બ્રિટન, કેનેડા અને ઓસ્ટ્રેલિયાએ ફિલિસ્તીનને દેશ તરીકે આપી માન્યતા, ઇઝરાયલનો આકરો વિરોધ

બ્રિટન, કેનેડા અને ઓસ્ટ્રેલિયાએ ફિલિસ્તીનને સ્વતંત્ર દેશ તરીકે માન્યતા આપવાનો ઐતિહાસિક નિર્ણય લીધો છે. બ્રિટનના વડાપ્રધાન કીર સ્ટાર્મરે આ નિર્ણયની જાહેરાત કરતાં કહ્યું, "આજે અમે ફિલિસ્તીન અને ઇઝરાયલના લોકો માટે શાંતિ અને ટૂ-સ્ટેટ સોલ્યુશનને મજબૂત કરવા ફિલિસ્તીનને દેશ તરીકે માન્યતા આપીએ છીએ." કેનેડા આ નિર્ણય લેનારો પ્રથમ G7 દેશ બન્યો છે, જ્યારે ઓસ્ટ્રેલિયાએ પણ આ પગલું ભર્યું છે.

આ નિર્ણયથી ઇઝરાયલમાં ભારે નારાજગી જોવા મળી. ઇઝરાયલના વિદેશ મંત્રાલયે કહ્યું કે આ પગલું હમાસને પરોક્ષ રીતે પ્રોત્સાહન આપે છે. ઇઝરાયલના વડાપ્રધાન બેન્જામિન નેતન્યાહુએ આ નિર્ણયને "અસ્વીકાર્ય" ગણાવ્યો છે.

શા માટે આ નિર્ણય?

જુલાઈ 2025માં કીર સ્ટાર્મરે ગાઝામાં ઇઝરાયલના હુમલાઓ અને ત્યાંના માનવીય સંકટ અંગે ચિંતા વ્યક્ત કરી હતી. તેમણે ઇઝરાયલને યુદ્ધવિરામ અને શાંતિ સમજૂતી પર ભાર મૂકવા જણાવ્યું હતું. જોકે, ઇઝરાયલે ગાઝામાં હુમલાઓ ચાલુ રાખ્યા, જેના કારણે બ્રિટન સહિતના દેશોએ ફિલિસ્તીનને માન્યતા આપવાનું પગલું ભર્યું. સ્ટાર્મરે કહ્યું, "ગાઝાની બગડતી સ્થિતિ અને શાંતિની આશા જાળવવા આ નિર્ણય નૈતિક જવાબદારી છે."

કેનેડા અને ઓસ્ટ્રેલિયાએ આ નિર્ણયને શાંતિની દિશામાં મહત્વનું પગલું ગણાવ્યું. જોકે, અમેરિકાએ આ નિર્ણયનો વિરોધ કર્યો છે. બ્રિટનના કેટલાક કન્ઝર્વેટિવ નેતાઓ અને ગાઝામાં હમાસના બંધકોના પરિવારોએ પણ આ નિર્ણયની ટીકા કરી છે.

બ્રિટન લાંબા સમયથી ટૂ-સ્ટેટ સોલ્યુશનનું સમર્થન કરે છે, અને આ નિર્ણય એ દિશામાં મહત્વનું પગલું છે. આ નિર્ણયથી આંતરરાષ્ટ્રીય સ્તરે ફિલિસ્તીનના મુદ્દે ચર્ચા વધુ તીવ્ર બની શકે છે.

આ પણ વાંચો- કિમ જોંગ ઉનની મોટી ચાલ: ટ્રમ્પ સાથેની પહેલી મુલાકાતની તાજી યાદો, પરંતુ ન્યુક્લિયર પ્રોગ્રામ છોડવાની માંગ પર અમેરિકાને આ શરત!