એશિયન બજારોમાં મોટો કડાકો! કોસ્પી-નિક્કેઈ 4% સુધી ગગડ્યા, અમેરિકામાં ડેમોક્રેટ્સની જીતની અસર

4 નવેમ્બરે એશિયાઈ શેરબજારોમાં ભારે વેચવાલી જોવા મળી હતી. અમેરિકામાં મિડટર્મ ચૂંટણીના પરિણામોમાં ડેમોક્રેટિક પાર્ટીની વધતી સરસાઈથી રોકાણકારોમાં ચિંતા વધી છે. રોકાણકારોને આશંકા છે કે અમેરિકી સંસદમાં ડેમોક્રેટ્સનું વર્ચસ્વ વધવાથી આર્ટિફિશિયલ ઇન્ટેલિજન્સ (AI) કંપનીઓ પર નિયમનકારી નિયંત્રણો કડક થઈ શકે છે. તેની અસર એશિયાની એવી ટેક્નોલોજી કંપનીઓ પર પડી શકે છે, જેમનો બિઝનેસ અમેરિકાના AI રોકાણ અને સેમિકન્ડક્ટર ઉદ્યોગ સાથે જોડાયેલો છે.

આ ચિંતાને કારણે જાપાનનો નિક્કેઈ 225 (Nikkei 225) સૌથી વધુ દબાણમાં રહ્યો અને તેમાં લગભગ 4.5%નો ઘટાડો નોંધાયો હતો. જ્યારે ટોપિક્સ (Topix) ઇન્ડેક્સ આશરે 2% ગગડ્યો હતો. દક્ષિણ કોરિયાનો કોસ્પી (Kospi) પણ શરૂઆતની તેજી ગુમાવીને લગભગ 4% સુધી તૂટ્યો હતો. બીજી તરફ, તાઇવાનના શેરબજારમાં લગભગ 3%નો ઘટાડો જોવા મળ્યો હતો. MSCI એશિયા પેસિફિક ઇન્ડેક્સ પણ 2.3% સુધી ઘટ્યો હતો. જોકે, ચીનના CSI 300 અને હોંગકોંગના હેંગસેંગ ઇન્ડેક્સમાં સામાન્ય ઘટાડો નોંધાયો હતો.

જાપાનમાં AI અને ચિપ ઉદ્યોગ સાથે જોડાયેલી કંપનીઓના શેરોમાં ભારે ઘટાડો જોવા મળ્યો હતો. કિઓક્સિયા હોલ્ડિંગ્સ (Kioxia Holdings)ના શેર 11%થી વધુ તૂટ્યા હતા. જ્યારે એડવાન્ટેસ્ટ (Advantest)ના શેરમાં લગભગ 8% અને ટોક્યો ઇલેક્ટ્રોન (Tokyo Electron)ના શેરમાં આશરે 6%નો ઘટાડો નોંધાયો હતો.

દક્ષિણ કોરિયામાં સેમસંગ ઇલેક્ટ્રોનિક્સ (Samsung Electronics)ના શેર લગભગ 2% અને SK હાઇનિક્સ (SK Hynix)ના શેર 3%થી વધુ ગગડ્યા હતા. આ બંને કંપનીઓ વૈશ્વિક મેમરી ચિપ અને AI ઇન્ફ્રાસ્ટ્રક્ચર સપ્લાય ચેઇનમાં મહત્ત્વની ભૂમિકા ભજવે છે.

હોંગકોંગમાં હેંગસેંગ ટેક ઇન્ડેક્સ 1%થી વધુ નબળો પડ્યો હતો. અલીબાબા ગ્રુપ હોલ્ડિંગ અને શાઓમી કોર્પના શેરમાં પણ 2%થી વધુનો ઘટાડો જોવા મળ્યો હતો.

એશિયન બજારોમાં આ કડાકાનું કારણ શું છે?

