અદાણી ગ્રુપના શેરોમાં તેજીનો પવન: સંસ્થાકીય રોકાણકારોએ 15000 કરોડ ઠાલવ્યા, બ્રોકરેજ ફર્મ્સે આપ્યા મોટા ટાર્ગેટ

Adani Group Stocks: છેલ્લા કેટલાક સમયથી શેરબજારમાં અદાણી ગ્રુપની કંપનીઓનો દબદબો જોવા મળી રહ્યો છે. મોટા ઇન્સ્ટિટ્યુશનલ રોકાણકારો (સંસ્થાકીય રોકાણકારો) અદાણીના શેરો પર પૂરો ભરોસો બતાવી રહ્યા છે. છેલ્લા મહિનાની જ વાત કરીએ તો, ગ્રુપની મોટી લિસ્ટેડ કંપનીઓમાં 15000 કરોડ રૂપિયાથી વધુની બ્લોક ડીલ થઈ છે.

આ બ્લોક ડીલ્સમાં ગ્લોબલ અને ડોમેસ્ટિક એમ બંને પ્રકારના મોટા રોકાણકારોએ રસ દાખવ્યો છે. જેમાં કેપિટલ ઇન્ટરનેશનલ, કેપિટલ ગ્રુપ, SBI મ્યુચ્યુઅલ ફંડ, બિરલા મ્યુચ્યુઅલ ફંડ, GQG પાર્ટનર્સ અને કતાર હોલ્ડિંગ LLC જેવી મોટી સંસ્થાઓ સામેલ છે. રોકાણકારોનો આ ઉત્સાહ દર્શાવે છે કે અદાણીના ઇન્ફ્રાસ્ટ્રક્ચર, એનર્જી અને લોજિસ્ટિક્સ બિઝનેસમાં તેમનો વિશ્વાસ વધુ મજબૂત થયો છે.

અદાણી પોર્ટ્સ અને એન્ટરપ્રાઇઝમાં સૌથી મોટા સોદા

આગળના સમયગાળા દરમિયાન સૌથી વધુ હલચલ 'અદાણી પોર્ટ્સ એન્ડ સ્પેશિયલ ઇકોનોમિક ઝોન' માં જોવા મળી છે. આ કંપનીમાં લગભગ 7400 કરોડ રૂપિયાની બ્લોક ડીલ થઈ છે, જેમાં કેપિટલ ગ્રુપની કંપનીઓએ મોટો હિસ્સો ખરીદ્યો છે.

કોણે કેટલો હિસ્સો વેચ્યો અને કોણે ખરીદ્યો?

અદાણી એન્ટરપ્રાઇઝ: GQG પાર્ટનર્સે પોતાનો 1.3% હિસ્સો 4760 કરોડ રૂપિયામાં વેચ્યો છે, જે પૂરેપૂરો SBI મ્યુચ્યુઅલ ફંડે 2913.40 રૂપિયા પ્રતિ શેરના ભાવે ખરીદી લીધો છે.

અદાણી એનર્જી: GQG પાર્ટનર્સે 0.5% હિસ્સો 958 કરોડ રૂપિયામાં વેચ્યો, જે પણ SBI મ્યુચ્યુઅલ ફંડે 1504.8 રૂપિયા પ્રતિ શેરના ભાવે લઈ લીધો છે.

રોકાણકારોના સેન્ટિમેન્ટમાં અચાનક આટલો સુધારો કેમ?

અદાણી ગ્રુપના શેરોમાં અચાનક આવેલી આ તેજી પાછળનું સૌથી મોટું કારણ અમેરિકાથી આવેલા રાહતના સમાચાર છે. અમેરિકાના ડિપાર્ટમેન્ટ ઓફ જસ્ટિસે ચેરમેન ગૌતમ અદાણી અને તેમના ભત્રીજા સાગર અદાણી સામે લગાવેલા છેતરપિંડીના તમામ આરોપો પાછા ખેંચી લીધા છે.

આ સમાચાર આવતાની સાથે જ અદાણી ગ્રુપની કંપનીઓએ શેરબજારમાં દોટ મૂકી છે. અદાણી એન્ટરપ્રાઇઝ, અદાણી પાવર, અદાણી પોર્ટ્સ, અદાણી એનર્જી અને અદાણી ગ્રીન એનર્જી — આ તમામ શેરોએ પોતાની 52 વીકની નવી હાઈ સપાટીને સ્પર્શ કર્યો છે. આ તેજીના સથવારે અદાણી ગ્રુપનું કુલ માર્કેટ કેપિટલ વધીને 20 લાખ કરોડ રૂપિયાની આસપાસ પહોંચી ગયું છે.

અદાણીના શેરો પર બ્રોકરેજ હાઉસની સલાહ

બર્નસ્ટીનનો રિપોર્ટ

બ્રોકરેજ ફર્મ બર્નસ્ટીન માને છે કે ભૂતકાળમાં શોર્ટ-સેલર અને તપાસ એજન્સીઓ દ્વારા થયેલા આક્ષેપોને કારણે જે મુશ્કેલીઓ ઊભી થઈ હતી, તેમાંથી હવે કંપની સંપૂર્ણપણે બહાર આવી ગઈ છે. માર્કેટને અદાણી ગ્રુપની ઇન્ફ્રાસ્ટ્રક્ચર ડેવલપ કરવાની ક્ષમતા પર ક્યારેય કોઈ શંકા નહોતી.

જેફરીઝના લેટેસ્ટ ટાર્ગેટ

અદાણી એનર્જી: બ્રોકરેજે 'Buy' રેટિંગ સાથે 1665 રૂપિયાનો ટાર્ગેટ આપ્યો છે. કંપની પાસે 1.5 લાખ કરોડ રૂપિયાની બિડ પાઇપલાઇન છે અને 71800 કરોડ રૂપિયાના પ્રોજેક્ટ્સ પર કામ ચાલુ છે. સ્માર્ટ મીટર બિઝનેસ કંપનીના ગ્રોથને ડબલ ડિજિટમાં લઈ જઈ શકે છે.

અદાણી ગ્રીન: 'Buy' રેટિંગ અને 1435 રૂપિયાનો ટાર્ગેટ અપાયો છે. 2030 સુધીમાં 50 GW ક્ષમતાનો લક્ષ્યાંક કંપની માટે ગેમ-ચેન્જર સાબિત થઈ શકે છે.

અદાણી પાવર: 255 રૂપિયાના ટાર્ગેટ સાથે 'Buy' ની સલાહ આપવામાં આવી છે. કંપનીએ નાણાકીય વર્ષ 2032 સુધીમાં 42 GW ક્ષમતાનું મોટું લક્ષ્ય રાખ્યું છે.

આ પણ વાંચો-વિપ્રોના શેરમાં સળંગ બીજા દિવસે મોટો કડાકો: 2 દિવસમાં શેર 8% તૂટ્યો, જાણો આ અચાનક ઘટાડા પાછળનું સાચું કારણ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.