Indian Women's Cricket Team: BCCIએ વિશ્વ ચેમ્પિયન માટે ખોલી દીધો ખજાનો, ખિતાબ જીત્યા પછી માલામાલ બની મહિલા ક્રિકેટ ટીમ

BCCI Prize Money: ભારતીય મહિલા ક્રિકેટ ટીમે ઐતિહાસિક સફળતા હાંસલ કરી છે. હરમનપ્રીત કૌરની આગેવાની હેઠળની ટીમે પહેલી વખત ICC મહિલા વર્લ્ડ કપ 2025નો ખિતાબ જીતી લીધો છે. ફાઇનલ મેચમાં ભારતે સાઉથ આફ્રિકાને 52 રનથી પરાજિત કરીને આ અદ્ભુત વિજય મેળવ્યો હતો. આ જીત સાથે ટીમના ખેલાડીઓ, કોચ અને સહાયક સ્ટાફ માટે BCCIએ 51 કરોડ રૂપિયાની નકદ ઇનામની જાહેરાત કરી છે, જે મહિલા ક્રિકેટના વિકાસમાં મહત્વનું પગલું ગણાય છે.

ફાઇનલ મેચમાં ભારતે પ્રથમ બેટિંગ કરતાં 298 રનનો મજબૂત સ્કોર ઊભો કર્યો હતો. ઓપનર સ્મૃતિ મંધાના અને શેફાલી વર્માએ પ્રથમ વિકેટ માટે 104 રનની મહત્વપૂર્ણ ભાગીદારી કરીને મજબૂત શરૂઆત આપી. શેફાલી વર્માએ 78 બોલમાં 87 રનની ઝડપી ઇનિંગ રમી, જેમાં 7 ચોગ્ગા અને 2 છગ્ગા સામેલ હતા. દીપ્તિ શર્માએ 58 રન બનાવીને ટીમને મજબૂતી આપી, જ્યારે ઋચા ઘોષે 24 બોલમાં 34 રનનું ઝડપી યોગદાન આપ્યું, જેમાં 3 ચોગ્ગા અને 2 છગ્ગા હતા. આ તમામ ખેલાડીઓના પ્રદર્શનથી ભારત મોટો સ્કોર બનાવવામાં સફળ રહ્યું.

બોલિંગમાં પણ ભારતે શાનદાર પ્રદર્શન કર્યું. દીપ્તિ શર્માએ 5 વિકેટ ઝડપીને સાઉથ આફ્રિકાની બેટિંગ લાઇનઅપને તોડી નાખી. શેફાલી વર્માએ 7 ઓવરમાં માત્ર 36 રન આપીને 2 વિકેટ લીધા. સાઉથ આફ્રિકાની કેપ્ટન લૌરા વોલ્વાર્ડટે 101 રનની શતકીય ઇનિંગ રમી હતી, પરંતુ બાકીના ખેલાડીઓ સારું પ્રદર્શન કરી શક્યા નહીં. આખરે સાઉથ આફ્રિકાની ટીમ 246 રનમાં ઓલઆઉટ થઈ ગઈ.

આ શાનદાર પ્રદર્શન માટે શેફાલી વર્માને પ્લેયર ઓફ ધ મેચ અને દીપ્તિ શર્માને પ્લેયર ઓફ ધ ટૂર્નામેન્ટનો એવોર્ડ મળ્યો. BCCIના સેક્રેટરી દેવજીત સૈકિયાએ જણાવ્યું કે, જય શાહની આગેવાનીમાં મહિલા ક્રિકેટને પ્રોત્સાહન આપવા માટે પુરસ્કાર રાશિને 2.88 મિલિયન ડોલરથી વધારીને 14 મિલિયન ડોલર કરવામાં આવી છે. આ તમામ પગલાંથી મહિલા ક્રિકેટને નવી ઊંચાઈ મળી છે.

#WATCH | Mumbai | BCCI Secretary Devajit Saikia says, "... Since Jay Shah took charge of the BCCI, he has brought about many transformations in women's cricket. Pay parity was also addressed. Last month, ICC Chairman Jay Shah increased women's prize money by 300%. Earlier, the… https://t.co/lcNdCOagzX pic.twitter.com/jh6nHA7Qd7

— ANI (@ANI) November 2, 2025

આ વિજયથી ભારતીય મહિલા ક્રિકેટનું ભવિષ્ય વધુ ઉજ્જવળ બન્યું છે અને ખેલાડીઓને પ્રેરણા મળશે. BCCIનું આ પગલું મહિલા ક્રિકેટરોને વધુ પ્રોત્સાહન આપશે.

આ પણ વાંચો- Women’s World Cup 2025: વ્હીલચેર પર ઝૂમી ઊઠી પ્રતિકા રાવલ, ‘મારા ખભે તિરંગો છે, ટીમનો હિસ્સો બનવું એ જ સૌથી મોટી ખુશી!’