ટ્રમ્પના 25% ટેરિફની જાહેરાત પર ભારતની તીખી પ્રતિક્રિયા, 'રાષ્ટ્રીય હિતોની રક્ષા માટે દરેક પગલું ઉઠાવીશું'

India Trade Policy: અમેરિકાના રાષ્ટ્રપતિ ડોનાલ્ડ ટ્રમ્પે ભારતીય વસ્તુઓ પર 25% ટેરિફ લગાવવાની જાહેરાત કરી, જેના જવાબમાં ભારત સરકારે સ્પષ્ટ શબ્દોમાં કહ્યું છે કે તે દેશના ખેડૂતો, ઉદ્યોગપતિઓ અને MSME (માઇક્રો, સ્મોલ અને મીડિયમ એન્ટરપ્રાઇઝ)ના હિતોની રક્ષા માટે કડક પગલાં લેશે. સરકારે ભારપૂર્વક જણાવ્યું, "અમે અમારા ખેડૂતો, ઉદ્યોગપતિઓ અને MSMEના કલ્યાણને સર્વોચ્ચ પ્રાથમિકતા આપીએ છીએ. રાષ્ટ્રીય હિતોની રક્ષા માટે અમે દરેક જરૂરી પગલું ભરીશું, જેમ કે અમે બ્રિટન સાથેના મુક્ત વેપાર કરાર સહિત અન્ય વેપાર સમજૂતીઓમાં કર્યું છે."

ટ્રમ્પના ટેરિફનો ભારતના કયા સેક્ટર્સ પર થશે અસર?

ટ્રમ્પના નવા ટેરિફ પ્લાન ભારતના અનેક મુખ્ય નિકાસ ક્ષેત્રોને અસર કરશે. આમાં ઓટોમોબાઇલ, ઓટો કમ્પોનન્ટ, સ્ટીલ, એલ્યુમિનિયમ, સ્માર્ટફોન, સોલર મોડ્યૂલ, સીફૂડ, રત્ન-આભૂષણ અને ચોક્કસ પ્રોસેસ્ડ ખાદ્ય તેમજ કૃષિ ઉત્પાદનોનો સમાવેશ થાય છે. આ તમામ પર 25% ટેરિફ લાગશે. જોકે, ફાર્માસ્યુટિકલ્સ, સેમિકન્ડક્ટર અને મહત્વના ખનીજોને આ ટેરિફથી બાકાત રાખવામાં આવ્યા છે.

ભારત સરકારે જણાવ્યું કે તે અમેરિકા સાથે વેપાર વાટાઘાટો ચાલુ રાખશે, પરંતુ દેશના સ્થાનિક હિતોની રક્ષા માટે સંવેદનશીલ રહેશે. સરકારે તાજેતરમાં બ્રિટન સાથે થયેલા મુક્ત વેપાર કરારનો ઉલ્લેખ કરીને આ વાતને ટેકો આપ્યો, જેમાં સ્થાનિક ઉદ્યોગોના હિતોનું રક્ષણ કરવામાં આવ્યું હતું.

અર્થશાસ્ત્રીઓનું માનવું છે કે ટ્રમ્પની આક્રમક વેપાર નીતિઓથી ઉદ્ભવતી ભૂ-રાજકીય ગતિશીલતાને ધ્યાનમાં રાખીને ભારતે અન્ય દેશો સાથે ગાઢ આર્થિક સંબંધો બાંધવા જોઈએ. નવા બજારોની શોધ અને સ્થાનિક સ્તરે નવી તકો ઊભી કરવાથી વૈશ્વિક સપ્લાય ચેઇનનું પુનઃસંતુલન થઈ શકે છે. આ સાથે, ભારત સરકાર દેશમાં આર્થિક સુધારાઓને વેગ આપવા માટે પણ તૈયાર છે.

આ નવા ટેરિફ ભારતના નિકાસ ક્ષેત્રો માટે પડકારરૂપ હોવા છતાં, સરકારનું ધ્યાન રાષ્ટ્રીય હિતો અને સ્થાનિક ઉદ્યોગોની રક્ષા પર કેન્દ્રિત છે. ભારતે અગાઉના વેપાર કરારોમાં જે રીતે સંતુલન જાળવ્યું છે, તે જ રીતે આ પડકારનો સામનો કરવા માટે તૈયારી દર્શાવી છે.

અમેરિકા શું ઇચ્છે છે?

અમેરિકા ભારત પાસેથી તેના કૃષિ અને ડેરી ઉત્પાદનો અને આનુવંશિક રીતે સુધારેલા પાક માટે બજારો ખોલવા અને તેના પર ટેરિફ ઘટાડવાની માંગ કરી રહ્યું છે. અમેરિકા ઇચ્છે છે કે ભારત આ ક્ષેત્રોમાં 100% સુધી ટેરિફ દૂર કરે અથવા ઘટાડે. ભારત આ માટે સંમત નથી. ભારત સંમત ન થવાનું કારણ એ છે કે ભારતમાં વસ્તીનો મોટો ભાગ આનાથી પ્રભાવિત થશે. આ ખાસ કરીને નાના ખેડૂતોને અસર કરી શકે છે.

આ પણ વાંચો- ટ્રમ્પનું ભારત પર 25% ટેરિફનું એલાન, PM મોદીને મિત્ર ગણાવ્યા પણ આપી આ મોટી ચેતવણી