ભારત માટે 8-10% ગ્રોથ શક્ય, ડબલ-ડિજિટ વિકાસની પણ પૂરી શક્યતા- મુકેશ અંબાણી

JioBlackRock event : રિલાયન્સ ઈન્ડસ્ટ્રીઝના ચેરમેન મુકેશ અંબાણીએ ભારતના આર્થિક ભવિષ્ય અંગે ખૂબ જ આશાવાદી વિચારો રજૂ કર્યા છે. તેમણે કહ્યું છે કે, ભારત 8થી 10 ટકાની આર્થિક વૃદ્ધિ જાળવી રાખી શકે છે અને મજબૂત ડબલ-ડિજિટ ગ્રોથ પણ હાંસલ કરી શકે છે.

મુંબઈમાં યોજાયેલા JioBlackRock ઈવેન્ટમાં BlackRockના CEO લેરી ફિંક સાથે વાતચીત દરમિયાન મુકેશ અંબાણીએ આ વિચારો વ્યક્ત કર્યા હતા. તેમણે કહ્યું, "મને લાગે છે કે ભારત દુનિયાથી આગળ નીકળી જશે."

ભારતીય અર્થતંત્રની સ્થિરતા

મુકેશ અંબાણીએ જણાવ્યું કે, ભારત અને ભારતીય અર્થવ્યવસ્થાનું વૃક્ષ સ્પષ્ટ રીતે સ્થિરતા અને ભરપૂર માત્રામાં ફળ આપી રહ્યું છે. તેમણે ઉમેર્યું કે, અમારી નીતિ ટકાઉ રહી છે. અમારી નીતિમાં સાતત્ય છે. અમે સંયમી પણ રહ્યા છીએ.

છેલ્લા પાંચ-છ દશકોથી ભારતીયોએ સતત બચત કરી છે, પરંતુ તે ઉત્પાદક નહોતી એવું જણાવતા અંબાણીએ કહ્યું, JioBlackRock અમને આ તક આપે છે કે અમે ભારતીયોને બચત કરવા પ્રોત્સાહિત કરીએ અને તેમને તે બચતને કમાણીમાં બદલવાનો વિકલ્પ આપીએ.

એનર્જી આયાતમાં ઘટાડો

મુકેશ અંબાણીએ આગાહી કરી કે આગામી દશકમાં ભારત તેની 80 ટકા એનર્જી આયાત કરશે નહીં. આ દેશની ઊર્જા સ્વનિર્ભરતા તરફનું મહત્વનું પગલું હશે.

ટેક્નોલોજી અને ભવિષ્યની તકો

 મુકેશ અંબાણીએ આત્મવિશ્વાસ સાથે કહ્યું કે, જ્યારે ટેક્નોલોજિકલ ઈન્ફ્રાસ્ટ્રક્ચરની વાત આવશે, ત્યારે અમે દુનિયાથી પાછળ નહીં રહીએ. મને લાગે છે કે ભારતમાં 4.5 લાખ કરોડ ડોલરની તક છે. 20-30 વર્ષના સમયગાળામાં ભારત બાકીની દુનિયાથી આગળ નીકળી જશે..

JioBlackRock વિશે

JioBlackRock એ Jio Financial Services (JFSL - જે રિલાયન્સ ઈન્ડસ્ટ્રીઝનો ભાગ છે) અને દુનિયાના સૌથી મોટા એસેટ મેનેજર BlackRockનું 50:50નું સંયુક્ત સાહસ છે.

આ સાહસ વિશે વાત કરતા મુકેશ0 અંબાણીએ કહ્યું, "લેરી (ફિંક)એ મને કહ્યું કે BlackRockનો અંતિમ હેતુ માત્ર શોર્ટ ટર્મ પરિણામો હાંસલ કરવાનો કે રોકાણકારો અને શેરહોલ્ડર્સ માટે વળતર કમાવવાનો નથી. જો હું આ પૈસાનો ઉપયોગ પહેલા સમાજના કલ્યાણ માટે કરું અને તેના પરિણામે હું મારા રોકાણકારો અને શેરહોલ્ડર્સને વળતર આપું, તો સમજો કે મેં મારું કામ કર્યું છે. આ જ રિલાયન્સની ફિલોસોફી પણ છે."

મુકેશ અંબાણીના આ નિવેદનો ભારતના આર્થિક ભવિષ્ય માટે ખૂબ જ આશાજનક સંકેતો આપે છે અને દેશની પ્રગતિ માટેના તેમના વિઝનને પ્રતિબિંબિત કરે છે.

ડિસ્ક્લેમરઃ મનીકંટ્રોલ ડૉટ કૉમ નેટવર્ક 18 સમૂહનો હિસ્સો છે. મનીકંટ્રોલ ડૉટ કૉમ અને અન્ય ડિઝિટલ, પ્રિન્ટ અને ટીવી ચેનલ નેટવર્ક 18 ના અંતર્ગત આવે છે. નેટવર્ક 18 ના સ્વામિત્વ અને પ્રબંધન રિલાયન્સ ઈન્ડસ્ટ્રીઝના હાથમાં છે.

આ પણ વાંચો-Market Outlook: મામૂલી વધારાની સાથે બંધ થયા સેન્સેક્સ-નિફ્ટી, જાણો ગુરૂવારે કેવી રહેશે માર્કેટની ચાલ