રોકાણકારોની સૌથી મોટી ચિંતા એ છે કે જો અમેરિકી સંસદના બંને ગૃહોમાં ડેમોક્રેટ્સની પકડ મજબૂત બને છે, તો AI કંપનીઓ પર દેખરેખ અને નિયમનકારી નિયંત્રણો વધી શકે છે. પહેલેથી જ અનેક પડકારોનો સામનો કરી રહેલા એશિયન બજારોમાં હવે એ ચિંતા પણ વધી છે કે AI ક્ષેત્રમાં રોકવામાં આવી રહેલા અબજો ડોલરનું પૂરતું વળતર મળશે કે નહીં.

પેપરસ્ટોન ગ્રુપ લિમિટેડના સ્ટ્રેટેજિસ્ટ ડિલિન વૂના જણાવ્યા અનુસાર, અમેરિકી કોંગ્રેસમાં ડેમોક્રેટ્સનું નિયંત્રણ મજબૂત થવાની સંભાવનાથી એશિયન બજારોમાં અનિશ્ચિતતા વધી રહી છે. ચૂંટણીનાં પરિણામોની અસર AI રેગ્યુલેશન, ચિપની નિકાસ પરના પ્રતિબંધો અને ડેટા સેન્ટર માટેની ઊર્જા નીતિઓ પર પડી શકે છે.

iM સિક્યોરિટીઝના એનાલિસ્ટ યાંગ હ્યુન-ક્યુંગે ડાઉ જોન્સને જણાવ્યું હતું કે એશિયાની AI ઇન્ફ્રાસ્ટ્રક્ચર કંપનીઓ મોટા પ્રમાણમાં અમેરિકામાંથી આવતા AI રોકાણ પર નિર્ભર છે. તેમના મતે, જો અમેરિકી કોંગ્રેસનાં બંને ગૃહો પર ડેમોક્રેટ્સનું નિયંત્રણ થઈ જાય છે, તો AI ક્ષેત્ર પર કડક દેખરેખ રાખવાની માગ વધી શકે છે. તેના કારણે ડેટા સેન્ટરના વિસ્તરણની સમયમર્યાદા અંગે અનિશ્ચિતતા ઊભી થઈ શકે છે.

લોમ્બાર્ડ ઓડિયરના સિનિયર મેક્રો સ્ટ્રેટેજિસ્ટ હોમિન લીના જણાવ્યા અનુસાર, જો ડેમોક્રેટ્સ મોટી જીત મેળવે છે, તો રાષ્ટ્રપતિ ડોનાલ્ડ ટ્રમ્પના બાકીના કાર્યકાળ દરમિયાન રાજકીય ગતિરોધ વધી શકે છે. આવી સ્થિતિમાં રોકાણકારોને પોતાની રોકાણ વ્યૂહરચનામાં ઝડપથી ફેરફાર કરવાની ફરજ પડી શકે છે.

યુજિન ઇન્વેસ્ટમેન્ટ એન્ડ સિક્યોરિટીઝના એનાલિસ્ટ Huh Jae-Hwanના જણાવ્યા અનુસાર, ઓહિયો અને ટેક્સાસનાં ચૂંટણી પરિણામો મહત્ત્વનાં છે. કારણ કે આ બંને રાજ્યો AI ડેટા સેન્ટર રોકાણનાં મુખ્ય કેન્દ્રો તરીકે ઊભરી રહ્યાં છે. તેમણે વધુમાં જણાવ્યું હતું કે જો ટેક્સાસમાં નવા નિયમો લાગુ કરવામાં આવે છે, તો તેની સૌથી પહેલાં અસર AI ઇન્ફ્રાસ્ટ્રક્ચર પર પડી શકે છે. આ જ ચિંતાની અસર શેરબજારમાં જોવા મળી રહી છે.

Bata Indiaના શેરમાં વધુ ઘટાડાની શક્યતા! Citiએ ટાર્ગેટ પ્રાઇસ ઘટાડીને ₹550 કર્યો, આ છે 3 કારણો