી જ્યારે અનંત અંબાણીએ પોતાની ધાર્મિક આસ્થા છતી કરી હોય. અગાઉ પણ તેઓ ભગવાન શ્રીકૃષ્ણ અને શ્રીનાથજી પ્રત્યેની પોતાની અતૂટ શ્રદ્ધા વ્યક્ત કરી ચૂક્યા છે. પોતાના લગ્ન પહેલાં તેમણે ધાર્મિક સંકલ્પના ભાગરૂપે દ્વારકાધીશ મંદિર સુધીની પગપાળા યાત્રા પણ કરી હતી.

ધાર્મિક કાર્યોની સાથે સાથે તેઓ પ્રાણીઓના સંરક્ષણ ક્ષેત્રે પણ ખૂબ સક્રિય છે. 'વંતારા' પ્રોજેક્ટ દ્વારા તેઓ બીમાર અને ઈજાગ્રસ્ત વન્યજીવોના બચાવ તેમજ પુનર્વસનનું ઉમદા કાર્ય કરી રહ્યા છે. અનંત અંબાણી વારંવાર તમામ જીવો પ્રત્યે દયા અને કરુણા રાખવા પર ભાર મૂકતા આવ્યા છે.

આ પણ વાંચો-IMD Weather Alert: દેશના 21 રાજ્યોમાં ભારે વરસાદની આગાહી, જાણો દિલ્હીથી લઈને યુપી સુધી કેવું રહેશે હવામાન