"દુનિયા કરતા વધુ મજબૂત છે ભારતની ઈકોનોમી!" વૈશ્વિક મંદી વચ્ચે પૂર્વ ECB ચીફનો મોટો દાવો, જાણો શું છે ભારતની સૌથી મોટી તાકાત?

Indian Economy: આજે જ્યારે આખી દુનિયા મંદી અને આર્થિક અનિશ્ચિતતાના ડરથી ચિંતિત છે, ત્યારે ભારત માટે એક ખૂબ જ સારા અને પોઝિટિવ સમાચાર આવ્યા છે. યુરોપિયન સેન્ટ્રલ બેંક (ECB) ના પૂર્વ વડા જોન-ક્લાઉડ ટ્રિસેટે ભારતની અર્થવ્યવસ્થા પર મોટો ભરોસો વ્યક્ત કર્યો છે. નવી દિલ્હીમાં આયોજિત 'કૌટિલ્ય ઈકોનોમિક એન્ક્લેવ'માં તેમણે સ્પષ્ટ શબ્દોમાં કહ્યું કે, વૈશ્વિક અર્થવ્યવસ્થાની સરખામણીમાં ભારતનું ભવિષ્ય ખૂબ જ ઉજ્જવળ અને મજબૂત છે. તેમણે દાવો કર્યો છે કે ભારત 2047 સુધીમાં 'વિકસિત ભારત' બનવાના પોતાના લક્ષ્ય તરફ એકદમ સાચી દિશામાં આગળ વધી રહ્યું છે. ચાલો જાણીએ પૂર્વ ECB ચીફે ભારતની ઈકોનોમી વિશે કઈ કઈ મોટી વાતો કહી છે.

વૈશ્વિક અર્થવ્યવસ્થા કરતા ભારતની સ્થિતિ ઘણી સારી

મનીકંટ્રોલ સાથેની ખાસ વાતચીતમાં ટ્રિસેટે જણાવ્યું કે તેઓ આખી દુનિયા કરતા ભારતની ઈકોનોમીને લઈને વધુ આશાવાદી છે. દુનિયાભરમાં અત્યારે મંદીનો માહોલ છે, પણ ભારતે જે રીતે આર્થિક સુધારાઓ કર્યા છે તે કાબિલેદાદ છે. દેશનો ગ્રોથ રેકોર્ડ એ વાતની સાબિતી આપે છે કે ભારતમાં અત્યારે આર્થિક મોરચે કંઈક મોટું અને સકારાત્મક થઈ રહ્યું છે.

‘મિડલ-ઇન્કમ ટ્રેપ'થી સુરક્ષિત છે ભારત

શું છે ભારતની સૌથી મોટી તાકાત?

ભારતના લાંબા ગાળાના વિકાસ પાછળનું સૌથી મોટું સીક્રેટ જણાવતા ટ્રિસેટે કહ્યું કે, ભારતની અસલી તાકાત તેનો ‘હ્યુમન કેપિટલ અને બ્રેન પાવર' છે. ભારત પાસે એન્જિનિયરો, વૈજ્ઞાનિકો અને ઉચ્ચ કુશળ પ્રોફેશનલ્સની કોઈ કમી નથી. આજે દુનિયાની ટોચની ટેક કંપનીઓમાં ભારતીય મૂળના એક્ઝિક્યુટિવ્સ અને એન્જિનિયર્સ ડંકો વગાડી રહ્યા છે, જે આ ટેલેન્ટનો જ જીવંત પુરાવો છે. આ ઉપરાંત ભારતની રાજકીય સ્થિરતા, લોકશાહી સંસ્થાઓ અને તાજેતરમાં થયેલા આર્થિક સુધારાઓ દેશને લાંબા ગાળે મોટો ફાયદો કરાવશે.

2047ના લક્ષ્યમાં વૈશ્વિક અવ્યવસ્થા બની શકે છે પડકાર

જોકે, ટ્રિસેટે ભારતને સાવચેત કરતા એક પડકાર વિશે પણ વાત કરી છે. તેમણે કહ્યું કે ભારતની પ્રગતિનો આધાર એ વાત પર પણ રહેશે કે વૈશ્વિક અર્થવ્યવસ્થા કઈ દિશામાં જાય છે. અત્યારે આખી દુનિયામાં આક્રમક પાવર-પોલિટિક્સ રમાઈ રહ્યું છે. જો દુનિયા આંતરરાષ્ટ્રીય નિયમોને નેવે મૂકશે, તો તે દરેક દેશ માટે જોખમી સાબિત થશે. વૈશ્વિક બજારમાં ક્યારે સ્થિરતા આવે છે, તેના પર ભારતની સફળતાનો ઘણો આધાર રહેશે.

ભારત માટે સાચો રસ્તો કયો?

અત્યારે દુનિયાના દેશો વેપાર અને સપ્લાય ચેનનો હથિયાર તરીકે ઉપયોગ કરી રહ્યા છે. આ મુદ્દે ટ્રિસેટે ભારતની વિદેશ અને આર્થિક નીતિના વખાણ કર્યા. તેમણે સલાહ આપી કે ભારતે વૈશ્વિક મહાસત્તાઓની જૂથબંધીમાં પડવાને બદલે પોતાની વ્યૂહાત્મક સ્વતંત્રતા જાળવી રાખવી જોઈએ. જેમ યુરોપ પોતાના આર્થિક હિતોનું રક્ષણ કરે છે, તેમ ભારતે પણ આ અનિશ્ચિતતા ભરી દુનિયામાં પોતાનો સ્વતંત્ર અને મજબૂત રસ્તો બનાવવો જોઈએ, અને ભારત આ કરવા માટે સંપૂર્ણપણે સક્ષમ છે.

આ પણ વાંચો - એપ્રિલ-સપ્ટેમ્બરમાં UPI ટ્રાન્ઝેક્શન 27% વધ્યા, 177 લાખ કરોડને પાર, જાણો 15 ઓક્ટોબરથી લાગુ થતા નવા નિયમો

એકંદરે, પૂર્વ ECB ચીફનું આ નિવેદન દર્શાવે છે કે દુનિયાના દિગ્ગજ અર્થશાસ્ત્રીઓ પણ ભારતની ઈકોનોમી અને તેની નીતિઓ પર પૂરો ભરોસો કરી રહ્યા છે. જો ભારત આજ રીતે આગળ વધતું રહેશે, તો 2047 સુધીમાં તેને વિકસિત ભારત બનતા કોઈ રોકી શકશે નહીં.