મારુતિ અને હ્યુન્ડાઈ બાદ હવે Tata Motorsનો મોટો ઝટકો, 1 સપ્ટેમ્બરથી કારના ભાવમાં 25000 સુધીનો વધારો

Tata Motors PV : જો તમે નવી કાર ખરીદવાનું પ્લાનિંગ કરી રહ્યા છો, તો તમારા માટે એક ખૂબ જ મહત્ત્વના સમાચાર છે. મારુતિ સુઝુકી અને હ્યુન્ડાઈ બાદ હવે દેશની દિગ્ગજ ઓટોમોબાઈલ કંપની ટાટા મોટર્સે પણ પોતાના ગ્રાહકોને મોટો ઝટકો આપ્યો છે. કંપનીએ 1 સપ્ટેમ્બરથી પોતાની પેસેન્જર વ્હીકલ અને ઈલેક્ટ્રિક કારની કિંમતોમાં વધારો કરવાની સત્તાવાર જાહેરાત કરી છે.

કેટલો થશે વધારો અને શું છે કારણ?

ટાટા મોટર્સ પેસેન્જર વ્હીકલ્સ લિમિટેડ દ્વારા અપાયેલી માહિતી અનુસાર, આગામી 1 સપ્ટેમ્બરથી કારના ભાવમાં 25000 સુધીનો વધારો કરવામાં આવશે.આ ભાવ વધારા પાછળનું મુખ્ય કારણ ઉત્પાદન ખર્ચમાં થતો સતત વધારો અને મોંઘવારી છે. કંપનીની નાની કાર ટિયાગોથી લઈને પ્રીમિયમ SUV સફારી અને હેરિયર EV સુધીના તમામ મોડલ્સ પર આ વધારો લાગુ પડશે.ટાટાની

આ કારોની કિંમત બજારમાં અંદાજે 4.7 લાખથી લઈને 31 લાખની વચ્ચે છે. મોડલ અને વેરિએન્ટના આધારે ભાવ વધારો અલગ-અલગ રહેશે. TMPV એ પોતાના નિવેદનમાં સ્પષ્ટ કર્યું છે કે મોંઘવારી અને વધતા ખર્ચનો મોટો હિસ્સો કંપની પોતે ઉઠાવી રહી છે, પરંતુ હવે તેનો થોડો બોજ ગ્રાહકો પર નાખવો જરૂરી બની ગયો છે. આથી જ કિંમતોમાં આ આંશિક ફેરફાર કરવામાં આવી રહ્યો છે.

કારના ભાવ વધારાના સમાચાર વચ્ચે ટાટા મોટર્સના શેરમાં 21 ઓગસ્ટે ઘટાડો જોવા મળ્યો હતો. BSE પર શેર ગગડીને 318.95 ના લો-લેવલ પર પહોંચી ગયો હતો.કંપનીની કુલ માર્કેટ કેપ 1.17 લાખ કરોડ છે અને શેરની ફેસ વેલ્યુ 2 છે. BSE 100 ઈન્ડેક્સમાં સામેલ આ શેરમાં છેલ્લા 6 મહિનામાં 15 ટકા, 1 વર્ષમાં 24 ટકા અને 2 વર્ષમાં 52 ટકાનો ઘટાડો નોંધાયો છે.જૂન 2026 ના અંત સુધીના આંકડા મુજબ કંપનીમાં પ્રમોટર્સનો હિસ્સો 42.51 ટકા છે.

મારુતિ અને હ્યુન્ડાઈએ પણ વધાર્યા છે ભાવ

ટાટા મોટર્સ પહેલા જ મારુતિ સુઝુકી ઈન્ડિયાએ પોતાની કારના ભાવમાં સરેરાશ 0.5 ટકાનો વધારો ઝીંકી દીધો છે. આ નવો ભાવ વધારો 18 ઓગસ્ટ 2026 થી અમલમાં આવી ગયો છે, જેનાથી મારુતિની કારો અલગ-અલગ મોડલ મુજબ 2500 થી લઈને 30000 સુધી મોંઘી થઈ ગઈ છે. બીજી તરફ, હ્યુન્ડાઈ મોટર ઈન્ડિયા પણ 1 સપ્ટેમ્બર 2026 થી પોતાની તમામ કારના ભાવમાં 1 ટકા સુધીનો વધારો કરવા જઈ રહી છે.

આ પણ વાંચો-Market View: ક્રૂડ ઓઈલના ઊંચા ભાવથી શેરબજાર રહેશે રેન્જ-બાઉન્ડ, જાણો નિફ્ટી પર નિષ્ણાતોની ટ્રેડિંગ રણનીતિ