ટ્રમ્પ-મસ્ક વિવાદ: ડેમોક્રેટ્સને ફંડ કરવા પર ટ્રમ્પની ધમકી, સરકારી કોન્ટ્રાક્ટ્સ રદ કરવાની ચીમકી

અમેરિકન રાષ્ટ્રપતિ ડોનાલ્ડ ટ્રમ્પે ટેસ્લા અને સ્પેસએક્સના CEO એલોન મસ્કને ચેતવણી આપી છે કે જો તેમણે ડેમોક્રેટિક પાર્ટીના ઉમેદવારોને ફંડ આપ્યું તો તેમને ગંભીર પરિણામો ભોગવવા પડશે. આ વિવાદ એ વખતે શરૂ થયો જ્યારે એલોન મસ્કે ટ્રમ્પના 'ટેક્સ એન્ડ સ્પેન્ડિંગ બિલ'ને સોશિયલ મીડિયા પર 'ઘૃણાસ્પદ' અને 'શરમજનક' ગણાવ્યું. આ બિલની ટીકા કરતાં મસ્કે જણાવ્યું હતું કે તેનાથી અમેરિકન સરકારનું ખોટું વધશે. આ બાબતે ટ્રમ્પે નારાજગી વ્યક્ત કરી અને બંને વચ્ચેના સંબંધોમાં ખટાશ સ્પષ્ટ થઈ.

ટ્રમ્પ-મસ્કના સંબંધોમાં ખટાશ

એક સમયે ટ્રમ્પના મજબૂત સમર્થક રહેલા એલોન મસ્કે જ્યારે ટ્રમ્પના બિલનો વિરોધ કર્યો, ત્યારે ટ્રમ્પે તેને સહન ન કરી શક્યા. એનબીસી ન્યૂઝના એક ઈન્ટરવ્યૂમાં ટ્રમ્પે જણાવ્યું, "મેં મસ્કને મારા પહેલા શાસનમાં તક આપી હતી અને તેમની કંપનીઓને બચાવી હતી. હવે મારે તેમની સાથે વાત કરવાની કોઈ ઈચ્છા નથી." ટ્રમ્પે એમ પણ કહ્યું કે તેઓ મસ્કની કંપનીઓના સરકારી કોન્ટ્રાક્ટ્સ રદ કરવાનું વિચારી રહ્યા છે, જેમાં સ્પેસએક્સ અને ટેસ્લાનો સમાવેશ થાય છે.

બ્લૂમબર્ગ ગવર્નમેન્ટના આંકડા અનુસાર, સ્પેસએક્સને 2000થી અત્યાર સુધી નાસા અને રક્ષા વિભાગ તરફથી 22 અબજ ડોલરથી વધુના કોન્ટ્રાક્ટ્સ મળ્યા છે. ટેસ્લાને પણ ઈલેક્ટ્રિક વ્હીકલ (EV) સબસિડીના રૂપમાં મોટો ફાયદો થયો છે. ટ્રમ્પે શુક્રવારે રિપોર્ટર્સને જણાવ્યું કે EV સબસિડી ખૂબ વધારે છે અને તેની સમીક્ષા કરવામાં આવશે. તેમણે કહ્યું, "અમે દરેક બાબત પર નજર રાખીશું અને જે યોગ્ય હશે તે જ કરવામાં આવશે."

ટ્રમ્પ અને મસ્ક વચ્ચેનો વિવાદ સોશિયલ મીડિયા પર પણ જોવા મળ્યો. મસ્કે દાવો કર્યો કે ટેક્સ એન્ડ સ્પેન્ડિંગ બિલ તેમને ક્યારેય બતાવવામાં આવ્યું ન હતું અને તેને રાતોરાત પાસ કરી દેવાયું. તેમણે એમ પણ કહ્યું કે જો તેમણે ટ્રમ્પને સપોર્ટ ન કર્યો હોત તો ટ્રમ્પ રાષ્ટ્રપતિની ચૂંટણી હારી ગયા હોત. જવાબમાં, ટ્રમ્પે કહ્યું કે અબજો ડોલર બચાવવાનો સૌથી સરળ રસ્તો એલોન મસ્કની સરકારી સબસિડી અને કોન્ટ્રાક્ટ્સ રદ કરવાનો છે. ટ્રમ્પે એમ પણ કહ્યું કે "મસ્કનું દિમાગ ખરાબ થઈ ગયું છે" અને તેઓ તેમની સાથે વાત કરવા માંગતા નથી.

ટ્રમ્પનો દાવો: મસ્કનો વિરોધ EV સબસિડીને લઈને

ટ્રમ્પે દાવો કર્યો કે મસ્કનો બિલ વિરુદ્ધનો વિરોધ ઈલેક્ટ્રિક વ્હીકલ્સ માટેના ટેક્સ ક્રેડિટ્સ રદ કરવાના પ્રસ્તાવને લઈને છે. ટ્રમ્પનું કહેવું છે કે મસ્કને બિલ વિશે પહેલાં કોઈ સમસ્યા ન હતી, પરંતુ જ્યારે તેમને ખબર પડી કે સરકાર EV સબસિડી બંધ કરવા જઈ રહી છે, ત્યારે તેમણે વિરોધ શરૂ કર્યો.

શું થશે આગળ?

ટ્રમ્પ અને મસ્ક વચ્ચેનો આ વિવાદ બંનેના લાંબા સમયના મૈત્રીપૂર્ણ સંબંધોનો અંત લાવી શકે છે. મસ્કની કંપનીઓ માટે સરકારી કોન્ટ્રાક્ટ્સ અને સબસિડી ખૂબ જ મહત્વની છે. જો ટ્રમ્પ આ ધમકીઓને અમલમાં મૂકે તો તેની સીધી અસર ટેસ્લા અને સ્પેસએક્સના બિઝનેસ પર પડી શકે છે. બીજી તરફ, મસ્કનું સોશિયલ મીડિયા પ્લેટફોર્મ પણ આ વિવાદમાં મહત્વની ભૂમિકા ભજવી રહ્યું છે, જેના દ્વારા તેઓ પોતાનો પક્ષ રજૂ કરી રહ્યા છે.

આ પણ વાંચો- મણિપુરમાં 5 જિલ્લામાં ઇન્ટરનેટ સર્વિસ બંધ, અરંબાઇ તેંગોલની ધરપકડ બાદ કાયદો-વ્યવસ્થા બગડવાનો ખતરો