Closing Bell: એપ્રિલ સિરીઝની શાનદાર શરૂઆત: શેરબજારમાં તોફાની તેજી, સેન્સેક્સ 1187 અને નિફ્ટી 348 પોઈન્ટ ઉછળીને બંધ

Closing Bell: 1 એપ્રિલના રોજ એપ્રિલ સિરીઝની ખૂબ જ શાનદાર અને સકારાત્મક શરૂઆત થઈ છે. સારા ગ્લોબલ સંકેતો અને ખાસ કરીને અમેરિકા અને ઈરાન વચ્ચે ચાલી રહેલા યુદ્ધની સ્થિતિમાં નરમાશ આવવાની આશાએ ભારતીય શેરબજારમાં આજે જોરદાર ઉત્સાહ જોવા મળ્યો હતો. બજારમાં ચારેતરફ ખરીદીનો માહોલ રહેતા તમામ મુખ્ય ઈન્ડેક્સ લીલા નિશાનમાં બંધ થયા છે.

બજારની આજના દિવસની હાઇલાઇટ્સ

આજના ટ્રેડિંગ સેશનના અંતે શેરબજારના આંકડા રોકાણકારોને ખુશ કરનારા રહ્યા છે. સેન્સેક્સ 1,186.77 પોઈન્ટ (1.65 ટકા) ના મજબૂત ઉછાળા સાથે 73,134.32 ના સ્તર પર બંધ થયો. 348 પોઈન્ટ (1.56 ટકા) ના જબરદસ્ત જમ્પ સાથે 22,600 ની સપાટી પાર કરીને 22,679.40 પર બંધ થયો. બેન્ક નિફ્ટી બેન્કિંગ શેરોમાં પણ રોનક રહી અને ઇન્ડેક્સ 1173 પોઈન્ટ વધીને 51,449 પર બંધ થયો. મિડકેપ ઇન્ડેક્સ 1169 પોઈન્ટ ઉછળીને 53,819 પર બંધ થયો (2.2 ટકાનો વધારો). જ્યારે સ્મોલકેપ ઇન્ડેક્સમાં પણ 3.4 ટકાની શાનદાર તેજી જોવા મળી હતી.

શેરોની સ્થિતિ

નિફ્ટીના ટોપ ગેનર્સ

આજના વધનારા શેર્સ પર નજર કરીએ તો, આજે ઇન્ટરગ્લોબ એવિએશન, અદાણી પોર્ટ્સ, અદાણી એન્ટરપ્રાઈઝીસ, ટ્રેન્ટ અને ભારત ઈલેક્ટ્રોનિક્સના શેરોમાં સૌથી વધુ તેજી જોવા મળી હતી.

નિફ્ટીના ટોપ લૂઝર્સ

તો બીજીતરફ સૌથી વધુ ઘટેલા શેરો પર નજર કરીએ ડો. રેડ્ડીઝ લેબ્સ, એચડીએફસી લાઈફ, સિપ્લા, એનટીપીસી અને સન ફાર્માના શેરોમાં નુકસાન જોવા મળ્યું હતું.

સેક્ટોરલ ઇન્ડેક્સની સ્થિતિ: ડિફેન્સમાં સૌથી મોટો ઉછાળો

આજે માત્ર ફાર્મા સેક્ટર જ એવું હતું જેમાં 1% નો ઘટાડો નોંધાયો હતો અને તે લાલ નિશાનમાં બંધ થયું હતું. આ સિવાયના તમામ સેક્ટરમાં આજે હરિયાળી છવાયેલી રહી હતી.

ડિફેન્સ (Defence): આ ઇન્ડેક્સમાં સૌથી વધુ 5% થી વધારેની તોફાની તેજી જોવા મળી.

3% નો વધારો: કેપિટલ ગુડ્સ, મીડિયા અને પીએસયુ બેન્ક (PSU Bank) ઇન્ડેક્સ 3% જેટલા વધ્યા.

1 થી 2% નો વધારો: ઓટો, કન્ઝ્યુમર ડ્યુરેબલ્સ, આઈટી (IT), મેટલ, રિયલ્ટી, એફએમસીજી (FMCG), ટેલિકોમ અને પ્રાઈવેટ બેન્ક ઇન્ડેક્સમાં 1 થી 2% ની મજબૂતી નોંધાઈ.

આ પણ વાંચો-ક્રૂડ ઓઈલમાં મોટો કડાકો: 100 ડોલરની નીચે ગગડ્યા ભાવ, શેરબજારમાં આ શેરો ખરીદવા રોકાણકારોની પડાપડી