એશિયન બજારોમાં ભારી તેજી, દક્ષિણ કોરિયાનો KOSPI 12% ઉછળ્યો: US-ઈરાન યુદ્ધ વચ્ચે ગ્લોબલ માર્કેટની લેટેસ્ટ અપડેટ

Global Market: વૈશ્વિક બજારોમાંથી રોકાણકારો માટે ઘણા સકારાત્મક સમાચાર આવી રહ્યા છે. ગિફ્ટ નિફ્ટીમાં (Gift Nifty) પોણા બસો પોઈન્ટથી વધુની તેજી નોંધાઈ છે. એશિયન બજારોમાં જોરદાર ઉછાળો જોવા મળ્યો છે, જેમાં નિક્કેઈ (Nikkei) 4% અને દક્ષિણ કોરિયાનો કોસ્પી (KOSPI) 12% ઉછળ્યો છે. અમેરિકન માર્કેટમાં પણ પોઝિટિવ ટ્રેન્ડ જોવા મળી રહ્યો છે.

અમેરિકન બજારોની સ્થિતિ અને ટ્રમ્પ સરકારને ઝટકો

અમેરિકાના બજારો ગઈકાલે સારા આર્થિક આંકડાઓને પગલે વધારા સાથે બંધ થયા હતા. ખાસ કરીને ટેક શેરોમાં શાનદાર રિકવરી જોવા મળી હતી.

* ડાઓ (Dow) આશરે 250 પોઈન્ટ ચઢીને બંધ થયો, જ્યારે S&P 500 માં લગભગ 1% નો વધારો જોવા મળ્યો.

* 2022 પછી ફેબ્રુઆરીમાં ISM સર્વિસ PMI 56.1 ના મજબૂત સ્તર પર રહ્યો છે. તમામ 14 સર્વિસ સેક્ટર, માઇનિંગ અને રિયલ એસ્ટેટમાં સારી તેજી છે.

મોટી રાહત: ગ્લોબલ માર્કેટ માટે મોટી રાહતના સમાચાર એ છે કે ટ્રેડ કોર્ટે ડોનાલ્ડ ટ્રમ્પને ટેરિફ રિફંડ કરવાનો આદેશ આપ્યો છે. હવે ટ્રમ્પ સરકારે IEEPA દ્વારા એકઠા કરેલા $130 બિલિયન પાછા આપવા પડશે.

દક્ષિણ કોરિયાનો KOSPI 12% ઉછળ્યો

ગુરુવાર, 5 માર્ચે સાઉથ કોરિયાનો બેન્ચમાર્ક ઈન્ડેક્સ KOSPI 12% સુધી વધી ગયો. આ સાથે જ તેણે પાછલા ટ્રેડિંગ સેશનમાં થયેલા તમામ નુકસાનની ભરપાઈ કરી લીધી છે. દેશનો સ્મોલકેપ ઈન્ડેક્સ KOSDAQ પણ 11% વધ્યો છે. US-ઈરાન યુદ્ધ અને ક્રૂડ ઓઈલની વધતી કિંમતોને કારણે બુધવારે બજારમાં ઐતિહાસિક કડાકો બોલ્યો હતો, પરંતુ ગુરુવારનો દિવસ આ ઈન્ડેક્સ માટે અત્યાર સુધીનો સૌથી સારો દિવસ બની શકે છે. નોંધનીય છે કે, સેમસંગ ઈલેક્ટ્રોનિક્સ અને SK હાઈનિક્સ જેવા હેવીવેઈટ શેરોનું KOSPI માં 50% વજન હોવાથી બજારમાં આટલી મોટી વધઘટ જોવા મળી રહી છે.

US-ઈરાન યુદ્ધ: તણાવ ચરમસીમાએ

ભૌગોલિક રાજનીતિની વાત કરીએ તો, અમેરિકન સીનેટમાં ટ્રમ્પને ઈરાન પર હુમલા રોકવા અંગેનો પ્રસ્તાવ 47-53 વોટથી રદ થયો છે. રિપબ્લિકન પાર્ટીએ ટ્રમ્પનો સાથ આપ્યો છે.

