Gandhinagar Metro derailment: ગાંધીનગર ગિફ્ટ સિટી નજીક મેટ્રો ટ્રેન પાટા પરથી ઉતરી ગઈ, જાણો મુસાફરોનું શું થયું?

Gandhinagar Metro derailment: ગાંધીનગરથી એક મોટા સમાચાર સામે આવ્યા છે. ગાંધીનગરમાં આવેલા ગિફ્ટ સિટી (GIFT City) નજીક આજે મેટ્રો ટ્રેન અચાનક પાટા પરથી ઉતરી જવાની ઘટના બની છે. આ દુર્ઘટનાને પગલે થોડા સમય માટે અફરાતફરીનો માહોલ સર્જાયો હતો. જોકે, સૌથી મોટી રાહતની વાત એ છે કે આ બનાવમાં કોઈ પણ પ્રકારની જાનહાનિ થઈ નથી અને મોટી દુર્ઘટના ટળી ગઈ છે.

કેવી રીતે બની ઘટના?

મળતી માહિતી મુજબ, આ ઘટના મેટ્રો ટ્રેનની ટ્રાયલ રન દરમિયાન બની હતી. ટ્રેન અચાનક જ પાટા પરથી નીચે ઉતરી ગઈ હતી. સારી વાત એ રહી કે જે યાત્રીઓ હતા તેઓ અગાઉના સ્ટેશને જ ટ્રેનમાંથી ઉતરી ગયા હતા, જેથી કોઈનો જીવ જોખમમાં મુકાયો ન હતો.

આ ઘટનાની જાણ થતાં જ વહીવટી તંત્ર એક્શનમાં આવ્યું હતું. મેટ્રો વિભાગના ઉચ્ચ અધિકારીઓ તાત્કાલિક ઘટનાસ્થળે પહોંચી ગયા હતા. હાલમાં સુરક્ષાના કારણોસર કોઈપણ વ્યક્તિને ઘટનાસ્થળે જવા દેવામાં આવી રહ્યા નથી. અધિકારીઓ દ્વારા આ દુર્ઘટના પાછળનું ચોક્કસ કારણ જાણવા માટે વધુ તપાસ હાથ ધરવામાં આવી છે.

આ ઘટના બન્યા પછી તરત જ મેટ્રો ટ્રેન સેવા રોકી દેવામાં આવી હતી. મેટ્રો સ્ટેશન પર જાહેરાત કરવામાં આવી હતી કે 'ટેક્નિકલ કારણોસર' મેટ્રો સેવા બંધ કરી દેવામાં આવી છે. ટ્રેન અચાનક બંધ થવાના કારણે ગિફ્ટ સિટી અને ગાંધીનગર તરફ કામકાજ માટે જતા નોકરિયાતો અને સામાન્ય મુસાફરો ભારે મુશ્કેલીમાં મુકાયા હતા. ઘણા લોકો અધવચ્ચે જ ફસાઈ ગયા હતા અને તેમને અન્ય વાહનોનો સહારો લેવો પડ્યો હતો.

આ પણ વાંચો- EPFOની મોટી ભેટ: હવે PFના પૈસા સીધા UPI દ્વારા બેંક ખાતામાં આવશે, જાણો નવો નિયમ

હાલમાં તંત્ર દ્વારા મેટ્રો ટ્રેનને ફરીથી પાટા પર લાવવાની અને ટેક્નિકલ ખામી દૂર કરવાની કામગીરી યુદ્ધના ધોરણે ચાલી રહી છે. ભલે કોઈ મોટો અકસ્માત નથી થયો, પરંતુ આ ઘટનાએ મેટ્રોની સુરક્ષા વ્યવસ્થા સામે ચોક્કસથી કેટલાક સવાલો ઊભા કર્યા છે. આશા છે કે મેટ્રો સેવા જલ્દીથી ફરી શરૂ થશે અને લોકોને પડતી હાલાકી દૂર થશે.