અમેરિકાએ ઈરાનના 20 થી વધુ જહાજો ડુબાડ્યા છે. જેમાં શ્રીલંકા પાસે ડૂબેલું એક યુદ્ધપોત પણ સામેલ છે જે ભારત અભ્યાસ માટે આવ્યું હતું. અમેરિકન હુમલાઓમાં 49 અધિકારીઓ અને કુલ 87 લોકોના તાજેતરમાં મોત થયા છે. અત્યાર સુધી યુદ્ધમાં 1,000 થી વધુ ઈરાનીઓના જીવ ગયા છે. અમેરિકાએ 2,000 થી વધુ ટાર્ગેટ પર હુમલો કર્યો છે અને ઈરાનની એરસ્પેસ હાલ અમેરિકાના કબજામાં છે. ટ્રમ્પનું કહેવું છે કે જો તેઓ કાર્યવાહી ન કરતા તો તેમના પર હુમલો થાત. ઈરાને અમેરિકા સાથે કોઈ પણ વાતચીતનો ઇનકાર કર્યો છે અને Pete Hegseth ને યુદ્ધ અપરાધી ગણાવ્યા છે. UNમાં ઈઝરાયેલના રાજદૂતે કહ્યું છે કે આ યુદ્ધ હજુ લાંબુ ચાલશે. સામે ઈરાને ધમકી આપી છે કે જો સત્તા પરિવર્તનનો પ્રયાસ થશે તો ઈઝરાયેલનો ડિમોના (Dimona) પરમાણુ પ્લાન્ટ નિશાના પર લેવામાં આવશે. વ્હાઇટ હાઉસે સ્પષ્ટ કર્યું છે કે કુર્દ લડવૈયાઓ સાથે કોઈ સમજૂતી નહીં થાય.

ડોલરની તેજી રોકાઈ, કરન્સી અને ક્રિપ્ટોની સ્થિતિ

ગુરુવારે ડોલરની રફ્તાર થોડી ધીમી પડી છે, જેનાથી અન્ય કરન્સીને રાહત મળી છે. ડોલર ઈન્ડેક્સ 98.82 પર આવી ગયો છે. યુરો $1.1628 પર અને સ્ટર્લિંગ $1.3368 પર સ્થિર છે. નબળા ડોલરને કારણે યેન 0.2% વધીને 156.79 પ્રતિ ડોલર પર પહોંચ્યો છે. ઓસ્ટ્રેલિયન ડોલર 0.57% વધીને $0.7068 અને ન્યુઝીલેન્ડ ડોલર ઘટીને $0.5939 પર છે. ચીને પોતાના યુઆન મિડપોઇન્ટને 34 મહિનાના સૌથી મજબૂત લેવલ પર પહોંચાડ્યો છે, જેથી યુઆન 0.1% વધીને 6.8862 પ્રતિ ડોલર પર છે. બીજી તરફ ક્રિપ્ટોકરન્સી માર્કેટમાં બિટકોઈન (Bitcoin) અને ઈથર (Ether) બંનેમાં આશરે 1% નો ઘટાડો નોંધાયો છે.

એશિયન બજારોમાં હાલનું લાઈવ ટ્રેડિંગ

આ લખાઈ રહ્યું છે ત્યારે એશિયન બજારોમાં શાનદાર કારોબાર થઈ રહ્યો છે:

* ગિફ્ટ નિફ્ટી (Gift Nifty) 15.00 અંકોની લીડ બતાવી રહ્યો છે.

* નિક્કેઈ (Nikkei) 1.58% વધીને 55,070.00 આસપાસ ટ્રેડ થઈ રહ્યો છે.

* તાઈવાનનું બજાર 2.27% ના મોટા ઉછાળા સાથે 33,574.46 ના સ્તર પર છે.

* હેંગસેંગ 0.83% ના વધારા સાથે 25,426.00 પર છે.

* કોસ્પી (KOSPI) હાલમાં 8.31% ની મજબૂતી સાથે ટ્રેડ કરી રહ્યો છે.

* શાંઘાઈ કમ્પોઝિટ 0.84% ના વધારા સાથે 4,116.77 ના સ્તર પર ટ્રેડ કરી રહ્યો છે. (સ્ટ્રેટ ટાઈમ્સ 0.67% પ્લસ છે).

એકંદરે, ગ્લોબલ માર્કેટમાં હાલમાં ખરીદીનો માહોલ છે. US-ઈરાન યુદ્ધના તણાવ વચ્ચે પણ મજબૂત આર્થિક આંકડાઓ અને પ્રોફિટ બુકિંગ બાદની રિકવરીએ રોકાણકારોનો વિશ્વાસ પાછો મેળવ્યો છે. આગામી સમયમાં યુદ્ધની સ્થિતિ બજારની દિશા નક્કી કરવામાં મોટો ભાગ ભજવશે.

આ પણ વાંચો- Moneyview IPO: શેરબજારમાં કમાણીની શાનદાર તક! ફિનટેક યુનિકોર્ન Moneyview લાવી રહી છે 1500 કરોડનો મેગા IPO

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.